ކޮލޮމްބޯ، ސްރީލަންކާ (ޖުލައި 9) - އިގްތިސާދީ ބޮޑު ކާރިސާއެއްގައި އޮތް ސްރީލަންކާގެ ސަރުކާރާ ދެކޮޅަށް ކުރަމުންދާ ބޮޑު މުޒާހަރާގެ ބައިވެރިން އެގައުމުގެ ރިޔާސީ ގަނޑުވަރަށް ވަދެގެންފި އެވެ.
އޭއެފްޕީން ރިޕޯޓުކޮށްފައިވާ ގޮތުގައި އެ މީހުން ގެކޮޅަށް ވަންއިރު ރައީސް ގޮތަބަޔަ ރަޖަޕަކްސާ ވަނީ ގެކޮޅު ދޫކުރައްވައި ވަޑައިގެންފަ އެވެ. އެ މައުލޫމާތު ދީފައިވަނީ އެގައުމުގެ އަސްކަރިއްޔާގެ އިސް އޮފިސަރެއް ކަމަށް އޭއެފްޕީން ބުނެ އެވެ.
ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި މުޒާހަރާތަކުގެ ތެރެއިން މިހާތަނަށް 33 މީހަކަށް ވަނީ އަނިޔާވެފަ އެވެ. އަދި، އޭގެ ތެރެއިން ދެ މީހުންގެ ހާލު ސީރިއަސް ކަމަށް ވެސް ރިޕޯޓުކޮށްފައިވެ އެވެ.
ލަންކާގެ ބޮޑުވަޒީރު ރަނިލް ވިކްރަމްސިންހަ ވަނީ ޕާޓީތަކުގެ ލީޑަރުންނާ އެކު އިމަޖެންސީ ބައްދަލުވުމެއް ބޭއްވުމަށް ނިންމަވާފަ އެވެ.
މި މުޒާހަރާތަކުގައި ބައިވެރިވުމަށް އެތައް ހާސް ބަޔަކު ވަނީ ކޮލޮމްބޯއަށް ދަތުރުކޮށްފަ އެވެ. ކޮލޮމްބޯ ހިމެނޭހެން ހަތް ސަރަހައްދެއްގައި ވަނީ ކާފިއު ވެސް އިއުލާނުކޮށްފަ އެވެ. ލަންކާގެ ސިޔާސީ މަޝްރަހުގައި ފާހަގަކޮށްލެވޭ ބޭފުޅުން ވެސް އަންނަނީ މި މުޒާހަރާތަކުގައި ބައިވެރިވަމުންނެވެ.
މިދިޔަ މާޗް މަހުގެ މެދެއްހާ ހިސާބުން ފެށިގެން ގޮތަބަޔާގެ ގެކޮޅުގެ ބޭރުގައި އާންމުން ދިޔައީ ކޭމްޕު ޖަހައިގެން މުޒާހަރާ ކުރަމުންނެވެ.
ސްރީލަންކާ ސޮވެރިން ޑިފޯލްޓަކަށް ގޮސްފައިވާއިރު އިންފްލޭޝަން ރޭޓު ހުރީ 54.6 ޕަސެންޓަށް ވުރެ މަތީގަ އެވެ. އަދި، ބޭހާއި ތެލަށް ވަނީ ޖެހިފަ އެވެ. އެގައުމަށް ދިމާވެފައިވާ އިގްތިސާދީ ކާރިސާއިން ސަލާމަތްވާނެ ދުވަހެއް ވެސް ނޭނގެ އެވެ.
