ބޮޑު އީދަކީ ރާއްޖޭގެ އެކި ރަށްރަށުގައި ގިނަ ކުޅިވަރުތަކާއެކު ވަރަށް ފޯރިއާއެކު ފާހަގަކުރާ މުނާސަބާއެކެވެ. ކޮވިޑާއެކު އެ ކުޅިވަރުތަކަށް މަޑުޖެހުމެއް އައުމަށްފަހު އަނެއްކާވެސް ރަސްމީ ސިފައެއްގައި އީދު ފޯރި ނެގުމުގެ ފުރުސަތު މިއަހަރު މިވަނީ ލިބިފަ އެވެ. އެކަން ރާއްޖޭގެ ރަށްރަށުން ފެންނަމުން އެބަދެ އެވެ.
މިއަހަރު އެންމެ ފޯރިގަދަކޮށް އީދު ފާހަގަކުރާ ރަށްތަކުގެ ތެރޭގައި ކ. މާފުށި. ބ. ދަރަވަންދޫ. ނ. ވެލިދޫ، އަދި ތ. ކިނބިދޫ އަދި ވިލުފުށި ހިމެނެ އެވެ.
ބައެއް ރަށްތަކުގައި އީދު ކުޅިވަރު ފެށީ ރެ އެވެ. އީދު މަޅި ޖެހުމާއި، ހުޅު ޖެހުމާއި، ހަވާ އެރުވުމާއި، ރަން ފޮށި އުފުލުމާއި، އީދު ވެދުމަށް ދިނުމާއި ހިއްޗަށް ދިއުން ފަދަ ތަފާތު ކުޅިވަރުތަކާއެކު އެވެ.
އީދު ކުޅިވަރުތައް ފެށުމަށް ރޭ ބޭއްވި ހަރަކާތްތަކަށްފަހު މިއަދު ބޮޑު ޖަމާއަތުގައި އީދު ނަމާދުކޮށް، އީދު ސައި ބޮއެގެން ބައެއް ރަށްރަށުން ނިކުތީ ފެންކުޅި ކުޅުމާއި، ކުލަ ޖެހުމަށެވެ. ބައެއް ރަށްރަށުގައި މި ނޫންވެސް ކުޅިވަރުތަކާ އެކު އީދުގެ ފޯރި ވަނީ ނަގަން ފަށާފަ އެވެ.
ނ. ވެލިދޫ އީދު ކުޅިވަރުގެ ތެރެއިން ރަންފޮށި އުފުލުހުން -- ފޮޓޯ: ނޫނު ފޮޓޯ
އީދު ކުޅިވަރުތައް ފޯރިއާއެކު ކުރިއަށްގެންދާ ތ. ކިނބިދޫއިން ފާހަގަކޮށްލެވޭ އެއްކަމަކީ، ރަށުގެ ކުދިބޮޑު އެންމެން ގުޅިގެން ނިކުމެ އީދު މަޖާ ކުރާ ކަމެވެ. އެ ރަށުގައި ކުރިއަށް ގެންދާ އީދު ކުޅިވަރުތަކުގެ ތެރޭގައި ވާ ދެމުމާއި، ބައިސްކަލު ރޭސް ޖެހުން ފާހަގަކޮށްލެވެ އެވެ.
ތ. ކިނބިދޫ އީދު ކުޅިވަރުތަކުގެ ތެރެއިން
މީގެ އިތުރުން ވެސް ބައެއް ރަށްތަކުގައި ކުލަ ޖެހުމާއި ފެންކުޅި ކުޅުމުގެ ހަރަކާތްތައް ކުރިއަށް ގެންގޮސްފައި ވެއެވެ.
ތ. ވިލުފުށީގައި އީދު ފާހަގަކުރުމުގެ ހަރަކާތްތަކުގެ ތެރެއިން އެންމެ ތަފާތު ކަމަކީ އީދު ބޯކިބާ މުބާރާތެވެ. އަމިއްލަ ފަރާތަކުން ސްޕޮންސަކޮށްގެން ފައިސާގެ އިނާމު ލިބޭ ގޮތަށް ބޭއްވި މި މުބާރާތުގައި ރަށުގެ ހަތަރު ވިލާއިން ބޯކިބާ ބައިވެރިކުރި އެވެ.
ބޯކިބާ މުބާރާތުން އެއްވަނަ ހޯދީ އަޅިވިލާ އެވެ. ދެ ވަނަ ހޯދީ ނޫވިލާ އެވެ.
"އަޅުގަނޑުމެން ބޭނުން ވަނީ އެކުވެރިކަން އާލާކުރަން. ކުރީގެ ސަގާފަތާއި އާދަކާދަތައް ދިރުވަން. އެހެންވެ އީދު ބޯކިބާ މުބާރާތް ބޭއްވީ،" ވިލުފުށީ ކައުންސިލްގެ ރައީސް ހުސައިން ޖަބީން ވިދާޅުވި އެވެ.
ވިލުފުށީ ބޯކިބާ މުބާރާތުގެ ތެރެއިން. --- ފޮޓޯ: އަހްމަދު ޒައިން
ށ. ބިލެއްދޫ އީދު ކުޅިވަރުގެ ތެރެއިން ފެންކުޅި ކުޅުން
