އިއްޒަތާއި ގަދަރު ލިބިގެންވާ ބަޔަކަށް ވާނީ މުޅި ހަޔާތުގެ ސަމުގާއަކަށް އިސްލާމް ދީނާއި ދީނުގެ ރިވެތި އަހުލާގުތައް ހަދައިގެން ކަމަށް އީދު ހުތުބާގައި މިއަދު ބުނެފި އެވެ.
އަލްހާ އީދުގެ ހުތުބާ ފެށީ ސުލްހަވެރި ގުޅުން ބަދަހި މުޖުތަމައެއް ބިނާކުރެވޭނެ ގޮތަކަށް އީދު ފާހަގަ ކުރުމުގެ އިސްލާމީ އާދަކާދަ ފަރުމާ ކޮށްފައި އޮންނަ ގޮތް ކިޔައިދެމުންނެވެ. އީދު ނަމާދުގެ ބޮޑު ޖަމާއަތުން ދުވަސް ފަށާއިރު، އީދު ދުވަހަކީ އަހަރުގައި އަންނަ އެންމެ މާތް ދުވަސްތަކުގެ ތެރެއިން އެންމެ ފަހު ދުވަސްކަން ހުތުބާގައި ހަނދާންކޮށްދިނެވެ.
ހުތުބާގައި ވަނީ މާތް ﷲ އަށް ބިރުވެތިވުމަށް ގޮވާލާފަ އެވެ. އަދި މި އީދުން ހަޔާތުގެ އާ ސަފުހާއެއް ހުޅުވާ މިއަދުގެ ހާލަތަށްވުރެ ކަންކަން ރަނގަޅު ކުރުމަށް މަސައްކަތް ކުރުމަށް ވަނީ ނަސޭހަތްތެރިވެފަ އެވެ. މުސްލިމުންނަކީ ގަދަރު ލިބިފައިވާ ބަޔަކަށް ވާނީ ހަޔާތުގެ ސަމުގާ އަކީ އިސްލާމް ދީނާއި ދީނުގެ ރިވެތި އަހުލާގުކަމުގައި ހަދައިގެން ކަމަށް ވެސް ހުތުބާގައި ބުންޏެވެ.
"އިއްޒަތާއި ގަދަރު ހާސިލް ކުރެވޭނީ އަހަރެމެންގެ މެދުގައި އޮންނަ އެއްބައިވަންތަކަން ހަރުދަނާ ކޮށްގެން. އަހަރެމެންނަކީ ބައިބައި ނުވެ އުންމަތުގެ މަސްލަހަތު ހާސިލް ކުރުމަށްޓަކައި އެއް ގަލަކަށް އަރާ މަސައްކަތް ކުރާ ބަޔަކަށް ވެގެން،" ހުތުބާގައި ބުންޏެވެ.
މުސްލިމުންނަށް ލިބިފައިވާ ކާމިޔާބީތަކުގެ ފަހަތުގައި ވެސް ވަނީ އެއްބައިވަންތަކަމާއި އެކުވެރިކަން ކަމަށާއި ނާކާމިޔާބީއާ ކުރިމަތިވީ ބައިބައިވުމުން ކަމަށް ހުތުބާގައި ކިޔައިދިނެވެ.
އީދު ހުތުބާގައި ބުނެފައި ވަނީ ހައްޖުގެ މަތިވެރި އަޅުކަމުން ހަނދާންކޮށްދެނީ ނަބީބޭކަލުންގެ ބަފައިކަލުން އިބްރާހިމްގެފާނުގެ ވާހަކަތައް ކަމަށެވެ. އަދި އިބްރާހިމްގެފާނާއި އެކަލޭގެފާނުގެ ދަރިކަލުން އިސްމާއިލްގެފާނު ގެފުޅުގެ ބިންގަލުގެ މަތީގައި ގެފުޅު އަލުން ބިނާކުރެއްވި ޒިކުރާ ވެސް ހައްޖުގެ މަތިވެރި އަޅުކަމުން ހަނދާންކޮށްދޭ ކަމަށް ވެސް އީދު ހުތުބާގައި ބުނެފައިވެ އެވެ.
ހުތުބާގައި ބުނެފައި ވަނީ އިސްމާއީލްގެފާނު ދެއްކެވި ކިޔަމަންތެރިކަމުގެ ނަމޫނާއަކީ އަދުގެ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށެވެ. އިސްމާއިލްގެފާނު ދެއްކެވި ނަމޫނާއަކީ މައިންބަފައިންނަށް ކިޔަމަން ގަންނަން ޖެހޭ މިންވަރުގެ ދިރިހުރި މިސާލެއް ކަމަށް ވެސް ހުތުބާގައި ބުނެފައިވެ އެވެ.
ހުތުބާގައި އިތުރަށް ބުނެފައި ވަނީ އިސްލާމް ދީނުގައި އީދުތައް ޝަރުއު ކުރައްވާފައި ވަނީ ހަމައެކަނި އުފާ ފާޅުކޮށް މަޖާކުރަން ނޫން ކަމަށާއި އެކަން ޝަރުއު ކުރެއްވީ އިސްލާމީ މުޖްތަމައުގެ އަފްރާދުންގެ މެދުގައި އެކުވެރިކަން އާލާކޮށް، އިސްލާމީ އުހުވަތްތެރިކަން ދެމެހެއްޓުވުމަށް ކަމަށެވެ.
މުސްލިމުންގެ މެދުގައި ހެޔޮ ފޯރުވުމާއި އެއްބަޔަކު އަނެއް ބަޔަކަށް އެހީވުމަކީ އިސްލާމީ ރިވެތި އަދަބަކަށްވާއިރު، ބޭނުން ޖެހިފައިވާ މީހުންނަށް އެހީތެރިވެ، އީދުގެ އުފަލުގައި އެ މީހުން ބައިވެރި ކުރުމަށް ހުތުބާގައި ވަނީ ގޮވާލައިފަ އެވެ.
