ފިއްތުންތައް ކުރިމަތިވެ، ވެރިކަން ކުރާ ކޮންޒަވޭޓިވް ޕާޓީގެ ލީޑަރުކަމުން އިސްތިއުފާ ދެއްވަން އިނގިރޭސި ބޮޑު ވަޒީރު ބޮރިސް ޖޯންސަން ނިންމަވައިފި އެވެ.
އެހެން ނަމަވެސް، އަންނަ ސެޕްޓެމްބަރު މަހުގެ ފަހުކޮޅާ ހަމައަށް ބޮޑު ވަޒީރުގެ މަގާމުގައި ބޮރިސް ދެމިހުންނަވާނެ އެވެ.
ބޮރިސްގެ އިސްތިއުފާއަށް ގޮވާލައި ފާއިތުވި 48 ގަޑިއިރުގެ ތެރޭގައި އިނގިރޭސި ކެބިނެޓުގެ ގިނަ މިނިސްޓަރުންތަކެއް އިސްތިއުފާ ދެއްވި އެވެ.
ފިނޭންސް މިނިސްޓަރު ރިޝީ ސުނަކް ވެސް އިސްތިއުފާ ދެއްވި އިރު، އޭނާގެ ބަދަލުގައި އެ މަގާމަށް އައްޔަނު ކުރެއްވި އާ މިނިސްޓަރު ނާހިމް ޒަހަވީ ވެސް ވަނީ ބޮރިސްގެ އިސްތިއުފާއަށް ގޮވާލައްވާފަ އެވެ.
ބުރާސްފަތި ދުވަހުގެ ހެނދުނާ ހަމައަށް ބޮރިސް ވިދާޅުވީ އިސްތިއުފާ ނުދެއްވާނެ ކަމަށެވެ. ނަމަވެސް ގިނަ ޕާލިމެންޓް މެމްބަރުންތަކެއްގެ އިތުބާރު ގެއްލި، ސަރުކާރު އިތުރަށް ނުހިންގޭނެކަން ސާފުވުމުން މަގާމުން ދުރަށް ޖެހެން ނިންމެވީ އެވެ.
މީގެ ތިން އަހަރު ކުރިން ބޭއްވި އާއްމު އިންތިހާބުން ބޮރިސް ކުރި ހޯއްދެވީ ވަރަށް ބޮޑު ތަފާތަކުންނެވެ. އެކަމަކު ބޮރިސްއާ ގުޅުން ހުރި މައްސަލަތަކެއް ފަހަކަށް އައިސް ފެންމަތިވެފައިވެ އެވެ. އެގޮތުން ކޮވިޑާ ގުޅިގެން ލޮކްޑައުންކޮށް އެޅި ފިޔަވަޅާ ހިލާފުވުމުން، އެމަނިކުފާނު ޖޫރިމަނާއެއް ވެސް ދައްކަން ޖެހިވަޑައިގެންނެފި އެވެ.
ބޮރިސްގެ އިސްތިއުފާއަަށް ގޮވާލައި މި ހަފްތާގަައި ވެރިކަން ކުރާ ޕާޓީގެ ބައެއް އިސް މެމްބަރުން ނުރުހުން ފާޅު ކުރަން ފެށީ، ޖިންސީ ފުރައްސާރައިގެ ތުހުމަތު ކުރެވޭ ކުރީގެ ޑެޕިއުޓީ ޗީފް ވިޕް ކްރިސް ޕިންޗާއަށް މަގާާމެއް ދިން މައްސަލައިގަ އެވެ.
