ލަންޑަން (ޖުލައި 7) - މި އަހަރުގެ ފުރަތަމަ ދެ ގްރޭންޑް ސްލޭމް ޓެނިސް މުބާރާތް ކަމަށްވާ އޮސްޓްރޭލިއަން އޯޕަން އާއި ފްރެންޗް އޯޕަން ތަށި އުފުލާލި ސްޕެއިނުގެ ރަފައެލް ނަޑާލް، މިހާރު ކުރިއަށްދާ ވިމްބަލްޑަން ޓެނިސް މުބާރާތުގެ ކުއާޓާ ފައިނަލުގައި އަނިޔާގައި ހުރެ ހޯދި މޮޅާ އެކު ސެމީ ފައިނަލުން ފުރުސަތު ހޯދައިފި އެވެ.
ނަޑާލް, 36, ވަނީ, އިއްޔެ ކުޅުނު ކުއާޓާ ފައިނަލް މެޗުގެ ތެރެއިން ދެ ވަނަ ސެޓުގައި، މެޑިކަލް ޓައިމްއައުޓެއް ނަގައިފަ އެވެ. އޭގެ ކުރިން ހަތަރު ވަނަ ބުރުގެ މެޗުގައި ވެސް ބަނޑުގެ އަރިމަތީގައި ރިއްސާތީ ޓޭޕްކޮށްގެން ނަޑާލް ކުޅުނުއިރު، ކުއާޓާ ފައިނަލް މެޗުގައި ވެސް ނަޑާލް އިއްޔެ ފަހު ސެޓުތައް ކުޅުނީ ޓޭޕްކޮށްގެންނެވެ.
ފަހަތުން އަރައި އެމެރިކާގެ ޓޭލާ ފްރިޓް އަތުން، ކުއާޓާ ފައިނަލްގައި ނަޑާލް މޮޅުވިއިރު، މެޗުގެ ސެޓުތައް ދިޔައީ 3-6 7-5 3-6 7-5 7-6 (10-4) އިންނެވެ.
ނަޑާލަށް މި މެޗުގައި ކުރިމަތިވީ އާންމު ގޮތެއްގައި ކުޅުންތެރިން މެޗު ދޫކޮށްލާފަދަ އަނިޔާއެކެވެ. އެކަމަކު، އަނިޔާ އަށް ފަރުވާ ހޯދައިގެން ނަޑާލް މި ވަނީ ތަފާތު ހިތްވަރެއް ދައްކައި މެޗުން މޮޅުވެފަ އެވެ. އެހެންވެ، ނަޑާލަށް ގިނަ ބަޔެއްގެ ތަރުހީބު އަންނަނީ ލިބެމުންނެވެ.
"މެޗު ދޫކޮށްލަން ވެސް ވިސްނިން، އެކަމަކު، ހިތްވަރު ދައްކައިގެން ކާމިޔާބު ހޯދޭނެ ކަމުގެ އިތުބާރު އޮތީމަ އަހަރެން ނިންމީ މަސައްކަތް ކުރަން، ތަފާތު ފެނުނީ އަމިއްލަ ނަފްސަށް، އަމިއްލަ ހަށިގަނޑަށް އޮތް އިތުބާރުން،" ނަޑާލް ބުންޏެވެ.
ނަޑާލް ބުނީ މި މޮޅާ އެއްވަރުގެ އިހުސާސެއް އެންމެ ފަހުން ކުރެވުނީ، 2008 ވަނަ އަހަރުގެ ވިމްބަލްޑަން ފައިނަލުގައި ޓެނިސް ލެޖެންޑް، ރޮޖާ ފެޑެރާ އަތުން ލިބުނު މޮޅު ކަމަށެވެ.
ސެމީގައި ނަޑާލް ކުޅެން ޖެހޭނީ މުޅިން އަލަށް ވިމްބަލްޑަން ޓެނިސް މުބާރާތުގެ ސެމީން ފުރުސަތު ހޯދި އޮސްޓްރޭލިއާގެ ނިކް ކިރްގިއޯސްއާ އެވެ.
ކިރްގިއޯސް ވަނީ ފަސޭހަކަމާ އެކު ޗިލީގެ ކްރިސްޓިއަން ގާރިން ބަލިކޮށްފަ އެވެ. ކިރްގިއޯސް އަކީ 2005 ވަނަ އަހަރުގެ ފަހުން ވިމްބަލްޑަންގެ ސެމީގައި ކުޅޭ ފުރަތަމަ އޮސްޓްރޭލިއާގެ ކުޅުންތެރިޔާ އެވެ. އެ ފަހަރު ސެމީގައި ކުޅުނީ ކުރީގެ ކުޅުންތެރިޔާ، ލޭޓަން ހެވިޓް އެވެ. ގާރިން ކައިރިން ކިރްގިއޯސް ސެޓުތައް ގެންދިޔައީ 6-4 6-3 7-6 (7-5) އިންނެވެ.
މި އަހަރު ގްރާސް ކޯޓުގައި ކިރްގިއޯސްގެ ރެކޯޑް ރަނގަޅެވެ. އޭނާ ވަނީ ގްރާސް ކޯޓުގައި ކުޅުނު 14 މެޗުގެ ތެރެއިން 12 މެޗުން މޮޅުވެފަ އެވެ. ސެމީގައި ނަޑާލާ ދެކޮޅަށް ކިރްގިއޯސް ނުކުންނައިރު، މި ދެ ކުޅުންތެރިންގެ ކުރިމަތިލުންތަކުން ނަޑާލް ވަނީ ގިނަ ފަހަރު މޮޅުވެފަ އެވެ.
މާދަމާ ވިމްބަލްޑަންގެ ފިރިހެން ސިންގަލްސް ސެމީ ފައިނަލް މެޗުތައް ކުޅޭއިރު، ނަޑާލާއި ކިރްގިއޯސްގެ ތެރެއިން މޮޅުވާ ކުޅުންތެރިއަކު ފައިނަލުގައި ކުޅޭނީ އަނެއް ސެމީގައި އިންގްލެންޑްގެ ކެމަރަން ނޯރީ އާއި ދުނިޔޭގެ އެއް ވަނަ ސާބިއާގެ ނޮވަކް ޖޮކޮވިޗް ކުޅެގެން މޮޅުވާ ކުޅުންތެރިއަކާ އެވެ. ނޯރީ އަކީ 2016 ވަނަ އަހަރަށް ފަހު ވިމްބަލްޑަން ސެމީގައި ފެންނާނެ ފުރަތަމަ އިނގިރޭސި ކުޅުންތެރިޔާ އެވެ.
