ޔޫކްރެއިންގެ އެންމެ އިރުގައި އޮންނަ ލުހާންސްކް ސަރަހައްދުގެ ކޮންޓްރޯލް ލިބުމުން ވެސް ހަނގުރާމަ ނުހުއްޓައި ކުރިއަށް ގެންދަން ރަޝިއާގެ ރައީސް ލެޑިމިއަ ޕުޓިން އަންގަވައިފި އެވެ.
ރަަޝިއާގެ ޓީވީން ދެއްކި ވީޑިއޯއެއްގައި ޕުޓިން ވިދާޅުވީ "ކުރިން ރާވާފައިވާ ގޮތަށް" ހުރިހާ ދިމާލަކުން ވެސް ސިފައިން ކުރިއަށް ދިޔުމަށް އަންގާފައި ވާނެ ކަމަށެވެ.
އިރުމަތީ ޔޫކްރެއިންގެ ލިސިޗާންސްކް ސިޓީއިން ޔޫކްރެއިންގެ ސިފައިން ފޭބުމުން، ލުހާންސްކް ސަރަހައްދުގެ ފުރިހަމަ ކޮންޓްރޯލް މި ހަފްތާގައި ރަޝިއާއަށް ލިބުނެވެ.
ޔޫކްރެއިންގެ ރަައީސް ވޮލޮޑިމިރް ޒެލެންސްކީ ވިދާޅުވީ ގެއްލިފައިވާ ސަރަހައްދުތައް އަނބުރާ ހޯދުމަށް ޔޫކްރެއިންގެ ސިފައިން އަދި މަސައްކަަތް ކުރާނެ ކަމަށެވެ.
ރަޝިއާާއިން މިހާރު މަސައްކަތް ކުރަނީ ލުހާންސްކްއާ ޖެހިގެން އޮންނަ ޑޮނެސްކް ސަރަަހަައްދުގެ ފުރިހަމަ ކޮންޓްރޯލް ހޯދުމަށެވެ. އެ ތަނުގެ ސިޓީތަކަށް ދޭ ހަމަލާތައް ވަނީ ވަރުގަދަކޮށްފަ އެވެ.
މިދިޔަ ފެބްރުއަރީ މަހު ހަނގުރާމަ ފެށުމުގެ ކުރިން ޕުޓިން ވަނީ ޑޮނެސްކް އާއި ލުހާންސްކް އަކީ ދެ މިނިވަން ސަރަހައްދުގެ ގޮތުގައި ބަލައިގަތްކަން އިއުލާން ކުރައްވާފަ އެވެ.
ދެހާސް ސާދަ ވަނަ އަހަރުން ފެށިގެން އެ ދެ ތަނުގައި އޮތީ ރަޝިއާއަށް ތާއީދު ކުރާ ވެރިކަމެވެ. އެހެންކަމުން ޔޫކްރެއިން ސަރުކާރުން ދިޔައީ އެ ދެ ތަނުގެ ކޮންޓްރޯލް ހޯދަން ހަނގުރާމަ ކުރަމުންނެވެ.
މީގެ ހަފްތާއެއްހާ ދުވަސް ކުރިން ރަޝިއާއިން ވަނީ އިރުމަތީ ޔޫކްރެއިންގެ ސެވެރޮޑޮނެސްކް ސިޓީ ވެސް ހިފައިފަ އެވެ.
މި ވަގުތު ޑޮނެސްކް ސަރަހައްދުން ޔޫކްރެއިންގެ ބާރުގެ ދަށުގައި އޮތް ދެ ބޮޑު ސިޓީއަކީ ސްލޮވިޔާންސްކް އާއި ކްރަމަޓޯސްކް އެވެ.
