ޔޫކްރެއިންގެ އިރުމަތީގައި އޮންނަ ލިސިޗާންސްކް ސިޓީގެ ފުރިހަމަ ކޮންޓްރޯލް ހޯދާފައިވާ ކަމަށް ރަޝިއާއިން ބުނެފި އެވެ.
ރަޝިއާގެ ޑިފެންސް މިނިސްޓަރު ސާގެއި ޝޮއިގޫ އެ ގައުމުގެ ރައީސް ލެޑިމިއަ ޕުޓިންއަށް ވިދާޅުވީ ލުހާންސްކްގެ ފުރިހަމަ ކޮންޓްރޯލް ހޯދާފައިވާ ކަމަށެވެ.
ރަޝިއާގެ ޗެޗެން ރިޕަބްލިކްގެ ވެރިޔާ ރަމްޒާން ކަޑީރޯވް ވަނީ ޗެޗެން ސިފައިން ލިސިޗާންސްކް ސިޓީގެ މެދުގައި ތިބި މަންޒަރު ފެންނަ ވީޑިއޯއެއް އާންމުކޮށްފަ އެވެ.
ލިސިޗާންސްކް ސިޓީގެ ތަންކޮޅެއް ހުޅަނގުން އޮންނަ ސްލޮވިޔާންސްކް ސިޓީއަށް ވެސް އާދީއްތަ ދުވަހު ހަމަލާ ދިނުމުން ހަ މީހުން މަރުވި އެވެ.
ސްލޮވިޔާންސްކްގެ ކޮންޓްރޯލް މިހާރު އޮތީ ޔޫކްރެއިންގެ އަތުގަ އެވެ. އެ ސިޓީއަކީ ޑޮނެސްކް އާއި ލުހާންސްކްއާ އެކު ޑޮންބާސް ސަރަހައްދުގައި އޮންނަ ސިޓީ އެކެވެ.
މިދިޔަ ފެބްރުއަރީ މަހު ހަނގުރާމަ ފެށުމުގެ ކުރިން ޕުޓިން ވަނީ ޑޮނެސްކް އާއި ލުހާންސްކް އަކީ ދެ މިނިވަން ސަރަހައްދުގެ ގޮތުގައި ބަލައިގަތްކަން އިއުލާން ކުރައްވާފަ އެވެ.
ދެހާސް ސާދަ ވަނަ އަހަރުން ފެށިގެން އެ ދެ ތަނުގައި އޮތީ ރަޝިއާއަށް ތާއީދު ކުރާ ވެރިކަމެވެ. އެހެންކަމުން ޔޫކްރެއިން ސަރުކާރުން ދިޔައީ އެ ދެ ތަނުގެ ކޮންޓްރޯލް ހޯދަން ހަނގުރާމަ ކުރަމުންނެވެ.
މީގެ ހަފްތާއެއްހާ ދުވަސް ކުރިން ރަޝިއާއިން ވަނީ އިރުމަތީ ޔޫކްރެއިންގެ ސެވެރޮޑޮނެސްކް ސިޓީ ވެސް ހިފައިފަ އެވެ.
މި ވަގުތު ޑޮނެސްކް ސަރަހައްދުން ޔޫކްރެއިންގެ ބާރުގެ ދަށުގައި އޮތް ދެ ބޮޑު ސިޓީއަކީ ސްލޮވިޔާންސްކް އާއި ކްރަމަޓޯސްކް އެވެ.
