އިރުމަތީ ޔޫކްރެއިންގެ ލިސިޗާންސްކް ސިޓީ ހިފަން ރަޝިއާއިން ދޭ ހަމަލާތައް ވަރުގަދަކޮށްފައިވާ ކަމަށް ޔޫކްރެއިނުން ބުނެފި އެވެ.
އިރުމަތީ ޔޫކްރެއިންގެ ޑޮންބާސް ސަރަހައްދުގައި މިހާރު ރަޝިއާއަށް ނުހިފި އޮތް ހަމައެކަނި ސިޓީއަކީ ލިސިޗާންސްކް އެވެ. މިދިޔަ މަހު ރަޝިއާއިން ވަަނީ ސެވެރޮޑޮނެސްކް ހިފަައިފަ އެވެ.
"ލިސިޗާންސްކްގައި ރޯވެފައިވާ އަލިފާންގަނޑުތައް ނިއްވާލާނެ ވަގުތު ވެސް ނުލިބޭ،" ހަމަލާތައް ފުލުފުލުގަައި އަންނަމުންދާކަން ފާހަގަކޮށް ގަވަރުނަރު ސެރްހީ ހައިދައި ވިދާޅުވި އެވެ.
ލިސިޗާންސްކްގެ އިތުރުން ޔޫކްރެއިންގެ އުތުރާއި ދެކުނުގައިވާ ސިޓީތަކަށް ވެސް ރަޝިއާއިން މިސައިލްތައް ފޮނުވާފައިވާ ކަމަށް ރިޕޯޓުތައް ބުނެ އެވެ.
އެގޮތުން އުތުރު ހާރްކީވް ސިޓީގެ ރޭލް ދަގަނޑުތަކާއި ކަރަންޓު ލައިންތަކަށް ގެއްލުން ލިބުނެވެ. ނަމަވެސް އެއްވެސް މީހަކު މަރުވި ކަމަށް ރިޕޯޓުކޮށްފައެއް ނުވެ އެވެ.
ދެކުނުގައި އޮންނަ މައިކޮލައިވް ސިޓީގައި ވެސް ބާރުގަދަ ގޮވުންތަކެއް ގޮވި އެވެ. އެއީ އޮޑެއްސާ ސިޓީއަށް ދާ މައި މަގު އޮންނަ ސިޓީ އެވެ.
