އެކާވީސް ވަނަ ގަރުނުގެ ތެރޭގައި ފުރިހަމަ ވި ދެ ޑެކޭޑް (ކޮންމެ 10 އަހަރެއް)ގައި 200 އަށް ވުރެ ގިނަ ގޯލު ޖެހުމުގެ ރެކޯޑް، ޕޯޗުގީސް ތަރި ކްރިސްޓިއާނޯ ރޮނާލްޑޯ އާއި ސްވިޑެންގެ ޒަލަޓާން އިބްރަހިމޮވިޗް އަދި ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ، އަލީ އަޝްފާގު (ދަގަނޑޭ) ހިއްސާކޮށްފި އެވެ.
މި ކުޅުންތެރިން ޖެހި ގޯލުތައް ގުނުމުގައި ބަލާފައިވަނީ، ކުޅޭ ގައުމެއްގެ ލީގާއި ކުޅޭ ގައުމެއްގެ ކަޕާއި ބައިނަލްއަގުވާމީ ކްލަބް ފުޓްބޯޅަ މުބާރާތްތަކުގެ އިތުރުން ގައުމީ ޓީމާ އެކު ކުޅޭ ރަސްމީ މުބާރާތްތަކުގައި ޖަހާފައިވާ ގޯލުތަކަށެވެ.
އެ ގޮތުން ދަގަނޑޭ ވަނީ 2001 އިން 2010 އަށް، 223 ގޯލު ޖަހައިފަ އެވެ. އެއީ ގައުމީ ޓީމަށް 16 ގޯލާއި ކްލަބް ލެވަލްގައި ވެލެންސިއާ، ނިއު ރޭޑިއަންޓް، ވީބީ އަދި ބުރުނާއީ އަށް ޖުމްލަ އެކުގައި 207 ގޯލެވެ. ދަގަނޑޭ، 2011-2020 އަށް ވަނީ، ގައުމީ ޓީމަށް 37 ގޯލު ޖަހައިދިނުމުގެ އިތުރުން، ނިއު، ޕީޑީއާރްއެމް، ވީބީ، މާޒިޔާ، ގްރީން ސްޓްރީޓްސް އަދި ޓީސީ ސްޕޯޓްސް ކްލަބަށް ޖުމްލަ އެކު، 206 ގޯލު ޖަހައިފަ އެވެ. އެ ޑެކޭޑްގައި ދަގަނޑޭގެ ޖުމްލަ އަކީ 243 ގޯލެވެ. ދެ ޑެކޭޑްގައި ދަގަނޑޭގެ ޖުމްލަ އަދަދަކީ 466 ގޯލެވެ.
ކްރިސްޓިއާނޯ ރޮނާލްޑޯ ވަނީ 2001-2010 އަށް ޖުމްލަ 206 ގޯލު ޖަަހައިފަ އެވެ. އޭގެ ތެރޭގައި ޕޯޗުގަލް އަށް ޖަހައިިދިން 25 ގޯލުގެ އިތުރުން ދެން ހިމެނެނީ، ސްޕޯޓިން ލިޒްބަން، މެންޗެސްޓާ ޔުނައިޓެޑް އަދި ރެއާލް މެޑްރިޑަށް ޖަހައިދިން، 181 ގޯލެވެ. ރޮނާލްޑޯ 2011-2020 އަށް ޕޯޗުގަލް އަށް 77 ގޯލު ޖަހައިދިންއިރު، އެ މުއްދަތުގައި ރެއާލާއި ޔުވެންޓަސް އަށް ވަނީ 473 ގޯލު ޖަހައިފަ އެވެ. މި ޑެކޭޑްގައި ރޮނާލްޑޯ ވަނީ 550 ގޯލު ޖަހައިފަ އެވެ. އެއީ ދެ ޑެކޭޑަށް ބަލާނަމަ ޖުމްލަ 756 ގޯލެވެ.
އިބްރަހިމޮވިޗް ވަނީ 2001-2010 އަށް ސްވިޑެން އަށް 25 ގޯލު ޖަހައިފަ އެވެ. ކްލަބް ލެވަލްގައި އިބްރަހިމޮވިޗް ވަނީ މަލްމޯ، ޔުވެންޓަސް، އަޔަކްސް، އިންޓަ މިލާން އަދި ބާސެލޯނާ އަށް އެ މުއްދަތުގައި 178 ގޯލު ޖަހައިފަ އެވެ. އެ ޑެކޭޑްގައި އިބްރަހިމޮވިޗްގެ ޖުމްލަ އަކީ 203 ގޯލެވެ. އިބްރަހިމޮވިޗް، 2011-2020 އަށް ވަނީ ޖުމްލަ އެކު، 340 ގޯލު ޖަހައިފަ އެވެ. އެއީ ސްވިޑެން ގައުމީ ޓީމަށް 37 ގޯލުގެ އިތުރުން، އޭސީ މިލާން، ޕީއެސްޖީ، މެންޗެސްޓާ ޔުނައިޓެޑް އަދި އެލްއޭ ގެލެކްސީ އަށް 303 ގޯލެވެ. ދެ ޑެކޭޑަށް ބަލާނަމަ އިބްރަހިމޮވިޗްގެ ޖުމްލަ އަކީ 543 ގޯލެވެ.
މި ވަގުތު އަނިޔާއެއްގެ ސަބަބުން ފިޓްނަސް އަށް އަސަރުކޮށްފައިވާތީ ކުޅުމާ ހުރި ދަގަނޑޭގެ ކެރިއަރުގައި މިހާތަނަށް ޖުމްލަ އަދަދަށް ބަލާއިރު، އޭނާ ވަނީ ކްލަބް ލެވަލާއި ގައުމީ ޓީމަށް 481 ގޯލު ޖަހައިފަ އެވެ. އެއީ ގައުމީ ޓީމަށް ޖެހި 58 ގޯލާއި ކްލަބް ލެވަލްގައި އަށް ކްލަބަށް ކުޅެގެން ޖެހި 423 ގޯލެވެ.
