މިލާން (ޖުލައި 2) - އިޓާލިއަން ލީގުގެ ޗެމްޕިއަންކަން އޭސީ މިލާނުން ހޯދުމަށް ފަހު ބޭއްވި ޓްރޮފީ ޕެރޭޑްގެ ތެރެއިން އެ ޓީމުގެ ހަތަރު ކުޅުންތެރިއަކު، އިންޓަ މިލާނަށް ޖޯކުޖެހި މައްސަލައިގައި ޖޫރިމަނާއެއް ދައްކަން ޖެހިއްޖެ އެވެ.

ހަތަރު ކުޅުންތެރިއަކާއި މިލާން ޓީމުން ޖުމްލަ އެކު 30،220 ޑޮލަރު ދައްކަން އިޓަލީގެ ފުޓްބޯޅަ ފެޑެރޭޝަނުން އިއްޔެ ވަނީ އަންގައިފަ އެވެ.

މިލާން ޓީމަށް އައިސްފައިވަނީ 12،500 ޑޮލަރުގެ ޖޫރިމަނާ އެކެވެ. އިންޓަ އަށް ނިސްބަތްކޮށް ޖޯކު ޖަހައި ބޭއަދަބީ ބަހުން މުއާމަލާތު ކޮށްފައިވާތީ، މިލާންގެ ކީޕަރު މައިކް މައިންގްނޯން، ފުލްބެކް، ތެއޯ ހެނާންޑޭޒް އަދި މިޑްފީލްޑަރު ސަންޑްރޯ ޓޮނާލީ، ކޮންމެ ކުޅުންތެރިއަކު 4170 ޑޮލަރު ދައްކަން ވަނީ އަންގައިފަ އެވެ. މިލާންގެ މިޑްފީލްޑަރު، ރާޑް ކްރުނިޗަށް އައީ 5210 ޑޮލަރުގެ ސަސްޕެންޝަނެކެވެ.

އިޓަލީ ފުޓްބޯޅައިގެ މަގުބޫލު ސިޓީ، މިލާނުގެ އެކި މަގުތަކުގައި މެއި 23 ވަނަ ދުވަހު އޭސީ މިލާން ޓީމުން ޓްރޮފީ ޕެރޭޑް ބޭއްވީ 11 އަހަރަށް ފަހު އިޓަލީގެ ޗެމްޕިއަންކަން ހޯދުން ފާހަގަކުރުމަށެވެ. މިދިޔަ ސީޒަނުގައި މިލާނާ އެންމެ ގާތުން ލީގު ތަށްޓައް ވާދަކުރީ އިންޓަ އެވެ.

މިލާންގެ ޓެކްނިކަލް ޑިރެކްޓަރު ޕައޮލޯ މަލްޑިނީ: އިތުރު ދެ އަހަރަށް މިލާންގައި މަޑުކުރާނެކަން ވަނީ އިއުލާނުކޮށްފައިވާ.-- ފޮޓޯ: އޭއެފްޕީ

މަލްޑިނީ އިތުރު ދެ އަހަރަށް މިލާނުގައި މަޑުކުރާނެ

މިލާންގެ ޓެކްނިކަލް ޑިރެކްޓަރެއްގެ މަގާމުގައި އިތުރު ދެ އަހަރު މަޑުކުރަން، އެ ކްލަބްގެ ކާމިޔާބު ކެޕްޓަނެއް ކަމަށްވާ ޕައޮލޯ މަލްޑިނީ ނިންމައިފި އެވެ. މަލްޑިނީގެ އިތުރުން އޭނާއާ އެކު މަސައްކަތް ކުރަމުން އަންނަ މިލާންގެ ސްޕޯޓިން ޑިރެކްޓަރު، ފްރެޑެރިކް މައްސާރާ ވެސް ވަނީ އިތުރު ދެ އަހަރަށް ކޮންޓްރެކްޓް އާ ކޮށްފަ އެވެ.

ދުނިޔޭގެ ފުޓްބޯޅައިގައި މިހާތަނަށް ފެނުނު އެންމެ ކުޅަދާނަ އެއް ޑިފެންޑަރު، މަލްޑިނީ ވަނީ ޔޫތު ކެރިއަރުން ފެށިގެން ސީނިއާ ކެރިއަރު އެއްކޮށް، ޖުމްލަ 25 ވަރަކަަށް އަހަރު މިލާނުގައި ހޭދަކުރިއިރު، އެ ޓީމަށް 902 މެޗު ކުޅެދީފަ އެވެ. މިލާނާ އެކު އިޓަލީ ޗެމްޕިއަންކަން ހަތް ފަހަރު އަދި ޔޫރަޕުގެ ޗެމްޕިއަންކަން ފަސް ފަހަރު ހޯދި އެވެ.

މަލްޑިނީ ވަނީ އިޓަލީ ގައުމީ ޓީމަށް 1988-2002 އަށް 126 މެޗު ކުޅެދީފަ އެވެ.

މަލްޑިނީ ނުވަ އަހަރަށް ފަހު މިލާނަށް އެނބުރި އައީ 2018 ވަނަ އަހަރު އެވެ. އެއީ އެ ކްލަބް ޒަމާނީ މޮޑެލަކަށް ހިންގަން ގެނެވުނު ބަދަލުގެ ތެރެއިން އުފެއްދި، ސްޕޯޓިން ސްޓްރެޓެޖީ އެންޑް ޑިވެލޮޕްމަންޓް ޑިޕާޓްމަންޓްގެ އިސް ފަރާތެއްގެ ގޮތުން ޑިރެކްޓަރުގެ މަގާމަށެވެ.

މިލާނުން މިދިޔަ ފަސް ވަރަކަށް އަހަރު ތެރޭ ފިޔަވަޅަކަށް ފަހު ފިޔަވަޅެއް ކުރިއަށް އެޅުމުގައި މަލްޑިނީ އަށް ބޮޑު ކްރެޑިޓެއް ހައްގުވާ ކަމަށް އިޓަލީގެ ފުޓްބޯޅަ ތަޖުރިބާކާރުން ގަބޫލުކުރެ އެވެ.

އިޓަލީގެ ކްލަބްތަކަށް ރަސްމީކޮށް ޓްރާންސްފާ މާކެޓް އިއްޔެ ހުޅުވިއިރު، މަލްޑިނީ އެ ކްލަބްގައި ދެމިހުންނާނެކަން އެނގިގެންދިއުމަކީ އެ ޓީމުގެ ސަޕޯޓަރުންނަށް އުފާވެރި ހަބަރެކެވެ. އާ ކުޅުންތެރިން ގެންނަން މިލާނުން ކުރަމުން އަންނަ މަސައްކަތް ފަށާނީ، ލިވަޕޫލުން ހިލޭ ޓްރާންސްފާއެއްގައި އެ ޓީމަށް ބަދަލުވާން ނިންމާފައިވާ ޑިވޮކް އޮރީގީއާ އެކު އެވެ. މިދިޔަ ސީޒަނުގައި މިލާނަށް ލޯން އެއްބަސްވުމެއްގެ ދަށުން ކުޅުނު އަލެސަންދްރޯ ފްލޮރެންޒީ ވަނީ އެ ކްލަބާ އެކު ހަދާފައިވާ އެއްބަސްވުން ދާއިމީ ކޮށްފަ އެވެ.