އިންޑިއާގެ 40 މިލިއަން ޑޮލަރުގެ ލޯނަކުން ސްރީލަންކާގެ އެންމެ އުތުރުގައި ކަންކަސަންތުރައިގެ ބަނދަރު ތަރައްގީ ކުރަން ނިންމާފައިވާ ކަމަށް ޕޯޓްސް، ޝިޕިން އެންޑް އޭވިއޭޝަން މިނިސްޓަރު ނިރްމަލް ސިރިޕަލާ ޑެ ސިލްވާ ވިދާޅުވެއްޖެ އެވެ.
ޑެ ސިލްވާ ޑެއިލީ މިރާ ނޫހަށް ވިދާޅުވީ ސްރީ ލަންކާ ޕޯޓްސް އޮތޯރިޓީ (އެސްއެލްޕީއޭ) އިން އެ މަޝްރޫއު ފެށުމަށް ބޭނުންވާ މަސައްކަތްތައް ނިންމާފައިވާ ކަމަށާއި އިންޑިއާގެ އެގްޒިމް ބޭންކުން ދިން 40 މިލިއަަން ޑޮލަަރު ލޯނު ބޭނުންކޮށްގެން މަޝްރޫއު ފަށާނެ ކަމަށެވެ.
"އަަޅުގަނޑުމެން ކުރަން ޖެހޭ ބައެއް މަސައްކަތްތައް ހުރި. އެ ކަންކަަން ނިންމައިފިން. އިންޑިއާއިން ވަނީ ކޮންސަލްޓެންޓެއް ހަމަޖައްސާފައި. އެ ރިޕޯޓު ލިބުނުހާ އަވަހަކަށް، ލަންކާގެ އެންމެ އުތުރުގައި ތަރައްގީ ކުރާ ބަނދަރުގެ މަސައްކަތް ފެށޭނެ. އެ ބަނދަރު ތަރައްގީ ކުރާނީ ބޮޑެތި މަނަވަރުތަކަށް ކައިރިވެވޭ ގޮތަށް،" އޭނާ ވިދާޅުވި އެވެ.
ފިޝެރީޒް މިނިސްޓަރު ޑަގްލަސް ދޭވްއަނަންދަ ދާދި ފަހުން ވިދާޅުވީ އިންޑިއާ އާއި އުތުރު ސްރީ ލަންކާއާ ދެމެދު މުދާ އުފުލުމުގެ މަސައްކަތް ވަރަށް އަވަހަށް ފަށާނެ ކަމަށެވެ.
އިންޑިއާގެ އެހީއާ އެކު ކަންކަސަންތުރައި ބަނދަރު ހެދުމަށް ރާވާފައި އޮންނަތާ އަހަރުތަކެއް ވެއްޖެ އެވެ. އެ މަޝްރޫއަށް ލޯނު ފޯރުކޮށްދޭން އިންޑިއާއިން އެންމެ ފުރަތަމަ ހުށަހެޅީ މޭ، 2009 ވަނަ އަހަރު ލަންކާގެ ދާހިލީ ހަނގުރާމަ ނިމުމުންނެވެ.
