ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެންބަރު އަލްހާން ފަހުމީ އާއި އޭނާގެ އާއިލާ އިތުރު ތިން މީހަކު ބޭންކް އޮފް މޯލްޑިވްސް (ބީއެމްއެލް) އަށް ދައްކަން ޖެހޭ ކަމަށް ބޭންކުން ބުނާ 6.4 މިލިއަން ރުފިޔާ ނުދައްކާ އޮތުމުން އެ ފައިސާ ދައްކަން ސިވިލް ކޯޓުން އިއްޔެ ހުކުމްކޮށްފި އެވެ.
އަލްހާންގެ އިތުރުން އަޒްހާން ފަހުމީ، ހާމިދު ފަހުމީ، އަދި މުހައްމަދު ފަހުމީގެ މައްޗަށް ދައުވާކޮށް ބޭންކުން ކޯޓަށް ހުށަހަޅާފައިވާ މައްސަލާގައި އެދިފައިވަނީ އެ ފައިސާ ދެއްކުމަށް އެ މީހުންގެ މައްޗަށް ކޯޓުން އަމުރުކޮށްދިނުމަށެވެ.
އަދި އެ ފައިސާ ނުދައްކާ ނަމަ ލޯނާ ގުޅިގެން ރަހުނުކޮށްފައިވާ "މ.ފިނިވާގެ 2 ނަންބަރު ބައި" ކިޔާ އަމިއްލަ ގޯއްޗާއި އެ ގޯތީގައިވާ އެންމެހާ އިމާރާތްތައް ބޭންކަށް ރަހުނު ކުރެވިފައިވާ ކަމަށް ކަނޑައަޅައި ދިނުމަށެވެ.
ބޭންކްއާ އެކު ވެފައިވާ ރަހުނު އެއްބަސްވުމުގައި ހާމިދު ފަހުމީ އާއި މުހައްމަދު ފަހުމީ ސޮއިކޮށްފައިވަނީ ރަހުނު ބަހައްޓާ ފަރާތުގެ ހައިސިއްޔަތުންނެވެ. އަލްހާން ފަހުމީ އާއި އަޒްހާން ފަހުމީ ސޮއިކުރީ ލޯނު ނަގާ ފަރާތެއްގެ ހައިސިއްޔަތުންނެވެ.
ސިވިލް ކޯޓުން ކުރި ހުކުމުގައި ބުނާ ގޮތުން، ޖުމުލަ 6،403،600 ރުފިޔާގެ ލޯނުން ބާކީ އަދިވެސް 6،396،099.44 ރުފިޔާ ނުދައްކާ އެބަ އޮތެވެ. އަދި މައްސަލަ ކުރިއަށް ގެންދަން ދައުވާ ރައްދުވާ ހަތަރު މީހުން ވެސް އެއްބާރުލުން ނުދޭ ކަމަށް ވެސް ކޯޓު ހުކުމުގައިވެ އެވެ.
އެހެންވުމާއެކު ލޯނުގައި ނުދައްކާ ބާކީ އޮތް ފައިސާ އާއި ޖޫރިމަނާއާއެކު އިތުރުވަމުންދާ ފައިސާ ވެސް ހިމެނޭ ގޮތަށް ކުރިއަށް އޮތް ތިން މަސް ދުވަހުގެ ތެރޭގައި ދެއްކުމަށް ހުކުމްކޮށްފައިވެ އެވެ. އަދި ސެޕްޓެމްބަރު 29 ގެ ނިޔަލަށް އެ ފައިސާ ދައްކާ ހަލާސްނުކޮށްފިނަމަ އެއްބަސްވުމުގައި ރަހުނު ކުރެވެން އޮތް މުދާ ރަހުނުގެ ގޮތުގައި ނެގޭނެ ކަމަށް ހުކުމުގައިވެ އެވެ.
