ގައުމީ ވޮލީބޯޅަ ލީގުގައި މިރޭ ކުޅުނު މެޗުން ކްލަބް ވެމްކޯ އިން ފަސް ސެޓު ކުޅެގެން ޕޮލިސް ކްލަބް އަތުން މޮޅުވުމާ އެކު، ބާކީ މެޗެއް އޮއްވައި، ސްޕޯޓްސް ކްލަބް ސިޓީ އަށް ލީގު ޔަގީންވެއްޖެ އެވެ.
މިއަދު ހަވީރު ސިފައިން އަތުން ސީދާ ތިން ސެޓުން ސިޓީ މޮޅުވުމުން، ދެން، ސިޓީ އަށް ޗެމްޕިއަންކަން ނުލިބުމުގެ ފުރުސަތެއް އޮތީ، ވެމްކޯ އިން ސެޓެއް ނުގެއްލި ބާކީ ހުރިހާ މެޗަކުން މޮޅުވެގެންނެވެ. ވެމްކޯ އަށް މިރޭ ޕޮލިސް ބަލިކުރެވުނީ ފަސް ސެޓު ކުޅެގެން ކަމަށްވާތީ، ކުޅި ބަލަން އޮތް ސިޓީ އަށް ވަނީ ލީގު ޔަގީންވެފަ އެވެ. އެއީ ސިފައިންނަށް ފަހު ދެ މެޗުން މޮޅުވެގެން ސިޓީއާ ޕޮއިންޓުގެ ގޮތުން އެއްވަރުވި ނަމަވެސް ދެ ޓީމު ބައްދަލުކުރި މެޗުން ސިޓީ މޮޅުވެފައިވާތީ އެވެ.
ސިޓީ އަށް މި ވަނީ ފުރަތަމަ ފަަހަރަށް އެސޯސިއޭޝަން ކަޕާއި ލީގު ޗެމްޕިއަންކަން ލިބިފަ އެވެ. މިއީ 2009 ވަނަ އަހަރު ވުޖޫދުވި ސިޓީ އަށް ވޮލީގައި އެންމެ ކާމިޔާބު އަހަރެވެ.
މި ފަހަރުގެ މުބާރާތުގެ މެޗެއްގެ ތެރެއިން ސިޓީގެ ކުޅުންތެރިން.--- ފޮޓޯ: އިމޭޖަސް.އެމްވީ
ލީގުގެ އެއް ވަނައިގައި ސިޓީ އޮތީ ކުޅުނު ހަތަރު މެޗުން ސެޓެއް ވެސް ނުގެއްލި 12 ޕޮއިންޓް ހަމަކޮށްގެންނެވެ. ސިފައިން ދެ ވަނައިގައި އޮތީ ތިން މެޗުން ހަ ޕޮއިންޓާ އެކު އެވެ. ވެމްކޯ ތިން ވަނައިގައި އޮތީ ތިން މެޗުން ފަސް ޕޮއިންޓާ އެކު އެވެ. ހަތަރެއްގައި އޮތް ޕޮލިހަށް ވަނީ ތިން މެޗުން ހަތަރު ޕޮއިންޓް ލިބިފަ އެވެ. ގުޑީސް ސްޕޯޓްސް ކްލަބާއި އޮއްފު އެފްސީ އަށް އަދި ޕޮއިންޓެއް ނުލިބެ އެވެ. ގުޑީސް ދެ މެޗު ކުޅުނުއިރު، އޮއްފު ވަނީ ތިން މެޗު ކުޅެފަ އެވެ.
ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުތަކުގެ ސެޓުތައް ދިޔައީ 25-19، 25-17، 23-25، 20-25 އަދި 15-12 އިންނެވެ.
ވެމްކޯގެ ސެޓަރު ރަންޖީތު ސިންގް ދާން ޖެހުމުން، އެ ޓީމުން ގެނައި އިންޑިއާގެ އާ ސެޓަރު، ވިޕުލް ކުމާރުގެ ރަނގަޅު ބޯޅަތަކާ އެކު ފުރަތަމަ ދެ ސެޓު ޕޮލިހަށް މާ ބޮޑު ފުރުސަތެއް ނުދީ ވެމްކޯ އިން ރަނގަޅު ކުޅުމެއް ދެއްކި އެވެ. ވެމްކޯގެ ސެންޓަ ބްލޮކަރު އަޝްވަލް ރާއީ އާއި ކެޕްޓަން، އިސްމާއިލް ސާޖިދު (ކުޑަކާއްޓެ)ގެ ބޭނުންހިފައި، މާބޮޑު އުނދަގޫކަމެއް ނެތި، ފުރަތަމަ ދެ ސެޓު ގެންދިޔަ އެވެ. ހާއްސަކޮށް، ދެ ވަނަ ސެޓުގައި ވެމްކޯ އިން ބޮޑު ބައިގައި އޮތީ ބޮޑު ލީޑެއްގަ އެވެ. ވެމްކޯ އިން ފުރަތަމަ ދެ ސެޓު ގެންދިޔައީ، 25-19 އާއި 25-17 އިންނެވެ.
އެކަމަކު، ތިން ވަނަ ސެޓުގެ މެދަކާ ހަމައިން މެޗުގެ އޮއެވަރު ބަދަލުވާން ފެށި އެވެ. ޕޮލިހުގެ ސެޓަރު، މުއްތުސާމީ އަޕަވޫގެ ކުޅުން ރަނގަޅުވާން ފެށުމުން ސެޓުގެ މެދަކާ ހަމައިން ޕޮލިހުގެ އަނޫ ޖޭމްސް އާއި އަކިން އައްމާލް އަދި މާއިޝް އަހުމަދުގެ ރަނގަޅު ކުުޅުން ފެންނަން ފެށި އެވެ. ނަތީޖާ އަކަށްވީ ސެޓުގެ ފަހު ކޮޅުގައި 22-22 އާއި 23-23 އިން އެއްވަރުވެފައި އޮތް ނަމަވެސް ފަހު ވަގުތު ތަފާތު ދައްކައި، ޕޮލިހުން ސެޓު، 23-25 އިން ގެންގޮސް މެޗުގައި އުންްމީދެއް ހޯދީ އެވެ.
ޕޮލިހުގެ އަނޫ ޖޭމްސް (ވ) އަތްމަތިން ވެމްކޯގެ ކުޑަކާއްޓެ ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ
ސެޓެއް ލިބުމާ އެކު ޕޮލިހުގެ ކުޅުމުން ކޮންފިޑެންސް ފެނުނެވެ. ހަތަރު ވަަނަ ސެޓުގައި ވެމްކޯގެ އެޓޭކްތައް ރިސީވް ކުރުމާއި ޑިފެންސް ބޯޅަތަކުގައި ޕޮލިހުގެ ލިބަރޯ، މުހައްމަދު ނައީމް (ނައިންޓެ)ގެ ރަނގަޅު ކުޅުން ފެނުނުއިރު، ޕޮލިހުން މި ސެޓުގައި ރަނގަޅު ލީޑެއްގައި ވެސް އޮތެވެ. އެ ފޯމުގައި ކުޅެލައި، 20-25 އިން މި ސެޓު ގެންގޮސް، ނަތީޖާ ނެރޭ ސެޓާ ހަމައަށް މެޗު ގެންދިޔަ އެވެ.
ފަސް ވަނަ ސެޓުގައި، ވެމްކޯ ވަނީ އަލުން ކުރީގެ ހިތްވަރު ނެރުމުގެ އިތުރުން އެ ޓީމުގައި ތިބި ތަޖުރިބާކާރު ކުޅުންތެރިން ކަމަށްވާ އަޝްފާގު އާދަމް (އައްކަޅޭ) އާއި ކުޑަކާއްޓެގެ އިތުރުން ގައުމީ ޓީމުގައި ރަނގަޅު ކުރިއެރުމެއް ހޯދަމުން އަންނަ އާދަމް ފައިރޫޒްގެ ރަނގަޅު ކުޅުން ދައްކައިފަ އެވެ. މި ސެޓުގައި 10-10 އިން ދެ ޓީމު އެއްވަރުވި ނަމަވެސް ހަގީގަތުގައި ސެޓުގެ ކޮންޓްރޯލް ނަގައިގެން ކުޅެމުން ދިޔައީ ވެމްކޯ އެވެ. އެ ޓީމުން 15-12 އިން ސެޓު ގެންގޮސް މެޗުން މޮޅުވީ އެވެ.
ގައުމީ ލީގު ނިމުމަށްފަހު މި އަހަރުގެ ގައުމީ މުބާރާތުގެ ކުޅުން ފަށާނީ އަންނަ ހަފްތާގެ ހޯމަ ދުވަހުގެ ހަވީރެވެ. ގައުމީ މުބާރާތަށް ކޮލިފައިވާނީ ގައުމީ ލީގުގެ ގަދަ ހަތަރު ޓީމެވެ.
ލީގުގައި މާދަމާ ހަވީރު ކުޅޭ މެޗުގައި ސިފައިން ކުޅޭނީ ގުޑީސް ސްޕޯޓްސް ކްލަބާ އެވެ. މާދަމާރޭ ކުޅޭ މެޗުގައި ޕޮލިހުން ނުކުންނާނީ އޮއްފުއާ ދެކޮޅަށެވެ.
