ރަޝިއާ އާއި ޔޫކްރެއިންއާ ދެމެދު ގައިދީން ބަދަލު ކުރުމަށް ވި އެއްބަސްވުމެއްގެ ދަށުން ޔޫކްރެއިންގެ 144 ސިފައިންގެ މީހުން މިނިވަންކޮށްފި އެވެ.
އޭގެ ތެރޭގައި ދެކުނު މަރިޔުޕޯލް ސިޓީގެ ދިފާއުގައި ހަނގުރާމަ ކުރަނިކޮށް ހައްޔަރު ކުރި ގިނަ އަދަދެއްގެ މީހުން ހިމެނޭ ކަމަށް ޔޫކްރެއިންގެ އޮފިޝަަލުން ބުންޏެވެ.
"މިއީ ރަޝިއާއިން ހަނގުރާމަ ފެށި ފަހުން މިހާ ގިނަ އަދަދެއްގެ ގައިދީން ބަދަލު ކުރި ފުރަތަމަ ފަހަރު. މިނިވަަން ކުރި 144 މީހުންގެ ތެރެއިން 95 މީހުންނަކީ މަރިޔުޕޯލުން ހައްޔަރު ކުރި މީހުން،" ޔޫކްރެއިންގެ ޖާސޫސީ އިދާރާއިން ބުންޏެވެ.
ގައިދީން ބަދަލު ކުރީ ކޮން ވަގުތަކު ކޮން ތަނެއްގައި ކަމެއް ހާމައެއް ނުކުރެ އެވެ. އަދި ޔޫކްރެއިންގެ ގައިދީން މިނިވަން ކުރުމުން، ބަދަލުގައި މިނިވަން ކުރީ ރަޝިއާގެ ކިހާ އަދަދެއްގެ ގަައިދީން ކަމެއް ވެސް ނުބުނެ އެވެ.
ފެބްރުއަރީ 24 ވަަނަ ދުވަހު ހަނގުރާމަ ފެށި ފަހުން، ވަރަށް ގިނަ ފަހަރު ރަޝިއާ އާއި ޔޫކްރެއިނުން ގައިދީން ބަދަލުކޮށްފައިވެ އެވެ. އެގޮތުން މިދިޔަ އަންގާރަ ދުވަަހު ވެސް ޔޫކްރެއިންގެ 17 މީހުން މިނިވަން ކުރި އެވެ.
