ބީއެމްއެލް ނަމުގައި ގުޅައިގެން ބިދޭސީއަކު އަތުން ފައިސާ ޓްރާންސްފާ ކުރުމަށް ފަހު، އެ ފައިސާއިން ބައެއް ބޭނުން ކުރި ކަމަށް އެއްބަސްވުމުން, ގާތްގަނޑަކަށް އެ ފައިސާއަށްވާ އަދަދަކުން ޖޫރިމަނާ ކުރުމަށާއި މުޖުތަމައަށް ހިދުމަތް ކުރުމުގެ އަދަބު ކަނޑައަޅަން ކްރިމިނަލް ކޯޓުން ނިންމައިފި އެވެ.
ކްރިމިނަލް ކޯޓުގެ އަލީ އާދަމް ބެއްލެވި އެ މައްސަލާގައި މިދިޔަ އާދީއްތަ ދުވަހު ހުކުމްކުރީ ޏ. ފުވައްމުލައް، ދަނޑިމަގު، ސަންޝައިން، ނިޝާދު އަހުމަދުގެ މައްޗަށެވެ.
ދައުލަތުން ކުރާ ދައުވާގައި ބުނާ ގޮތުން ކާކު ކަން ނޭނގޭ މީހަކު ޒިމްބާބްވޭ މީހެއް ކަމަށްވާ ޓަވާނޯ ގުމްބޫއަށް މާޗު 5، 2018 ގައި ބީއެމްއެލް ނަމުގައި ގުޅި އެވެ. އަދި ބީއެމްއެލްގައި ނިޝާދުގެ ނަމުގައި ހުޅުވާފައިވާ އެކައުންޓަށް 7191 އެމެރިކާ ޑޮލަރު (110,381 ދިވެހި ރުފިޔާ) ޓްރާންސްފާ ކުރަން އެދުމުން ޓަވާނޯ ގުމްބޫ އެކަން ކޮށްދިން ކަމަށެވެ.
ބަޔަކު އޮޅުވާލައިގެން ޓަވާނޯ ގުމްބޫ ލައްވައި ޓްރާންސްފާ ކުރުވި އެ ފައިސާއަކީ ނިޝާދުގެ ފައިސާ ނޫން ކަން އެނގި ހުރެ އޭގެ ތެރެއިން 74،700 ރުފިޔާ ބޭނުން ކުރި ކަމަށް ދައުލަތުން ކޯޓަށް ހުށަހަޅާފައިވާ ދައުވާގައި ބަޔާންކޮށްފައިވެ އެވެ.
އެ މައްސަލާގައި ބޭއްވި އިބްތިދާއީ އަޑުއެހުމުގައި ދައުލަތުން އިއްވި އެހެން މީހެއްގެ މުދަލެއްގެ މައްޗަށް ހުއްދަ ނޫން ގޮތެއްގައި ބާރު ހިންގުމުގެ ކުށުގެ ދައުވާއަށް ނިޝާދު ވަނީ އިއުތިރާފް ވެފަ އެވެ. އެހެންވެ މައްސަލަ ނިންމީ އަވަސް ނިޔާގެ ދަށުންނެވެ.
ގާނޫނުގައި މި ކުށަށް ކަނޑައަޅާފައިވާ އަސާސީ އަދަބަކީ އެއް އަހަރާއި ހަތް މަހާއި ހަތް ދުވަހުގެ ޖަލު ހުކުމެކެވެ. އެހެން ނަމަވެސް އަދަބު ލުއިކޮށްދޭން ނިންމަވައި، 72،000 ރުފިޔާއިން ޖޫރިމަނާ ކުރުމަށާއި 12 ދުވަހަށް ޖަލަށް ލުމަށާއި 68.5 ގަޑިއިރަށް މުޖުތަމައަށް ހިދުމަތްކުރަން ޖެހޭ ގޮތަށް ހުކުމް އިއްވެވި އެވެ.
އަދަބު ލުއިކޮށްދޭން ނިންމި ސަބަބު
އަދަބާ ގުޅޭ ގޮތުން ވާހަކަ ދައްކަން ނިޝާދަށް ދެވަނަ ފަހަރަށް ފުރުސަތު ދިނުމުން އޭނާ ވަނީ އޭނާގެ ކުށުގެ ރެކޯޑު ވެސް ސާފުވުމުން އަދިވެސް އޭނާގެ އަދަބު ލުއިކޮށް، ވީހާވެސް ލުއި އަދަބެއް ކަނޑައެޅުމަށް އެދިފަ އެވެ.
ނިޝާދު ބުނެފައިވާ ގޮތުގައި އޭނާ 2018 ވަނަ އަހަރުގެ ތެރޭގައި އެ ކުށްކުރީ މަސްތުގެ ހާލަތުގައި ހުރެގެނެވެ. އަދި އޭގެ ފަހުން އޭނާގެ މަންމަ މަރުވެ، މަންމަ މަރުވި ފަހުން އޭނާ އެ ކަންކަމުން ދުރުވެ ނަފްސު އިސްލާހުވެފައިވާ ކަމަށް އޭނާ ކޯޓުގައި ބުނެފައިވެ އެވެ.
ނިޝާދު މިހާރު ވަޒީފާއެއް ވެސް އަދާކުރެ އެވެ. އޭނާ ކޯޓަށް ހުށަހަޅާފައިވާ، އޭނާ މަސައްކަތް ކުރާ ކުންފުނީގެ ލިޔުންތަކުން ދައްކާ ގޮތުގައި އޭނާއަށް މަހަކު 15،000ރ.ގެ މުސާރައެއް ލިބެ އެވެ. އެހެންވެ ޖޫރިމަނާގެ އަދަބަކަށް ބަދަލުކޮށްދޭން އެދުނެވެ.
އެ ކަންކަމަށް ރިއާޔަތް ކުރެއްވުމަށް ފަހު ގާޒީ ނިންމެވީ އެއް އަހަރު ދުވަހަށް ޖަލަށް ލުމުގެ އަދަބު ޖޫރިމަނާގެ އަދަބަށް ބަދަލު ކުރެއްވުމަށެވެ. އަދި އަށް މަސް ދުވަހުގެ ތެރޭގައި މީރާއަށް 72،000ރ. ޖޫރިމަނާ ދެއްކުމަށް ހުކުމް އިއްވެވި އެވެ.
މީގެ އިތުރަށް ޖަލު ހުކުމުގައި ބާކީ އޮތް 12 ދުވަހު ޖަލުގައި ބަންދު ކުރުމަށާއި، 68.5 ގަޑިއިރަށް މުޖުތަމައަށް ހިދުމަތް ކުރަން ޖެހޭ ގޮތަށް ކަނޑައެޅީ އެވެ.
