ޔޫރަޕްގައި ކެންސަރު ކޭސްތަކުގެ 10 ޕަސެންޓް ގުޅެނީ ތަގައްޔަރުވުމުގެ މައްސަލައާ ކަމަށް ޔޫރަޕިއަން އެންވާރަމަންޓް އެޖެންސީން ބުނެފި އެވެ.
އޭގެ ތެރެއިން ގިނަ ކޭސްތަކަކީ ޕްރިވެންޓް ކުރެވޭނެ ކޭސްތައް ކަމަށް އެ އެޖެންސީން ބުންޏެވެ.
"ތަގައްޔަރުވެފައިވާ ވަޔާއި، ކެންސަރު ޖެހޭ ފަދަ ކެމިކަލާއި، ޔޫވީ ރޭޑިއޭޝަނާއި، ސެކަންޑް ހޭންޑް ދުމަށް ހުށަހެޅުމަކީ ކެންސަަރު ކޭސްތަކުގެ 10 ޕަސެންޓަށް މަގުފަހިވާ ސަބަބުތައް،" އެ އެޖެންސީގެ ބަޔާނެއްގައި ބުންޏެވެ.
އެ އެޖެންސީގެ އޮފިޝަލް ގެރާޑޯ ސަންޗޭޒް ވިދާޅުވީ ތިމާވެށި އަދި އުޅޭ މާހައުލުގެ ސަބަބުން ކެންސަރު ޖެހުމަށް އޮތް ނުރައްކާ ކުޑަ ކުރެވިދާނެ ކަމަށެވެ.
ޔޫރަޕިއަން ޔޫނިއަަން (އީޔޫ) ގައި ކޮންމެ އަހަރަކު ވެސް 2.7 މިލިއަން މީހުންނަށް ކެންސަރު ޖެހި، 1.3 މިލިއަން މީހުން އެ ބަލީގައި މަރުވެ އެވެ.
ޔޫރަޕްގައި އުޅެނީ ދުނިޔޭގެ ޖުމްލަ އާބާދީގެ 10 ޕަސެންޓަށް ވުރެ މަދު އަދަދެއްގެ ބަޔެކެވެ. ނަމަވެސް އަލަށް ފެންނަ ކެންސަރު ކޭސްތަކު ތިންބައިކޮށްފައި އެއް ބައި، އަދި މަރުތަކުގެ ފަސް ބައިކޮށްފައި އެއްބަައި ރިޕޯޓު ކުރަނީ ޔޫރަޕުންނެވެ.
