އިންޑިއާގެ ބޮޑު ވަޒީރު ނަރެންދްރަަ މޯދީއަަށް ވަރަށް ބޮޑަށް ފާޑުކިޔާ އިންޑިއާގެ ނޫސްވެރިއަކު ހައްޔަރުކޮށްފި އެވެ.
މުހައްމަދު ޒުބައިރަކީ ފެކްޓް ޗެކިން ނުވަތަ މައުލޫމާތުގެ ތެދުކަން ކަށަވަަރު ކުރާ ވެބްސައިޓް އޯލްޓްނިއުސްގެ ކޯފައުންޑަރެވެ. އޭނާއަށް ތުހުމަތު ކުރަނީ ޓްވިޓާގައި ދީނީ ގަބޫލުކުރުންތަކަށް މަލާމާތް ކުރި ކަމަށެވެ.
އިދިކޮޅު ލީޑަރުންނާއި ނޫސްވެރިން ވަނީ އޭނާ ހައްޔަރު ކުރުމުން ފާޑުކިޔައިފަ އެވެ. އޭނާ ހައްޔަރު ކުރުމަކީ ހިންދޫންގެ ސަރުކާރުން ހިޔާލު ފާޅު ކުރުމުގެ މިނިވަަންކަމަށް ހުރަސް އެޅުމަށް އެޅި އިތުރު ފިޔަވަޅެއްގެ ގޮތުގައި ދަނީ ސިފަކުރަމުންނެވެ.
ވެރިކަން ކުރާ ބަރަތިޔަ ޖަނަތަ ޕާޓީ (ބީޖޭޕީ) ގެ ތަރުޖަމާނަކު ދާދި ފަހުން ޓީވީ ޗެނަލެއްގަައި ކީރިތި ރަސޫލާއަށް ފުރައްސާރަ ކުރި މައްސަަލައިގައި ޒުބައިރް ވަރަށް ބޮޑަށް އެކްޓިވްވި އެވެ.
އެ މައްސަލައިގައި އޭނާ ކުރި ޓްވީޓަށް ބޮޑު ސަމާލުކަމެއް ލިބި، ގިނަ މުސްލިމް ގައުމުތަކުން އިންޑިއާއާ މެދު ހިތްހަމަނުޖެހުން ފާޅުކުރި އެވެ.
އޭގެ ފަހުން ހިންދޫންގެ ގިނަ ބަޔަކު ދަނީ ކުރިން ޒުބައިރް ކޮށްފައިވާ ބައެއް ޓްވީޓުތައް ދެނެގަނެ، ހިންދޫ ދީނަށް ފުރައްސާރަކޮށްފައިވާ ކަމަށް ތުހުމަތުކޮށް، އޭނާ ހައްޔަރު ކުރުމަށް ގޮވަން ފަށާފަ އެވެ.
އޯލްޓްނިއުސްގެ ކޯފައުންޑަރު ޕްރަތީކް ސިންހާ ބުނީ ޒުބައިރްއާ އެކު އޭނާ ފުލުސް އޮފީހަށް ދިޔަ ކަމަށާއި ހައްޔަރު ކުރީ ކޮން ޝަކުވާއަކާ ގުޅިގެންކަން ބުނެ ދިނުމަށް ފުލުހުން އެއްވެސް ލިޔުމެއް ނުދަައްކާ ކަމަށެވެ.
އަދި ފުލުސް އޮފީހަށް ހާޒިރު ކުރީ ހައްޔަރު ކުރަންކަން ވެސް އަންގާފައެއް ނުވެ އެވެ. ނޫސްވެރިންނާއި އެކްޓިވިސްޓުން ދަނީ ވަގުތުން އޭނާ މިނިވަން ކުރުމަށް ޑިމާންޑް ކުރަމުންނެވެ.
ހޯމަ ދުވަހު ޒުބައިރް ހައްޔަރު ކުރި އިރު، މިދިޔަ ހޮނިހިރު ދުވަހު ވަނީ މޯދީއަށް ފާޑުކިޔާ އެކްޓިވިސްޓަކު ވެސް ހައްޔަރުކޮށްފަ އެވެ.
