ޔޫކްރެއިންގެ މެދުތެރޭގައި އޮންނަ ކްރެމެންޗުކް ސިޓީގެ ތޮއްޖެހިފައިވާ ޝޮޕިން ސެންޓަރަކަށް ރަޝިއާއިން ދިން މިސަައިލް ހަމަލާއެއްގައި 10 މީހުން މަރުވެ، 40 މީހުންނަށް އަނިޔާވެއްޖެ އެވެ.
ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަނީ ޝޮޕިން ސެންޓަރުގެ ތެރޭގައި ވަރަށް ބޮޑަށް އަލިފާން ރޯވެފައިވާ އިރު، އަލިފާން ނިއްވުމުގެ މަސައްކަތް ކުރިއަށްދާ މަންޒަރެވެ.
ޔޫކްރެއިންގެ ރައީސް ވޮލޮޑިމިރް ޒެލެންސްކީ ވިދާޅުވީ ހަމަލާ ދިން ވަގުތު ޝޮޕިން ސެންޓަރުގެ ތެރޭގައި 1،000 އަށް ވުރެ ގިނަ މީހުން އުޅުނު ކަމަށާއި "މަރުވި މީހުން އަދަދު އަންދާޒާ ވެސް ނުކުރެވޭ" ކަމަށެވެ.
ޔޫކްރެއިން ރައީސް އޮފީހުގެ ޑެޕިއުޓީ ހެޑް ކިރީލޯ ޓިމޮޝެންކޯ ވިދާޅުވީ މީހުން ސަލާާމަތް ކުރުމުގެ މަސައްކަތް ކުރިއަށްދާ ކަމަށާާއި ނުވަ މީހެއްގެ ހާލު ސީރިއަސް ކަމަށެވެ.
ޕޮލްޓާވާ ސަރަހައްދުގެ ގަވަރުނަރު ޑިިމިޓްރީ ލުނިން ވިދާޅުވީ މިހާތަނަށް މަރުވީ 10 މީހުން ކަމަށާއި އެ އަދަދު އިތުރުވަމުން ދާނެ ކަމަށް ލަފާ ކުރެވޭ ކަަމަށެވެ.
އެ ހަމަލާއާ ގުޅިގެން ރަޝިއާއިން އަަދި ވަކި އެއްޗެއް ނުބުނެ އެވެ. ނަމަވެސް މީގެ ކުރިން އެ ގައުމުން ތަކުރާރުކޮށް ބުނީ އާއްމު ރައްޔިތުންނަށް ހަމަލާ އަމާޒު ނުކުރާ ކަމަށެވެ.
