ގަތަރުގެ ކުރީގެ ބޮޑު ވަޒީރަކު ފޮނުއްވި އެއް މިލިއަން ޔޫރޯގެ ނަގުދު ފައިސާ ހުރި ފޮއްޓެއް އިނގިރޭސި ވަލީ އަހުދު އަމީރު ޗާލްސް ގަބޫލުކުރެއްވި ކަމަށް ސަންޑޭ ޓައިމްސް ނޫހުން ރިޕޯޓުކޮށްފި އެވެ.
އެ ނޫހުން ބުނީ ނަގުދު ފައިސާގެ އެހީގެ ގޮތުގައި ޝެއިހް ހަމަދް ބިން ޖާސިމް ތިން ފަހަރު ފޮށި ފޮނުއްވި ކަމަށެވެ. އެގޮތުން ފޮނުއްވި ފައިސާގެ ޖުމްލަ ތިން މިލިއަން ޔޫރޯއަށް އަރަ އެވެ.
އިނގިރޭސި ޕްރިންސް އޮފް ވޭލްސްގެ ފަރާތުން ކްލެރެންސް ހައުސްގެ އޮފިޝަލުން ވިދާޅުވީ ހުރިހާ އެހީއެއް ވެސް އުސޫލާ އެއް ގޮތަށް ޕްރޮސެސްކޮށް، ޗާލްސްގެ ޗެރިޓީ ޖަމިއްޔާއަކަށް ފޮނުވުނު ކަމަށެވެ.
ގަތަރުގެ ކުރީގެ ބޮޑު ވަޒީރު ފޮނުއްވި ނަގުދު ފައިސާގެ އެހީއަކީ ގާނޫނުން މަނާ ކަމެއްގެ ގޮތުގައި ފާހަގަނުވާ ކަމަށް ބީބީސީއިން ބުނެ އެވެ.
އެ ފައިސާ ފޮނުވީ ޕްރިންސް އޮފް ވޭލްސް ޗެރިޓެބަލް ފަންޑަށް ކަމަށް ކްލެރެންސް ހައުސް އޮފިޝަލުން ވިދާޅުވި އެވެ. އެ ފަންޑުން ބުނީ އެހީ ލިބުނީ ސައްހަ ގޮތުގައި ކަމަށް އޮޑިޓަރުން ކަނޑައެޅި ކަމަށެވެ.
ޗާލްސްގެ ޗެރިޓީތަކަށް އެހީގެ ގޮތުގައި ލިބޭ ފަައިސާގެ ކަންކަން ނޫސްތަކުން ބަލަން ފެށީ ސައުދީ އަރަބިއްޔާގެ ޑޯނަަރަކަށް އިނގިރޭސި "އޮނާ" ލަގަބު އަދި ރައްޔިތުކަން ދޭން ޗެރިޓީއަކުން ހުށަހެޅި ކަމުގެ ތުހުމަތު ފެންމަތިވުމުންނެވެ.
މި އަހަރުގެ ކުރީކޮޅު އިނގިރޭސި ފުލުހުން ބުނީ އެ ތުހުމަތު ފެންމަތިވުމުން އެކަން ތަހުގީގު ކުރަމުންދާ ކަމަށެވެ.
