ލޯނުގެ އިންޓްރެސްޓްގެ ގޮތުގައި ރަޝިއާއިން ދައްކަން ޖެހޭ 100 މިލިއަން ޑޮލަރު އާދީއްތަ ދުވަހުގެ ސުންގަޑީގެ ކުރިން ނުދެއްކި، 1998 ވަނަ އަހަރަށް ފަހު ފުރަތަމަ ފަހަރަށް އެ ގައުމު ޑީފޯލްޓް ވާން ގާތްވެއްޖެ އެވެ.
ރަޝިއާ އަތުގައި ފައިސާ އެބަ ހުއްޓެވެ. އަދި އެ ފައިސާ ދައްކަން ވެސް އެ ގައުމު ތައްޔާރެވެ. ނަމަވެސް ޔޫކްރެއިން ހަނގުރާމައާ ހެދި އަޅާފައި ދަތިކުރުމުގެ ފިޔަވަޅުތަކާ ހެދި ބައިނަލްއަގްވާމީ ކްރެޑިޓަރުންނާ ހަމައަށް ފައިސާ ފޮނުވޭނެ ގޮތެއް ނެތެވެ.
ރަޝިއާ ފިނޭންސް މިނިސްޓަރު ވިދާޅުވީ މިއީ "ބޮޑު ޖޯކެއް ކަހަލަ ހާލަތެއް" ކަމަށެވެ. އެމެރިކާ އާއި އީޔޫއިން އަޅާފައިވާ ފިޔަވަޅުތަކާ ހެދި ބައިނަލްއަގްވާމީ ބޭންކިން ނެޓްވޯކްގައި ރަޝިއާއަށް އެއްވެސް މުއާމަލާތެއް ނުކުރެވެ އެވެ.
ރަޝިއާގެ ސަރުކާރުން ބުނީ ސުންގަޑީގެ ކުރިން ހުރިހާ ފައިސާއެއް ދައްކަން ބޭނުންވާ ކަމަށެވެ. ހަނގުރާމަ ފެށި ފަހުން ފާއިތުވި ހަތަރު މަހު އެ ގައުމުން ވަނީ ސުންގަޑީގެ ކުރިން ފައިސާ ދެއްކޭނެ ގޮތް ހޯދާފަ އެވެ.
ރަޝިއާގެ 40 ބިލިއަން ޑޮލަރުގެ ދަރަނި ދައްކަން ޖެހެނީ ޑޮލަރުން ނުވަތަ ޔޫރޯއިންނެވެ. އޭގެ 50 ޕަސެންޓަކީ ބޭރުގެ ދަރަންޏެވެ.
އިންޓްރެސްޓް ގޮތުގައި 100 މިލިއަން ޑޮލަރު ދައްކަން ޖެހުނީ 27 މޭ ގެ ކުރިންނެވެ. ރަޝިއާއިން ބުނީ ޔޫރޯކްލިއާ ބޭންކަށް ފައިސާ ފޮނުވާފައި ވާނެ ކަމަށެވެ. ނަމަވެސް ބްލޫމްބާގް ނިއުސްއިން ބުނީ އެ ބޭންކުން ފައިސާ ޕްރޮސެސް ނުވެ ތާށިވެފައިވާ ކަމަށެވެ.
ތަޖުރިބާކާރުން ބުނީ ސުންގަޑި ހަމަވި ތާރީހުން ފެށިގެން 30 ދުވަހުގެ ތެރޭގައި ކްރެޑިޓަރުންނަށް ފައިސާ ނުލިބިއްޖެ ނަމަ ރަޝިއާ ޑީފޯލްޓް ވާނެ ކަމަށެވެ.
ރަޝިއާގެ މުއާމަލާތް ބްލޮކް ކުރި ކަމަށް ޔޫރޯކްލިއާއިން ނުބުނެ އެވެ. ނަމަވެސް އަޅާފައިވާ ހުރިހާ ބައިނަލްއަގްވާމީ ފިޔަވަޅުތަކަށް އަމަލު ކުރާ ކަމަށް ބުންޏެވެ.
ފިޔަވަޅުތަކުގެ މައްސަލައިގައި ރަޝިއާއިން އެންމެ ފަހުން ޖޫން 23 ވަނަ ދުވަހު ބުނީ މުސްތަަގްބަލުގައި ހުރިހާ ދަރަންޏޭއް އަދާ ކުރާނީ އެ ގައުމުގެ ނޭޝަނަލް ސެޓްލްމަންޓް ޑިޕޮޒިޓަރީ ބޭންކް މެދުވެރިކޮށް ރޫބްލްސްއިން ކަމަށެވެ. އެކަމަކު އެއްބަސްވުންތަކުގައި ބުނެފައި ވަނީ އަގު އަދާ ކުރަން ވާނީ ޑޮލަރުން ނުވަތަ އެހެން ބޭރު ފައިސާއިން ކަމަށެވެ.
