އަންނަ މަހު މެލޭޝިއާގައި ކުރިއަށްދާ ކުއަޑް މުބާރާތަށް ތައްޔާރުވާން މިހާރު ސްރީ ލަންކާގައި ގައުމީ ކްރިކެޓް ޓީމުން ކުރިއަށްގެންދާ ޓުއާގައި ކުޅުނު ތިން ވަނަ މެޗުން ވެސް މޮޅުވެއްޖެ އެވެ.
ފުރަތަަމަ މެޗުގައި ލިބަޓީ ސީސީ އަތުން ރާއްޖެ މޮޅުވީ ކެޕްޓަން އަޒްޔާން ފަރުހަތުގެ ސެންޗަރީއާ އެކު 57 ލަނޑުންނެެވެ. ދެ ވަަނަ މެޗުގައި ސްރީ ލަންކާ ލައިޓް އިންފެންޓްރީއާ ވާދަކޮށް ރާއްޖެ ވަނީ ފަސް ލަނޑުން މޮޅުވެފަ އެވެ. ރާއްޖޭން ތިން ވަނަ މެޗުގައި އިއްޔެ ނުކުތީ ސްލިޓް ޔުނިވާސިޓީ ޓީމާ ދެކޮޅަށެވެ. އެ މެޗު ކާމިޔާބުކުރީ ދެ ލަނޑުންނެވެ.
ލަންކާ ޓުއާގައި ޖުމްލަ ހަތް މެޗު ކުޅޭ ގޮތަށް ހަމަޖެހިފައިވާއިރު، އިއްޔެގެ މެޗު ކުރިއަށްދިޔައީ ކޮލަމްބޯގެ މޮރަޓުވާ ސްޓޭޑިއަމްގަ އެވެ. ޓޮސް ދިމާވުމުން ރާއްޖޭން ނިންމީ ބެޓް ކުރުމަށެވެ. ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވެގެން ރާއްޖޭން ވަނީ 120 ލަނޑު އެއްކޮށްފަ އެވެ. ރާއްޖޭން އެންމެ ގިނަ ލަނޑު އެއްކުރީ 32 ބޯޅައިން 29 ލަނޑު ހެދި މުހައްމަދު ރިޝްވާން އާއި 17 ބޯޅައިން 25 ލަނޑު ހެދި ހަސަން ހާޒިގް ރަޝީދު އެވެ.
ޖަވާބުގައި ސްލިޓުން ކުޅެން އަރައި، 20 އޯވަރު ހަމަވިއިރު ހަތް ކުޅުންތެރިން ނުބައިވެގެން ހެދުނީ 118 ލަނޑެވެ. ރާއްޖޭގެ އަމީލް މައުރޫފް އާއި ވައިސް ކެޕްޓަން، އާދަމް ނާސިފް އުމަރު ވަނީ ކޮންމެ ކުޅުންތެރިއަކު ދެ ވިކެޓް ނަގައިފަ އެވެ.
ސްރީ ލަންކާ ޓުއާގައި ދެން ގައުމީ ޓީމު ކުޅޭ މެޗުތަކުގައި ނުކުންނާނީ ޕެނަޑޫރާ ސްޕޯޓްސް ކްލަބާއި ޕްރިންސް އޮފް ވޭލްސް ކޮލެޖްގެ 19 އަހަރުން ދަށުގެ ޓީމާއި އަދި ސްރީ ލަންކަން ނެޝަނަލް ޑެފް ކްރިކެޓް ޓީމާ ދެކޮޅަށެވެ.
ރާއްޖޭން ލަންކާގައި މި ކުރިއަށްގެންދާ ޓުއާ އަކީ އަންނަ މަހު 1-12 އަށް މެލޭޝިއާގައި ބާއްވާ ކުއޮޑް ސީރީސް އަށް ތައްޔާރުވުމުގެ ގޮތުން ބާއްވާ ޓުއާ އެކެވެ. އަންނަ މަަހު އޮތް މެލޭޝިއާ މުބާރާތުގައި ވާދަކުރަނީ ރާއްޖެ އާއި މެލޭޝިއާގެ އިތުރުން ބޫޓާން އާއި ތައިލެންޑް އެވެ. މީގެ ކުރިން ވެސް މެލޭޝިއާ މުބާރާތްތަކުގައި ވާދަކޮށް ރާއްޖޭން ކާމިޔާބު ހޯދާފައިވެ އެވެ.
