ޔޫކްރެއިންގެ އިރުމަތީގައި އޮންނަ ސެވެރޮޑޮނެސްކް ސިޓީގެ ފުރިހަމަ ކޮންޓްރޯލް ރަޝިއާއަށް ލިބިފައިވާ ކަމަށް އެ ސިޓީގެ މޭޔަރު ވިދާޅުވެއްޖެ އެވެ.
"ރަޝިއާއިން ސެވެރޮޑޮނެސްކް އެއްކޮށް ހިފައިފި. އަޅުގަނޑުމެންގެ ސިފައިން ފަހަތަށް ޖެހިއްޖެ،" މޭޔަރު އޮލެކްސެންޑެރް ސްޓްރުޔުކް ޔޫކްރެއިން ޓީވީއަށް ވިދާޅުވި އެވެ.
ޔޫކްރެއިން ހަނގުރާމައިގެ ހާލަތު އެންމެ ގޯސްކޮށް އޮތީ އެ ގައުމުގެ އިރުމަތީގަ އެވެ. ސެވެރޮޑޮނެސްކް ސިޓީގެ ކޮންޓްރޯލް ހޯދަން ރަޝިއާއިން ހުއްޓުމެއް ނެތި ބޮން އަޅާތާ ހަފްތާތަކެއް ވެއްޖެ އެވެ.
ހަނގުރާމަ ފެށުމުގެ ކުރިން އެ ސިޓީގެ އާބާދީއަކީ 100،000 މީހުންނެވެ. މިހާރު ވެސް އެތައް ސަތޭކަ ބަޔަކު ސިޓީގައި ތިބި އިރު، އެ މީހުން ތިބީ ރައްކާތެރިވުމުގެ ގޮތުން ކެމިކަލް ޕްލާންޓެއްގެ ތެރޭގަ އެވެ.
ރަޝިއާގެ ސިފައިން ބުނީ ސެވެރޮޑޮނެސްކް ހިފުމަށް ފަހު ލިސިޗާންސްކް ސިޓީގެ ތެރެއަށް މިހާރު ވަދެފައިވާ ކަމަށެވެ. ނަމަވެސް އެކަމާ ގުޅޭ ގޮތުން ޔޫކްރެއިންގެ އޮފިޝަލުން އަދި ވަކި އެއްޗެއް ނުބުނެ އެވެ.
އެ ސިޓީއިން ޔޫކްރެއިން ސިފައިން ފޭބުމާ އެކު އިރުމަތީ ޔޫކްރެއިންގެ ލިސިޗާންކް ސިޓީ ފިޔަވައި ލުހާންސްކް ސަރަހައްދުގެ ފުރިހަމަ ކޮންޓްރޯލް ރަޝިއާއަށް ލިބޭނެ އެވެ.
ލުހާންސްކްއަކީ ރަޝިއާ ބަހުން ވާހަކަ ދައްކާ ބަޔަކު ދިރިއުޅޭ ޔޫކްރެއިންގެ އިރުމަތީގެ ހިސާބެކެވެ. އެ ތަން ހިފުމަކީ ރައީސް ލެޑިމިއަ ޕުޓިންގެ އެއް ލަނޑުދަނޑި އެވެ.
ލުހާންސްކް އާއި ޑޮނެސްކް ސަރަހައްދާ އެކު ޔޫކްރެއިންގެ އިރުމައްޗަށް ކިޔަނީ ޑޮންބާސް އެވެ. ދެހާސް ސާދަ ވަނަ އަހަރުން ފެށިގެން އެ ތަނުގައި އޮންނަނީ ޔޫކްރެއިން ސަރުކާރާ ވަކިވެ، ރަޝިއާއަށް ތާއީދު ކުރާ ބަޔެއްގެ ވެރިކަމެވެ.
