ރިއޯ ޑި ޖެނެއިރޯ، ބްރެޒިލް (ޖޫން 22) - ބްރެޒިލްގެ "ޕަބްލޯ އެސްކޮބާ"ގެ ގޮތުގައި މަޝްހޫރު މަސްތުވާތަކެތީގެ ވިޔަފާރި ކުރާ މީހަކު ފިލައިގެން އުޅޭތާ އަހަރެއް ފަހުން ހަންގޭރީއިން ހައްޔަރުކޮށްފި އެވެ.
ސާޖިއޯ ރޮބޭޓޯ ޑެ ކަރްވާލޯ ނުވަތަ މޭޔާ ކަރްވާލޯ ހައްޔަރު ކުރީ އިންޓަޕޯލް އާއި ހަންގޭރީ ފުލުހުން އަދި ބްރެޒިލްގެ ފެޑެރަލް ފުލުހުން ގުޅިގެން ހިންގި އޮޕަރޭޝަނެއްގަ އެވެ.
އޮޕަރޭޝަނަށް ފަހު ނެރުނު ބަޔާނުގައި ބުނީ މި ވަގުތު ބައިނަލްއަގްވާމީ ގޮތުން ހަރަކާތްތެރިވާ "ޑްރަގްގެ އެންމެ ބޮޑު އެކަކު" ހައްޔަރުކޮށްފައިވާ ކަމަށެވެ.
ބްރެޒިލްގެ މީޑިއާއިން ބުނާ ގޮތުގައި ކަރްވާލޯއަކީ ކުރިން ފުލުހެކެވެ. އޭނާ ވަނީ ގިނަ ދުވަސްތަކެއް ވަންދެން ޝަހްސު އޮޅުވާލައިގެން ޔޫރަޕްގައި ދިރިއުޅެފަ އެވެ.
ސްޕެއިންގައި ހައްޔަރު ކުރުމުން ކަފާލާތުގެ ދަށުން މިނިވަންކަން ހޯދައި، 2020 ވަނަ އަހަރު ކޮވިޑް ޖެހިގެން މަރުވި ކަމަށް ހެދުނެވެ. އޭގެ ފަހުން އޭނާ އާއްމުކޮށް އެއްވެސް ތަނަކުން ނުފެނެ އެވެ.
ފުލުހުންގެ ބަޔާނުގައި ބުނީ ކަރްވާލޯ އިސްވެ ހިންގާ ކުށްވެރިންގެ ގްރޫޕުން 100 މިލިއަން ޑޮލަރަށް ވުރެ ގިނަ އަދަދެއްގެ ފައިސާ ހިފަހައްޓާފައިވާ ކަމަށެވެ.
އެ ގްރޫޕަށް ކުރާ ތުހުމަތުތަކުގެ ތެރޭގައި ބްރެޒިލުން ޔޫރަޕަށް އެތައް ޓަނެއްގެ ކޮކެއިން ވަގަށް އެތެރެކޮށް، އެކަމުން ލިބޭ ފައިސާ ލޯންޑާ ކުރުން ހިމެނެ އެވެ.
