ލަންޑަން، އިނގިރޭސިވިލާތް (ޖޫން 21) - މަންކީޕޮކްސް ޖެހުމުގެ ނުރައްކާ ބޮޑު، އެއް ޖިންސުން ގުޅުން ހިންގާ ފިރިހެނުންނަށް އެ ބަލީގެ ވެކްސިން ދިނުމަށް އިނގިރޭސިވިލާތުގެ ހެލްތު ސެކިއުރިޓީ އެޖެންސީން ލަފާ ދީފި އެވެ.
ހޯމަ ދުވަހާ ހަމައަށް މަންކީޕޮކްސްގެ 793 ކޭސް މުޅި އިނގިރޭސިވިލާތުން ރިޕޯޓުކޮށްފައިވެ އެވެ. ޔޫކޭއެޗްއެސްއޭގެ އޮފިޝަލް މޭރީ ރަމްސީ ވިދާޅުވީ ކޮންޓެކްޓް ޓްރޭސިންގެ ސަބަބުން ބަލި ފެތުރުން ލިމިޓް ކުރެވުނު ނަމަވެސް "އެއް ޖިންސުން ގުޅުން ހިންގާ ފިރިހެނުންގެ ތެރޭގައި ކޭސްތައް އިތުރުވަމުންދާ" ކަމަށެވެ.
"ނުރައްކާ ބޮޑު ފަރާތްތަކަށް ވެކްސިން ޖަހަން ހުޅުވާލުމުން، ބަލި ފެތުރުން ކޮންޓްރޯލް ކުރަން ފަސޭހަ ވާނެ،" އޭނާ ވިދާޅުވި އެވެ.
މަންކީޕޮކްސް ވައިރަސްއަކީ ޖިންސީ ގުޅުމުގެ ސަބަބުން ގައިން ގަޔަށް އަރާ ބައްޔެއް ކަމަށް މިހާތަނަށް ކަނޑައަޅާފައެއް ނުވެ އެވެ. ނަމަވެސް އެއީ ގައިގޯޅިވެ އުޅުމުން ޖެހުމުގެ ފުރުސަތު އޮންނަ ބައްޔެކެވެ.
ޔޫކޭއެސްއެސްއޭއިން ލަފާ ދިނީ ބަލީގެ ނުރައްކާ ބޮޑު ފިރިހެނުންނަށް، ސްމޯލްޕޮކްސްއަށް ހާއްސަ އިމްވަނެކްސް ވެކްސިން ދިނުމަށެވެ.
އިނގިރޭސި ސަރުކާރަށް ސައިންސްގެ ލަފާ ދޭ ޖޮއިންޓް ކޮމިޓީ އިން ވެކްސިނޭޝަން އެންޑް އިމިއުނައިޒޭޝަނުން ވެސް އެ ލަފަޔަށް ތާއީދު ކުރެ އެވެ.
މަންކީޕޮކްސްގެ އަލާމާތްތަކުގެ ތެރޭގައި ހިމެނެނީ ހުން އައުމާއި، ގޮށްލުމާއި، މުޅި ގައިގައި ފޮޅުތަކެއް ނެގުމެވެ. ޔޫރަޕާއި އެހެން ހިސާބުތަކަށް މި ބަލި ފޯރުމުގެ ކުރިން މިއީ ކޮންމެ އަހަރަކު ވެސް އެފްރިކާގެ ބައެއް ހިސާބުތަކުން ފެންނަ ބައްޔެކެވެ.
ނަމަވެސް ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ މި އަހަރުގެ މިހާތަނަށް 42 ގައުމަކުން 2،100 އަށް ވުރެ ގިނަ ކޭސް ރިޕޯޓުކޮށްފައިވާ ކަމަށެވެ.
އެ ބަލި ފެތުރެމުން ދާތީ އާއްމު ސިއްހަތަށް ނުރައްކާ އޮތްތޯ ވަޒަން ކުރުމަށް އަންނަ ބުރާސްފަތި ދުވަހު ޑަބްލިއުއެޗްއޯގެ ބޮޑު ބައްދަލުވުމެއް އޮންނާނެ އެވެ.
