ޕެނެމާ ސިޓީ، ޕެނެމާ (ޖޫން 21) - ޕެނެމާގެ ރައީސް ލޯރެންޓީނޯ ކޯޓިޒޯއަށް ލޭގެ ކެންސަރު ޖެހިފައިވާކަން އިއުލާން ކުރައްވައިފި އެވެ.
ޓީވީ މެދުވެރިކޮށް އުމުރުން 69 އަހަރުގެ ކޯޓިޒޯ ވިދާޅުވީ "ހެމޮގްލޮބިން ދަށްވެ، ވައިޓް ބްލަޑް ސެލް ކައުންޓް މަދުވާން ފެށިކަން ޑޮކްޓަރުންނަށް ފާހަގަވީ" މިދިޔަ މޭ މަހުގެ ފަހުކޮޅު ހެދި ރޫޓީން ޓެސްޓަކުން ކަމަށެވެ.
ސްޕެޝަލިސްޓުން ލަފާ ދިނީ ބޯން މެރޯ ބަޔޮޕްސީ ހެދުމަށް ކަމަށާއި އެމެރިކާގެ ލެބޯޓަރީއަކަށް ސާމްޕަލްތައް ފޮނުވި ކަމަށް ކޯޓިޒޯ ވިދާޅުވި އެވެ.
އެ ސާމްޕަލްތަކުން އެނގުނު ގޮތުގައި ކޯޓިޒޯއަށް ޖެހިފައި ވަނީ "އިންޓަމީޑިއޭޓް ރިސްކް" މައިއެލޮޑިސްޕްލާސްޓިކް ސިންޑްރޯމް އެވެ. އެއީ ލޭގެ ސެލްތައް އުފެއްދުމަށް އަސަރު ކުރާ ބާވަތުގެ ކެންސަރެކެވެ.
ކޯޓިޒޯ ވިދާޅުވީ ބަލި ފެތުރިފައިވާ މިންވަރު ދެނެގަތުމަށް ޖުލައި މަހު އެމެރިކާގެ ހިޔުސްޓަން ސިޓީގައި ދެ ވަނަ ފަހަރަށް ތަހުލީލުތަކެއް ކުރައްވާނެ ކަމަށެވެ.
"އަޅުގަނޑު ދަންނަވަން ބޭނުން ވަނީ އަޅުގަނޑުގެ ހާލު ރަނގަޅޭ. އަޅުގަނޑު މި ހުރީ ފަސްޖެހޭ ގޮތަކަށް ނޫން. އަޅުގަނޑުގެ މަސައްކަތް އާދައިގެ މަތިން ކުރިއަށް ދާނެ،" އޭނާ ވިދާޅުވި އެވެ.
އެތެރެހަށީގެ ބޭހާއި ކްރިޓިކަލް ކެއާއަށް ހާއްސަ ޑރ. ޖޫލިއޯ ސަންޑޮވާލް އޭއެފްޕީއަށް ވިދާޅުވީ ޕެނެމާގެ ރައީސަށް ޖެހުނު ލޭގެ ކެންސަރަކީ މީހާ ވަރުބަލިކޮށްލާ، ބަލިކަށިކޮށްލާ، ބަރުދަން ލުއިވުމަށް މަގުފަހިވާ ބާވަތެއް ކަމަށެވެ.
އެއީ އުމުރުން ދުވަސްވުމުން ދިމާވާ ޖެނެޓިކް މައްސަލައަކާ ހެދި ފެންނަ ކެންސަރުގެ ބާވަތެއް ކަމަށާއި އާއްމުކޮށް އެ ބަލި ފެންނާނީ އުމުރުން 60 އަހަރަށް ފަހުގައި ކަމަށް އޭނާ ވިދާޅުވި އެވެ.
އެ ބަލީގެ ލައިފް އެކްސްޕެކްޓެންސީ ނުވަތަ ދުނިޔޭގައި ހުންނާނެ ކަމަށް ބެލެވޭ މުއްދަތު ބިނާވަނީ ޖެހިފައިވާ ބާވަތުގެ ކެންސަރުގެ މައްޗަށް ކަމަށާއި އެއީ "ހަ މަހާއި 15 އަހަރާ ދެމެދުގެ މުއްދަތެއް" ކަމަށް އޭނާ ފާހަގަކުރެއްވި އެވެ.
