ވީއޭއެމް އެސޯސިއޭޝަން ކަޕްގެ އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބުން މި ފަަހަރުގެ މުބާރާތުގެ ފައިނަލުން ފުރުސަތު ހޯދަން މިރޭ ކުޅޭ ޕްލޭއޮފް މެޗުގައި ބައްދަލުކުރާނީ ކްލަބް ވެމްކޯއާ އެވެ. ސިފައިން މި ވަގުތު ރަނގަޅު ފޯމެއްގައި އޮތް ނަމަވެސް ޕްލޭއޮފް މެޗު އެއްވެސް ގޮތަކުން ފަސޭހައެއްނުވާނެ ކަމަށް ސިފައިންގެ ކޯޗު ޖުނައިދު އަބްދުﷲ ވަނީ ބުނެފަ އެވެ.
މި ފަހަރުގެ އެސޯސިއޭޝަން ކަޕްގެ ފޯމެޓް، ރޭވިފައި އޮތްގޮތުން ލީގު ބުރު ނިމުނުއިރު، އެއް ވަނައިގައި އޮތް ސްޕޯޓްސް ކްލަބް ސިޓީ ވަނީ ސީދާ ފައިނަލުގެ ޖާގަ ހޯދައިފަ އެވެ. ފައިނަލުގެ ފަހު ޖާގަ ހޯދަން ލީގު ބުރުގެ ދެ ވަނަ އާއި ތިން ވަނަ ކުޅޭނީ ޕްލޭއޮފް މެޗެކެވެ. ޕްލޭއޮފްގައި ކުޅެނީ ސިފައިންނާއި ވެމްކޯ އެވެ.
"ފުރަތަމަ ފެށިއިރު އަޅުގަނޑުމެން ޓީމު އޮތީ ފޯމަކަށް ނޭޅި، ފިޒިކަލް ވެސް ދަށްކޮށް ދިޔައީ ބޭރު މީހުންގެ އެއީ ކަންނޭނގެ ފުރަތަމަ ކޮޅު އެ ދިމާވި ކަމަކީ ދެން މަޑުމަޑުން އަޅުގަނޑުމެން އިންޖަރީތަށް ރިކަވާކުރަމުން މި ހިސާބަށް މި އައީ. ވަރަށް ހިތްހަަމަޖެހުނު ފަހުން އެއްވެސް މެޗަކުން ބަލިނުވެ މި ހިސާބަށް ސީދާ ތިނެތިން އައީމަ،" އެންމެ ފަހުން ގުޑީސް ސްޕޯޓްސް ކްލަބް ބަލިކުރި މެޗަށް ފަހު ސިފައިންގެ ކޯޗު ޖުނައިދު ބުންޏެވެ.
މި ފަހަރުގެ އެސޯސިއޭޝަން ކަޕްގައި ސިފައިން ކުޅުނު ފުރަތަމަ މެޗުގައި ސްޕޯޓްސް ކުލަބު ސިޓީ އަތުން ބަލިވީ ސީދާ ތިން ސެޓުންނެވެ. އޭގެ ފަހުން ދެ ވަނަ މެޗުގައި ޕޮލިސް ކުލަބު އަތުން 3-2 ސެޓުން ބަލިވި އެވެ. އެ މެޗު ޕޮލިހުން ކާމިޔާބުކުރީ ސިފައިން ދެ ސެޓު ހޯދާފައިވަނިކޮށް ފަހަތުން އަރައި ތިން ސެޓު ހޯދައިގެންނެވެ.
ފުރަތަމަ ދެ މެޗުން ބަލިވި ކަމުގައިވިޔަސް ސިފައިން ވަނީ ލީގު ބުރުގައި ދެން ކުޅުނު ތިން ފެންވަރު ދައްކާލައިފަ އެވެ. ލީގު ބުރުގެ ފަހު ތިން މެޗުގައި ވެމްކޯ، އޮއްފު އެފްސީ އަދި ގުޑީސް އަތުން ސިފައިން މޮޅުވީ ސީދާ ތިން ސެޓުންނެވެ.
ވެމްކޯގެ އަޝްވަލް ރާއީ ކައިރިން ދިވެހި ސިފައިންގެ ކްލަބްގެ އާދަމް ބޯޅަ ފޮނުވާލަނީ.-- ފޮޓޯ: އިމޭޖަސް.އެމްވީ
ވެމްކޯ ލީގު ބުރުގައި ބަލިވި ހަމައެކަނި މެޗަކީ ސިފައިން އަތުންނެވެ. ލީގު ބުރުގައި ވެމްކޯ އަތުން މޮޅުވެފައި އޮތް ނަމަވެސް ޖުނައިދު ބުނީ ޕްލޭއޮފްގައި ބުރަ މަސައްކަތް ކޮށްގެން ނޫނީ މޮޅެއް ނުވާނެ ކަމަށެވެ. އަދި ވެމްކޯ އިން ރަނގަޅަށް ތައްޔާރުވެގެން ޕްލޭއޮފަށް ނުކުންނައިރު، އެ މެޗު ފަސޭހައެއް ނުވާނެ ކަމަށް ޖުނައިދު ގަބޫލުކުރެ އެވެ.
"(ލީގު ބުރުގައި ވެމްކޯ) ބަލިކުރީމަ އަކީ ޖެހިގެން އަންނަ ބުރުުގައި އަޅުގަނޑުމެންނަށް ލިބޭނެ އަނެއްހެން މާ ބޮޑު ހިތްހަމަޖެހުމެއް ނޫން. އެއީ ކޮންމެ ގޮތެއް ވިޔަސް އެންމެ ސެމީއެއް (ޕްލޭއޮފެއް) މި އިންނަނީ. ޕްލޭއޮފްގައި ކުރިއަށް ވުރެ ހިތްވަރު ނަގައިގެން ބަލިކުރަން ބޭނުމީ،" ޖުނައިދު ބުންޏެވެ.
"އަބަދުވެސް މެޗަކަށް ނުކުންނައިރު އެންމެ ބޮޑަށް ބަލަނީ އިދިކޮޅު ޓީމުތަކުގެ އެޓޭކަށް. ދެން އަޅުގަނޑުމެންގެ ބްލޮކް ކުރުމާ އެ ކަންކަމަށް. އިދިކޮޅު ޓީމު ބްލޮކް ކުރެވޭނެވަރުގެ ކުޅުންތެރިން އެބަތިބި. އެ އަށް ބޮޑަށް ފޯކަސް މި ކުރަނީ،"
މިރޭ ކުޅޭ ޕްލޭއޮފުން މޮޅުވާ ޓީމެއް ފައިނަލުގައި އަންނަ ބުރާސްފަތި ދުވަހުގެރޭ ކުޅޭ އެސޯސިއޭޝަން ކަޕްގެ ނުކުންނާނީ ސިޓީއާ ދެކޮޅަށެވެ.
ވެމްކޯގެ ކޯޗު އިބްރާހިމް ނިޒާރު (ބޮޑޭ) ބުނީ ވަރަށް އުނދަގޫ ހާލަތްތަކެއްގެ ތެރެއިން ވެސް އެ ޓީމަށް ލީގު ބުރުގެ ރަނގަޅު ހިސާބެއްގައި ނިންމާލެވުނީ ވަރަށް ރަނގަޅަށް ޓީމެއްގެ ގޮތުގައި މަސައްކަތް ކޮށްގެން ކަމަށެވެ. ލީގު ބުރުގެ ފަހު މެޗުގައި ޕޮލިސް ކްލަބް އަތުން ވެމްކޯ އަށް ލިބުނު މޮޅަކީ މުބާރާތުގެ ފައިނަލަށް ދާން ބަލައި، ޕްލޭއޮފްގެ ކުރިން ލިބުނު ބޮޑު މޮޅެއް ކަމަށް ނިޒާރު ވަނީ ބުނެފަ އެވެ.
ވެމްކޯ އަށް މި ފަހަރުގެ މުބާރާތުގެ ކުރިން ލިބުނު ބިދޭސީ ތިން ކުޅުންތެރިންގެ ތެރެއިން އެއް ކުޅުންތެރިއަކު ވަނީ ސީރިއަސް އަނިޔާއެއް ލިބިގެން ފޮނުވާލަން ޖެހިފަ އެވެ. ވެމްކޯގެ އަމިތުސިންހް ކަޕްތާންސިންހްގެ ކަކުލަށް އަނިޔާވީ ފުރަތަމަ މެޗުގައި އޮއްފުއާ ދެކޮޅަށް ކުޅެނިކޮށެވެ.
ސިފައިންނާއި ވެމްކޯ ކުޅޭ ޕްލޭއޮފް މެޗު ފަށާނީ މިރޭ 20:15 ގަ އެވެ.
