ގައުމީ ކްރިކެޓް ޓީމުގެ ކެޕްޓަނަކަށް ޔޫސުފް އަޒްޔާން ފަރުހަތު ހަމަޖެއްސިއިރު، ވައިސް ކެޕްޓަނަކަށް އާދަމް ނާސިފް އުމަރު (އާދަޅޭ) އަށް ދީފި އެވެ.
ގައުމީ ޓީމުގެ ކެޕްޓަންކަން އެންމެ ފަހުން ބޭއްވި މުބާރާތްތަކުގައި ކޮށްފައިވަނީ، މުހައްމަދު މަހަފޫޒް (މަހޭ) އެވެ. މަހޭ، އަންނަ މަހު މެލޭޝިއާގައި ބާއްވާ ކުއޮޑް ސީރީސް އަށް ނުދާތީ އެ މުބާރާތުގެ ކުރިން ގައުމީ ޓީމުގެ އާ ކެޕްޓަނުން ހަމަޖައްސާފައިވަނީ އިއްޔެ އެވެ.
ރާއްޖޭގެ އެންމެ މޮޅު ކްރިކެޓް ކުޅުންތެރިޔާގެ މަގާމު 2019 ވަނަ އަހަރު ހޯދި އަޒްޔާން ވަނީ މީގެ ކުރިން 19 އަހަރުން ދަށުގެ ގައުމީ ކްރިކެޓް ޓީމުގެ ކެޕްޓަންކަން ވެސް ކޮށްފަ އެވެ.
ކްރިކެޓް ބޯޑުން މީގެ ކުރިން ބޭއްވި އިވެންޓެއްގެ ތެރެއިން ކްރިކެޓް ބޯޑުގެ ރައީސް ފައިސަލް (ކ)، އެ ޓީމުގެ އަޒްޔާން (ވ)އާ ގައުމީ ޓީމުގެ ޖޯޒީ ހަވާލުކުރަނީ.--- ފޮޓޯ: އާއިމް ޒަމީރު/ އަދަދު
އަޒްޔާން ނިސްބަތްވަނީ ކްރިކެޓް އާއިލާ އަކަށެވެ. އަޒްޔާންގެ ކާފަ، އަހްމަދު ޖަލީލް އާއި ބައްޕަ، ފަރުހަތު ޖަލީލް އަދި ބޭބެ، ޝަފްރާޒް ޖަލީލް އަކީ މުޅިން ގައުމީ ކްރިކެޓް ޓީމަށް ކުޅެފައިވާ ކުޅުންތެރިންނެވެ.
އަޒްޔާން ސޯޝަލް މީޑިއާގައި ބުނެފައިވަނީ ޖަލީލް މާލަމުގައި އޭނާ އަށް ގައުމީ ކްރިކެޓް ޓީމުގެ ކެޕްޓަންކަން ހަވާލުކުރުމަކީ އެކަން އިތުރަށް ހާއްސަވާ ސަބަބެއް ކަމަށެވެ.
އަޒްޔާންގެ ބައްޕަ، ފަރުހަތުގެ އިސްނެންގެވުމާ އެކު ކްރިކެޓް ކުޅުންތެރިންނަށް ހާއްސަކޮށް، މިދިޔަ އޮކްޓޫބަރު މަހު ހުޅުވި ޖަލީލް މާލަމް އަކީ އަޒްޔާންގެ ކާފަގެ ނަމާ ގުޅުވައިގެން، އެ ލެގަސީ ދިރުވަން ކުރި ކަމެކެވެ. އެ ތަނުގައި އަޒްޔާންއާ ގައުމީ ކެޕްޓަންކަން ހަވާލުކުރުމަކީ އޭނާ އަށް ލިބުނު ހިތްހަމަޖެހުން ދެ ގުނަ ވީ ސަބަބެވެ.
"އަލްހަމްދުލިއްލާހި. ގައުމީ ކްރިކެޓް ޓީމުގެ ކެޕްޓަނަކަށް ވުމަކީ، ހުވަފެނެއް ހަގީގަތަކަށް ވުން،" އަޒްޔާން ފޭސްބުކްގައި ލިޔެފައިވެ އެވެ.
ވައިސް ކެޕްޓަން އަކަށް ހަމަޖެއްސި، އާދަމް އަކީ މި އަހަރު މޯލްޑިވްސް ސްޕޯޓްސް އެވޯޑްސްގައި ހޮވި ރާއްޖޭގެ އެންމެ މޮޅު ކުޅުންތެރިޔާ އެވެ. ފަހަކަށް އައިސް .ބޮޑު ކުރިއެރުމެއް ހޯދަމުން އަންނަ އާދަމް އަކީ ގައުމީ ޓީމުގެ ވެސް މުހިންމު މެމްބަރެކެވެ.
ނާސިފް ބުނީ ގައުމީ ކްރިކެޓް ޓީމުގެ ވައިސް ކެޕްޓަނަކަށް އޭނާ ހަމަޖައްސައި ކްރިކެޓް ބޯޑުން ކުރި އިތުބާރުގެ ބަދަލު ދޭން ބޭނުންވާ ކަމަށާއި ކުރެވުނު އެންމެ ރަނގަޅަށް މަސައްކަތްކޮށް ޓީމަށް އެހީތެރިވުމުގައި ދެމިހުންނާނެ ކަމަށެެވެ.
އާ ކެޕްޓަނަކާއި ވައިސް ކެޕްޓަނެއް ކްރިކެޓް ޓީމަށް ހަމަޖެއްސުމަކީ ޓީމުގެ ތެރޭގައި އާ ލީޑަރުން އުފެދުމަށް މުހިންމު ބަދަލެކެވެ.
އަންނަ މަހު 1-12 އަށް މެލޭޝިއާގައި ބާއްވާ ކުއޮޑް ސީރީސްގައި ރާއްޖެ އާއި މެލޭޝިއާގެ އިތުރުން ދެން ވާދަކުރަނީ ބޫޓާން އަދި ތައިލެންޑް އެވެ. މީގެ ކުރިން ވެސް ރާއްޖޭން ވަނީ މި ފަދަ މުބާރާތްތަކުގައި ރަނގަޅު ނަތީޖާތަކެއް ނެރެފަ އެވެ. އެ މުބާރާތަށް ރާއްޖެ ޓީމުގެ މެނޭޖަރަކަށް ހަމަޖައްސާފައިވަނީ، އިބްރާހިމް ޝާޒް ހަބީބު އެވެ.
ކުއޮޑް ސީރީސް އަށް ތައްޔާރުވުމުގެ ގޮތުން ގައުމީ ކްރިކެޓް ޓީމު މިއަދު ލަންކާ އަށް ޓްރެއިނިން ޓުއާ އަކަށް ފުރާގޮތަށް ވަނީ ހަމަޖެހިފަ އެެވެ.
