ދިވެހިންނަކީ ޒަމާނުއްސުރެ ކޮންމެ އީދު ދުވަހެއް ވެސް ވަރަށް ފޯރީގައި ފާހަގަކުރަމުން އައި ބައެކެވެ. ކޮންމެ އީދު ދުވަހެއްގެ އީދު ނަމާދުން ފެށިގެން ގޮސް ވަޅު އީދު ދުވަހުގެ އިރު އޮއްސުމާ ހަމައަށް ރާއްޖޭގެ ކޮންމެ ރަށެއްގައިވެސް ކުލަގަދަކޮށް އީދު ފާހަގަ ކުރެ އެވެ.
ބޮޑު އީދަށް ކުޑަ ދުވަސްކޮޅަކަށް ވެފައިވާއިރު ނ.ވެލިދޫ ތައްޔާރުވަމުންދަނީ ފޯރިގަދަ ބޮޑު އީދެއް ފާހަގަ ކުރުމަށެވެ. އީދުގެ ހަތް ދުވަހަށް ކުޅިވަރުތައް ބަހާލައިގެން ގިނަ ކަންތައްތަކެއް ރާވާފައި ވާއިރު ރައްޔިތަށް އަންގައި، ކުޅިވަރުތަކަށް ޓީމް ހޮވައި ނެށުމުގެ ހަރަކާތްތަކުގެ ޕްރެކްޓިސްތައް ވެސް ވަނީ ފަށައިފަ އެވެ.
އީދު އަންނަން މަދު ދުވަސްކޮޅަކަށްވެފައި ވާއިރު، ވެލިދޫން ފެނިގެންދަނީ އެ ރަށުގެ ކުދި ބޮޑު ހުރިހާ ރައްޔިތުން ވެސް އީދަށް ތައްޔާރުވުމުގެ މަސައްކަތުގައި އަވަދިނެތި އުޅޭ މަންޒަރެވެ.
"ވެލިދޫ އީދު އުފާ" ހަރަކާތް ފެށުމަށް ހަމަޖެހިފައި ވަނީ އަންނަ މަހުގެ އަށް ވަނަ ދުވަހެވެ. ހައްޖު ދުވަހުގެ ރޭ 8:30ގައި އީދު ދުވަހުގެ ހަރަކާތްތައް ފެށުމަށް ހަމަޖެހިފައި ވަނީ ރަންފޮށި އުފުލުގެ ހަރަކާތާއި އީދު މަޅި ޖެހުމާއި އެރޭގެ ދަންވަރު އީދު ނެށުމުގެ ހަރަކާތުންނެވެ.
ވެލިދޫ އަންހެނުން ގަނޑި ޖެހުމުގެ ހަރަކާތުގައި-- ފޮޓޯ: ވެލިދޫ ކައުންސިލް
ވެލިދޫގައި ފުރަތަމަ ފަހަރަށް ހިންގޭ މާލި ބައްތެލި ހަރަކާތާއެކު ރަށުގެ ކުދިބޮޑު އެންމެނަށް ބައިވެރި ވެވޭ އާއިލީ ހަވީރެއް ވެސް އޮވެ އެވެ.
މީގެ އިތުރުން ބައިސްކަލާއި ސައިކަލު ރޭހެއްގެ އިތުރުން ހުރިހާ އުމުރުފުރާއަކަށް ބައިވެރިވެވޭނެ ގޮތަށް ތަފާތު އެހެން ރޭސްތައް ވެސް އެހެން އަހަރުތަކޭ އެއް ބޭއްވުމަށް ހަމަޖެހިފައިވާ ކަމަށް ކައުންސިލުން މައުލޫމާތުދެ އެވެ.
ވެލިދޫގައި މި އީދުގައި ބާއްވާ ބައެއް އިތުރު ކުޅިވަރުތައް:
- އަންހެނުންގެ ދަފި ނެގުން
- ދަނޑި ޖެހުން
- މާފަތި ޖެހުން
- ފިރިހެނުންގެ ސަގާފީ ކުޅިވަރުތައް
- ކޯޑި ކުޅުން
- ބޮޑުމަސް ކުޅުން
- ކޮސްޓިއުމް ޕެރޭޑް
- ވާދެމުން
- ތުވާލި ބޯޅަ މުބާރާތް
- ތިންމުގޯލި މުބާރާތް
ވެލިދޫގައި މީގެ ކުރިން ބޭއްވި ކަލަރަން އެއްގެ ތެރެއިން-- ފޮޓޯ: ވެލިދޫ ކައުންސިލް
މި އަހަރު ވެލިދޫ އީދު ފާހަގަ ކުރާއިރު ޝޯގައި ރާއްޖޭގެ މަޝްހޫރު މިޔުޒިކް ބޭންޑްތައްވެސް ބައިވެރިވެ އެވެ. އޭގެ ތެރޭގައި އިކުއެޓިކް ވައިބް އާއި ވައިޓް ސްމޯކް ވެސް ހިމެނެ އެވެ. މީގެ އިތުރުން ހަބޭސްގެ އިތުރުން ރާއްޖޭގެ މަޝްހޫރު ފިލްމީ ދާއިރާގެ ފަންނާނުން ހިމެނޭ ޔާރާ ޓީމު ވެސް ޕާފޯމްކުރާނެ އެވެ. އަދި ވެލިދޫގެ ފަންނާނުންގެ ޝޯއެއް ވެސް ކުރިއަށް ގެންދާ ގޮތަށް ނިންމާފައިވާ ކަމަށް އެ ރަށު ކައުންސިލުން މައުލޫމާތުދެ އެވެ.
މީގެ އިތުރުން އީދު ހަރަކާތްތައް ނިންމުމުގެ ގޮތުން މި އަހަރު ކަލަރަންއަކާއި ފެންކުޅީގެ އިތުރުން ސަގާފީ ހަރަކާތްތަކެއް ވެސް ކުރިއަށް ގެންދިއުމަށް ރާވާފައިވާ ކަމަށް ކައުންސިލުން ބުނެ އެވެ.
ވެލިދޫއަކީ އަކީ 2500އަށްވުރެ މީހުންގެ އެކުވެރި އާބާދީއެއް އޮންނަ ރަށެކެވެ. އެރަށުގެ ޒުވާނުން އެންމެ ގިނައިން އުޅެނީ ރިސޯޓް ވަޒީފާތަކުގަ އެވެ. ވެލިދޫގައި އިގްތިސޯދީ ގޮތުން ކުރާ މަސައްކަތްތަކަކީ މަސްވެރިކަމާއި ދަނޑުވެރިކަމުގެ އިތުރުން ފަތުރުވެރިކަމުގެ މަސައްކަތްތަކުގައި ވަޒީފާ އަދާ ކުރުމެވެ.
