ޕަލްމާ، ސްޕެއިން (ޖޫން 18) - މި މަހު ފަހުކޮޅު ފަށާ އަހަރުގެ ތިން ވަނަ ގްރޭންޑް ސްލޭމް ޓެނިސް މުބާރާތް، ވިމްބަލްޑަންގައި ކުޅެވޭ ވަރަށް ފިޓްވެފައިވާ ކަމަށް މަޝްހޫރު ޓެނިސް ތަރި ރަފައެލް ނަޑާލް ބުނެފި އެވެ.
ފަޔަށް ލިބިފައިވާ އަނިޔާއިން އެއްކޮށް ރަނގަޅުނުވެ، އިންޖެކްޝަން ޖަހައިގެން ކުޅެން ޖެހޭނަމަ ކުރިއަށް އޮތް ވިމްބަލްޑަން ޓެނިސް މުބާރާތުން ނުފެންނާނެ ކަމަށް ނަޑާލް ވަނީ މީގެ ކުރިން ބުނެފަ އެވެ. ފަޔަށް ލިބިފައިވާ އަނިޔާއާ ހެދި ނަޑާލަށް ކެރިއަރުގެ ފަހުކޮޅުގައި ގާތްގާތުގައި ގިނަ މުބާރާތްތަކެއް ނުކުޅެވެ އެވެ.
ނަޑާލް، 36، އަކީ މި އަހަރު މިހާތަނަށް ބޭއްވި ދެ ގްރޭންޑް ސްލޭމް މުބާރާތުގެ ޗެމްޕިއަނެވެ. ޖެނުއަރީ މަހު އޮސްޓްރޭލިއަން އޯޕަން ކާމިޔާބުކުުރުމަށް ފަހު، މި މަހު ފަސް ވަނަ ދުވަހު ވަނީ ފްރެންޗް އޯޕަން ތަށި އުފުލާލައިފަ އެވެ.
އޮސްޓްރޭލިއަން އޯޕަން އާއި ފްރެންޗް އޯޕަންގެ ކާމިޔާބާ އެކު ނަޑާލް ވަނީ 22 ގްރޭންޑް ސްލޭމް ތަށި ހަމަކޮށް ރެކޯޑް ފުޅާކޮށްފަ އެވެ. އެންމެ ގިނަ ގްރޭންޑް ސްލޭމް ހޯދުމުގެ ރެކޯޑް އޮތް ނަޑާލާ އެންމެ ގާތުން ވާދަކުރަނީ ސްވިޒަލެންޑްގެ ރޮޖާ ފެޑެރާ އާއި ސާބިއާގެ ނޮވަކް ޖޮކޮވިޗް އެވެ. މި ދެ ކުޅުންތެރިންނަށް ކާމިޔާބު ކުރެވުނީ 20 ގްރޭންޑް ސްލޭމް އެވެ.
މަޔޯކާގެ ޓްރެއިނިން ސެންޓަރުގައި ނަޑާލް މެޗެއް ކުޅެނީ: ވިމްބަލްޑަންގައި ކުޅޭގޮތަށް ފައިނަލް ކުރާނީ ލަންޑަންގައި ކުޅޭ އެގްޒިބިޝަން މެޗުތަކަށް ފަހު.-- ފޮޓޯ: އޭއެފްޕީ
މި މަހު 27 ވަނަ ދުވަހު އިންގްލެންޑްގައި ފަށާ ވިމްބަލްޑަންގައި ނަޑާލް ވާދަކުރާނެތޯ ސުވާލު އުފެދިފައިވަނިކޮށް އިއްޔެ ނަޑާލް ބުނީ ވިނައިގައި މި ހަފްތާގައި ކުރަން ފެށި ޕްރެކްޓިހުން ފެނުނު މަންޒަރުތަކަށް ބަލާއިރު، އޭނާގެ އަނިޔާގެ މައްސަލަ އަށް ހައްލެއް ލިބިފައިވާ ކަމަށާއި ވިމްބަލްޑަންގައި ކުޅުމުގެ ފުރުސަތު ބޮޑު ކަމަށެވެ.
"އަހަރެން ހޯމަ ދުވަހު ލަންޑަން އަށް ދާނަން. ގޮސްފައި އެގްޒިބިޝަން އެއް ކުޅެލުމަށް ފަހު ހަފްތާއެއްގެ ޓްރެއިނިން އެއް ވެސް ބޭނުން މި ހުރިހާ ކަމަކަށް ބަލާފައި މުބާރާތުގައި ކުޅޭނީ. އަހަރެންގެ ވިސްނުމުގައި ބުނަންޏާ މުބާރާތުގައި (ވިމްބަލްޑަންގައި) ކުޅެލެވޭ ވަރުވާނެ،" 2008 އާއި 2010 ވަނަ އަހަރު ވިމްބަލްޑަން ކާމިޔާބުކުރި ނަޑާލް ބުންޏެވެ.
މިދިޔަ އަހަރުގެ މުބާރާތުގައި ވެސް ނަޑާލަށް ނުކުޅެވުނީ ފަޔަށް ލިބިފައިވާ އަނިޔާއާ ހެދި އެވެ. އޭގެ ކުރިން އަހަރު ކޮވިޑް-19 އާ ހެދި ވިމްބަލްޑަން ވަނީ ކެންސަލްކޮށްފަ އެވެ. އެހެންކަމުން، ނަޑާލް މި ފަަހަރުގެ މުބާރާތުގައި ކުޅެފިނަމަ މިއީ ތިން އަހަރު ތެރޭ ވިމްބަލްޑަންގައި އޭނާ ފެންނާނެ ފުރަތަމަ ފަހަރެވެ.
"ވިމްބަލްޑަންގައި ކުޅެފައި، ދެން އޮތީ އަރާމްކުރުން، އެ އަށް ފަހު ކެނަޑާ އަށް، ދެން ޔޫއެސް އޯޕަން،" ނަޑާލް މި އަހަރުގެ ޕްލޭންތަކާ ބެހޭގޮތުން ބުންޏެވެ.
ނަޑާލް ބުނީ ފްރެންޗް އޯޕަންގައި ދެއްކުނު ކުޅުމާއި އެ ފަދަ ފޯމެއްގައި ރަނގަޅަށް ފިޓްވެ، ހުރެ ކުޅެފިނަމަ އޭނާ އަށް ވިމްބަލްޑަންގައި ފުރުސަތެއް އެބައޮތް ކަމަށެވެ.
