މި ފަހަރުގެ ވޮލީބޯލް އެސޯސިއޭޝަން ކަޕްގައި ޓީމުތައް ފެންނަނީ ހަމަހަމަކޮށް ކަމަށާއި ޔަގީންކަމާ އެކު ފަސޭހަ މެޗެއް ކަމަށް ބުނެވޭ ވަރުގެ މެޗެއް ނެތް ކަމަށް ސްޕޯޓްސް ކްލަބް ސިޓީގެ ކޯޗު، ނަލަ ހުސެއިން ޝަރީފް ބުނެފި އެވެ.
އެސޯސިއޭޝަން ކަޕްގައި ސިޓީ ކުޅުނު ފުރަތަމަ މެޗުން ވަނީ ސީދާ ތިން ސެޓުން އެންމެ ފަހުގެ ޗެމްޕިއަން ސިފައިން އަތުން މޮޅުވެފަ އެވެ. އެކަމަކު، ދެ ވަނަ މެޗުގައި ވެމްކޯ އަތުން ސިޓީ ވަނީ 3-1 ސެޓުން ބަލިވެފަ އެެވެ. ގަދަ ތިން ޓީމުގެ ތެރޭގައި ހިމެނިގެން ސެމީ ފައިނަލުން ނޫނީ ސީދާ ފައިނަލުގެ ޖާގައެއް ހޯދަން ބަލާއިރު، ބުދަ ދުވަހުގެރޭ ގުޑީސް އަތުން، ސީދާ ތިން ސެޓުން ސިޓީ އަށް ލިބުނީ މުހިންމު މޮޅެކެވެ.
އިއްޔެގެ މެޗުތަކަށް ފަހު އެސޯސިއޭޝަން ކަޕްގެ ލީގު ބުރަށް ބަލާއިރު، އެއް ވަނައިގައި އޮތީ ހަތަރު މެޗުން އަށް ޕޮއިންޓް ހޯދައިގެންނެވެ. ލީގު ބުރުގައި ވެމްކޯ އަށް ބާކީ އޮތީ ހޮނިހިރު ދުވަހުގެރޭ ޕޮލިސް ކްލަބާ ބައްދަލުކުރާ މެޗެވެ. ފުލުގައި ވިއްދާފައި އޮތް ސިފައިންނާއި ފުލުހުންނަށް ވަނީ ހަތް ޕޮއިންޓް ލިބިފަ އެވެ. ހަތަރު ވަނައިގައި އޮތް ސިޓީ އަށް ވަނީ ތިން މެޗުން ހަ ޕޮއިންޓް ލިބިފަ އެެވެ. ގަދަ ތިން ޓީމު ތެރޭގައި ހިމެނުމުގެ ފުރުސަތު އޮތީ މި ހަތަރު ޓީމަށެވެ.
ލީގު ބުރު ނިމޭއިރު، އެއް ވަނަ ދާ ޓީމަކަށް ފައިނަލުގެ ސީދާ ޖާގައެއް ލިބޭނެ އެވެ. އަނެއް ޖާގަ ލިބޭނީ ލީގު ބުރުގެ ދެ ވަނަ އާއި ތިން ވަނަ ކުޅޭ ސެމީ ފައިނަލުން މޮޅުވާ ޓީމަކަށެވެ. އެސޯސިއޭޝަން ކަޕްގައި މިރޭ ޕޮލިހާއި ސިޓީ ބައްދަލުކުރާއިރު، މޮޅުވާ ޓީމަކަށް ގަދަ ތިނެއްގެ ޖާގަ ޔަގީންވާނެ އެވެ.
"މިހާ އެއްވަރެއްގައި ޓީމުތައް މި އުޅެނީ، (އިންޑިއާގެ) ޕްރައިމް ލީގުގައި ކުޅުނު ވަރަށް ރަނގަޅު ޕްލޭޔަރުން އަސްލު މި އުޅެނީ. އެހެންވީމަ ވަކި، ނޭނގޭނެ ނަތީޖާ ކުރިން ޑިސައިޑް ކުރާކަށް. ހަމަ ކުޅުނީމަ އެނގޭނީ، އަސްލު، އަޅުގަނޑުމެން ނުކުންނާނީ އެންމެ ވަރުގަދަކޮށް މޮޅުވާން،" ނަލަ ހުސެއިން ބުންޏެވެ.
ސިޓީ ޓީމުގައި ހިމެނޭ ކުޅުންތެރިންނަށް ބަލާއިރު، އެ ޓީމުގައި ގައުމީ ޓީމުގެ ވައިސް ކެޕްޓަން އަލީ ހުޒާމް (ހުޒަންޓެ) ހިމެނެ އެވެ. މީގެ އިތުރުން ބިދޭސީ ކުޅުންތެރިންގެ ގޮތުގައި ވިނާޔަކް، ހަރްދީޕް އަދި ވިނީތު ހިމެނެ އެވެ.
މިރޭގެ މެޗުގައި ސިޓީއާ ދެކޮޅަށް ނުކުންނަ ޕޮލިހަކީ މިހާތަނަށް މި ފަހަރުގެ މުބާރާތުގައި ބަލިނުވެ އޮތް ހަމައެކަނި ޓީމެވެ. ޕޮލިސް ވަނީ ފުރަތަމަ މެޗުން 3-2 ސެޓުން ގުޑީސް ބަލިކޮށްފަ އެވެ. ދެ ވަނަ މެޗުގައި ފަހަތުން އަރައި، 3-2 ސެޓުން ސިފައިންގެ ކްލަބްގެ މައްޗަށް ކުރިހޯދިއިރު، ތިން ވަނަ މެޗުގައި އޮއްފު އެފްސީ އަތުން ޕޮލިސް މޮޅުވީ ހަމަ ފަހަތުން އަރައި 3-1 ސެޓުންނެވެ.
ޒުވާނުންގެ މަރުކަޒު އެތެރެ ކޯޓުގައި މިރޭ ޕޮލިހާއި ސިޓީ ކުޅޭ މެޗު ފަށަނީ 20:15 ގަ އެވެ.
