ވީއޭއެމް އެސޯސިއޭޝަން ކަޕްގައި މިރޭ ކުޅުނު މެޗުން ގުޑީސް ސްޕޯޓްސް ކްލަބްގެ މައްޗަށް ސީދާ ތިން ސެޓުން ކުރިހޯދައި، ސްޕޯޓްސް ކްލަބް ސިޓީން މުބާރާތުގައި ކުރިއަށް ދިއުމަށް މުހިންމު މޮޅެއް ހޯދައިފި އެވެ.
އެސޯސިއޭޝަން ކަޕްގައި ސިޓީ ކުޅުނު ފުރަތަމަ މެޗުން ވަނީ ސީދާ ތިން ސެޓުން އެންމެ ފަހުގެ ޗެމްޕިއަން ސިފައިން އަތުން މޮޅުވެފަ އެވެ. އެކަމަކު، ދެ ވަނަ މެޗުގައި ވެމްކޯ އަތުން ސިޓީ ވަނީ 3-1 ސެޓުން ބަލިވެފަ އެެވެ. ގަދަ ތިން ޓީމުގެ ތެރޭގައި ހިމެނިގެން ސެމީ ފައިނަލުން ނޫނީ ސީދާ ފައިނަލުގެ ޖާގައެއް ހޯދަން ބަލާއިރު، މިރޭ ގުޑީސް އަތުން ސިޓީ އަށް ލިބުނީ މުހިންމު މޮޅެކެވެ.
ސިޓީން މިރޭގެ މެޗުގެ ސެޓުތައް ގެންދިޔައީ 25-19، 25-18 އަދި 25-19 އިންނެވެ.
ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗަށް ނުކުތްއިރު، ގުޑީސް އަށް އޮތް އެންމެ ބޮޑު ކަންބޮޑުވުމަކީ އެ ޓީމުގެ ކެޕްޓަން އަދި ސެޓަރު، ހުސެއިން ވިޝާމް (ބުޅިކެ) އަނިޔާގައި ހުރުމުގެ މައްސަލަ އެވެ. ބުޅިކެ އަށް ފުރަތަމަ މެޗުގައި އަނިޔާވެގެން ނިމުނުއިރު، ގުޑީސް އިން ދެ ވަނަ މެޗުގައި އޮއްފު އެފްސީ އަތުން ބަލިވިއިރު، އެ މެޗުގައި ބުޅިކެ ނުކުޅެ އެވެ. ބުޅިކެ ނުލައި މިރޭ ވެސް ކުޅެން ޖެހުނުއިރު، މި މެޗު ފަށައިގެން، ފުރަތަމަ ސެޓުގައި ގުޑީސްގެ ބިދޭސީ އެއް ކުޅުންތެރިޔާ، ގޮނިބީދޫ ސިޔާމްސުންދަރު ފަޔަށް އަނިޔާވެގެން ޖެހުނީ ބަދަލު ކުރާށެވެ.
ސިޓީއާ ދެކޮޅަށް މިރޭ ކުޅުނު މެޗުގެ ތެރެއިން ގުޑީސްގެ ނިލާމް (ކ) އެ ޓީމުގެ ހަސަންއާ އެކު.-- ފޮޓޯ: މުހައްމަދު ޝާބިން/ އަދަދު
ގުޑީސް އަށް މިރޭގެ މެޗުގައި ސިޓީ އަށް ޕްރެޝަރު ކޮށްލެވޭ ވަރުގެ ކުޅުމެއް ނުދެއްކުނެވެ. ބައެއް ބޯޅަތަކުގައި ގުޑީސްގެ ހަސަން ނިލާމް (ޕާޓޭ)ގެ އެޓޭކްތައް ކާމިޔާބުވި ނަމަވެސް، ސިޓީން ވަނީ ފަސޭހަކަމާ އެކު މި މެޗުން މޮޅުވެފަ އެވެ. ސިޓީގެ އަލީ ހުޒާމް (ހުޒަަންޓެ) ރަނގަޅު އެޓޭކްތަކެއް ކުރިއިރު، އެ ޓީމުގެ ބިދޭސީ ތިން ކުޅުންތެރިން ކަމަށްވާ، ވިނާޔަކު ރޮކާޑޭ، ވިނީތު ކުމާރް އަދި ހަރްދީޕް ސިންގް ވަނީ ތަފާތު ދައްކައި، ރަނގަޅު ފޯމެއްގައި ކުޅެފަ އެވެ.
މެޗުގެ މޮޅު ކުޅުންތެރިއަކީ ގިނަ ޕޮއިންޓްތަކެއް ސިޓީ އަށް ހޯދައިދިން އައުޓްސައިޑް އެޓޭކަރު ވިނީތު އެވެ.
ސިޓީގެ ކޯޗު ނަލަ ހުސެއިން ޝަރީފް ބުނީ މި މޮޅުގެ ކްރެޑިޓް ހައްގުވަނީ ކުޅުންތެރިންނަށް ކަމަށާއި ޓީމެއްގެ ގޮތުގައި މޮޅުވާން ކުރާ މަސައްކަތް ފާހަގަކުރާ ކަމަށެވެ. ސިޓީ ޓީމުން ކުރިއަށްދާނީ ޓީމެއްގެ ގޮތުގައި އެ ރޫހުގައި ކަމަށްވާއިރު، މިރޭ ލިބުނު މޮޅުގައި އެ ބައި ވަރަށް ބޮޑަށް ފެނިގެންދިޔަ ކަމަށް ނަލަ ވަނީ ބުނެފަ އެވެ.
ސިޓީ އަށް ކުރިއަށް އޮތީ ހުކުރު ދުވަހުގެރޭ ޕޮލިހާ ކުޅޭ މެޗާއި ހޮނިހިރު ދުވަހު ހަވީރު އޮއްފުއާ ބައްދަލުކުރާ މެޗެވެ.
މުބާރާތުގައި މާދަމާ ދެ މެޗެއް ކުޅޭނެ އެވެ. ހަވީރު ކުޅޭ މެޗުގައި އޮއްފު އިން ބައްދަލުކުރާނީ ސިފައިންނާ އެވެ. އެ މެޗު ފަށާނީ 16:15 ގަ އެވެ. އަދި މާދަމާރޭ 20:15 ގައި ކުޅޭ މެޗުގައި ގުޑީސް އާއި ވެމްކޯ ބައްދަލުކުރާނެ އެވެ.
