ވީއޭއެމް އެސޯސިއޭޝަން ކަޕްގެ ފިރިހެން ޑިވިޝަންގައި މިރޭ ކުޅުނު މެޗުތަކުން އެންމެ ފަހުގެ ޗެމްޕިއަން ދިވެހި ސިފައިންގެ ކްލަބް އަތުން ސީދާ ތިން ސެޓުން މޮޅުވެ، ސްޕޯޓްސް ކްލަބް ސިޓީން ވަރުގަދަކޮށް މުބާރާތް ފެށިއިރު، އޮއްފު އެފްސީން ގުޑީސް ސްޕޯޓްސް ކްލަބް ބަލިކޮށްފި އެވެ.
އޮއްފު އިން ގުޑީސްގެ މައްޗަށް ކުރިހޯދީ 3-1 ސެޓުންނެވެ. ފުރަތަމަ މެޗުގައި ގުޑީސް ވަނީ ރޭ ޕޮލިސް އަތުން ބަލިވެފަ އެެވެ. އޮއްފު އަށް ފެށުން ގޯސްވީ ކްލަބް ވެމްކޯ އަތްދަށުވުމުންނެވެ.
ޒުވާނުންގެ މަރުކަޒު އެތެރެ ކޯޓުގައި މިރޭ ކުޅުނު މެޗުގައި ސިޓީން ފެނުނީ ތަފާތު ރޫހެއްގައި ކުޅެލިތަނެވެ. އެ ޓީމުގެ އެންމެ ބޮޑު ތަފާތަކީ ރާއްޖޭގެ ގައުމީ ޓީމުގެ ކެޕްޓަން، އަލީ ހުޒާމް (ހުޒަންޓެ) އާއި އިންޑިއާ ކުޅުންތެރިޔާ ވިނީތު ކުމާރު އެވެ. މި މެޗުގެ ސެޓުތައް ސިޓީން ގެންދިޔައީ، 25-21, 30-28 އަދި 25-18 އިންނެވެ.
ފުރަތަަމަ ސެޓުގައި ސިޓީގެ ވިނީތާއި ހުޒަންޓެގެ ރަނގަޅު ޝޮޓްތަކެއް ފެނިގެންދިޔައިރު، އެ ޓީމުގެ ލިބަރޯ، އަހުމަދު ނަބީލް ވެސް ވަނީ ރަނގަޅު ބޯޅަތަކެއް ކުޅެފަ އެވެ. ސިޓީގެ ބިދޭސީ އަނެއް ދެ ކުުޅުންތެރިން، ވިނާޔަކް އާއި ހަރްދީޕް ސިންގް ވެސް ރަނގަޅު ކުޅުމެއް ދެއްކި ފުރަަތަމަ ސެޓު ސިފައިން ގެންދިޔައީ 25-21 އިންނެވެ. ދެ ވަނަ ސެޓު ފެނުނީ ވަރަށް ފޯރިގަދަކޮށެވެ. ސިފައިން މި ސެޓުގައި ހަ ޕޮއިންޓުގެ ލީޑެއްގައި ވެސް އޮތެވެ. އެކަމަކު، ސިފައިންގެ ސެޓަރު ހުސެއިން ޝާހިދު (ޝާޑު)، ދޭ ބޯޅަތަކުގައި އެ ޓީމުގެ އާދަމް ނަސީމް (އެޑަމް) އާއި ބިދޭސީ ކުޅުންތެރިންގެ ޝޮޓްތައް ބްލޮކްވެ، މެޗުގެ ފަހު ކޮޅަށް ދިޔައިރު، ސިފައިންނަށް އަމިއްލަ އަށް ހެދުނު ގޯސްތަކެއްގެ ފައިދާނަގައި ސިޓީން ދެ ވަަނަ ސެޓު 30-28 އިން ގެންގޮސް މެޗުގެ ކޮންޓްރޯލް ނެގި އެވެ.
ތިން ވަނަ ސެޓުގައި ސިފައިންނަށް އެކަށީގެންވާ ކުޅުމެއް ނުދެއްކި، ސިޓީން މުޅި ސެޓުގައި ރަނގަޅު ލީޑެއްގައި އޮވެ، ނިންމާލި އެވެ. ސިޓީން މި ސެޓު ގެންދިޔައީ 25-18 އިންނެވެ.
މެޗާ ބެހޭގޮތުން ސިޓީގެ ކޯޗު ހުސެއިން ޝަރީފް ބުނީ ތިން ސެޓުން މޮޅުވެވޭނެ ކަމަށް ހީނުކުރާ ކަމަށާއި އެކަމަކު މި ގޮތަށް މޮޅުވުމުގެ ކްރެޑިޓް ދޭނީ ކުޅުންތެރިން ކުރި މަސައްކަތަށް ކަމަށެވެ. ސިފައިންގެ ކޯޗު ޖުނައިދު އަބްދުﷲ ބުނީ އެ ޓީމުގެ އައުޓްސައިޑް އެޓޭކަރުންނަށް މި މެޗުގައި ނުކުޅެވުނުއިރު، އެންމެ ބޮޑު މައްސަލަ އަކީ ބިދޭސީ ކުުޅުންތެރިންނަށް ދިމާވެފައިވާ އަނިޔާގެ މައްސަލަ ކަމަށެވެ.
ގުޑީސްގެ ނިލާމް އަތްމަތިން އޮއްފުގެ އަމިތު ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ/ ނައުޝަމް ވަހީދު
ފުރަތަމަ މެޗުގައި ޕޮލިހާ ދެކޮޅަށް ކުޅެނިކޮށް، ގުޑީސްގެ ކެޕްޓަން، ހުސެއިން ވިޝާމް (ބުޅިކެ)ގެ ފަޔަށް ލިބުނު އަނިޔާގެ ސަބަބުން އޭނާ ރޭގެ މެޗުގައި އޮއްފުއާ ދެކޮޅަށް ނުކުޅެ އެވެ. އޮއްފު އަށް މި މެޗުގައި އެންމެ ބޮޑު މައްސަލަ އަކަށް ދިމާވީ ސެޓަރަށް ނުކުޅެވި، ބިދޭސީ ކުޅުންތެރިންނަށް ވެސް އެކަށީގެންވާ ތަފާތެއް ނުދެއްކުނު މައްސަލަ އެވެ.
އޮއްފުން މި މެޗު 3-1 ސެޓުން ކާމިޔާބުކުރިއިރު، މުޅި މެޗުގައި ވެސް ގުޑީސްގެ ފަރާތުން ގިނަ ގޯސްތަކެއް ފެނިގެންދިޔަ އެވެ. ގުޑީސްގެ ކޯޗަކަށް ހުރި، ގައުމީ ޓީމުގެ ކުރީގެ ކޯޗު ސާބިއާގެ މިލޮރަޑް ކިޔާޗް ވަނީ ވަރަށް ބޮޑަށް ޓީމުގެ ކުޅުމާ މެދު މާޔޫސްވެފަ އެެވެ. އަދި ރެފްރީގެ ގިނަ ނިންމުންތަކާ މެދު މިލޮރަޑް ވަނީ ނުރުހުން ފާޅުކޮށްފަ އެވެ.
މި މެޗުގެ ފުރަތަމަ ސެޓު އޮއްފު އިން ރަނގަޅަށް ކުޅެ، 23-25 އިން ގެންދިޔަ އެވެ. އެކަމަކު، ދެން ކުޅުނު ސެޓުގައި އޮއްފުގެ ފަރާތުން ގިނަ ގޯސްތަކެއް ފެނިގެންދިޔައިރު، ގުޑީސްގެ އެޓޭކަރު، ހަސަން ނިލާމް (ޕާޓޭ) ރަނގަޅު ވަގުތުގައި ޖެހި ޝޮޓްތަކާ އެކު 25-20 އިން ގުޑީސް ސެޓު ގެންދިޔަ އެވެ. އެކަމަކު، ތިން ވަނަ ސެޓު ފަށައިގެން ސިޓީ ޓީމުގެ އަމިތު ގުލިއާގެ ކުޅުން ފެންނަން ފެށި އެވެ. އެ ހިސާބުން، އެ ޓީމުގެ ސެޓަރު، އަހުމަދު ޝިމާއުގެ ބޯޅަތަކުގެ ބޭނުންހިފައި، އެ ޓީމުގެ އަނެއް އެޓޭކަރު، ގުރޫ ޕްރަސަންތުގެ ބާރު ޝޮޓްތަކާ އެކު ތިން ވަނަ ސެޓު، 23-25 އިން ގެންދިޔަ އެވެ.
ހަތަރު ވަނަ ސެޓު ފަށައިގެން ގުޑީސް އަށް ގިނަ ގޯސްތަކެއް ހެދުނުއިރު، އޮއްފު އިން ދިޔައީ އޭގެ ބޭނުންހިފަމުންނެވެ. މި ސެޓުގެ ފަހު ކޮޅުގައި ރޮޓޭޝަންގެ މައްސަލައެއްގައި އެރި އޮޅުމަކާ އެކު ފަހުން ސްކޯ އަށް ބަދަލު ގެނައި ގޮތުން ދެ ޓީމުގެ މެދުގައި ހިތްހަމަނުޖެހުންތަކެއް އުފެދުނެވެ. އޮއްފު އިން 19-23 އިން ކުރީގައި އޮއްވައި، ސްކޯ 19-22 އަށް ބަދަލުކުރުމުން އެ ޓީމުން އެޕީލްކޮށް، ސްކޯ ރަނގަޅުކުރުވި އެވެ. އޭރު ސެޓުގެ ކޮންޓްރޯލް އޮތީ އޮއްފު އަތުގައި ކަމަށްވާއިރު، އަލުން ފެށިތަނުން ދެ ޕޮއިންޓް ހޯދައި، އޮއްފު އިން މެޗު ކާމިޔާބުކުރި އެވެ. އޮއްފުން ފަހު ސެޓު ސެޓު ގެންދިޔައީ 21-25 އިންނެވެ.
ފުރަތަމަ މުބާރާތުގެ ޝެޑިއުލް ހެދިއިރު، ރޭގަނޑު ދެ މެޗު ކުޅޭ ގޮތަށް އޮތް ނަމަވެސް މާދަމާ އިން ފެށިގެން އެއް މެޗު ކުޅޭނީ ހަވީރު އެވެ. އެ ގޮތުން މާދަމާ ހަވީރު ދިވެހި ސިފައިންގެ ކްލަބް ކުޅޭނީ ޕޮލިހާ އެެވެ. އެ މެޗު ފަށާނީ 4:15 ގަ އެވެ. އަދި މާދަމާރޭ 8:15 ގައި ފަށާ މެޗުގައި ސިޓީ ކުޅޭނީ ވެމްކޯއާ އެވެ.
