ވީއޭއެމް އެސޯސިއޭޝަން ކަޕްގެ އަންހެން ބައިގެ ފައިނަލުގައި ޕޮލިސް ކުލަބު އަތުން ސީދާ ތިން ސެޓުން މޮޅުވި މެޗުގައި ކްލަބް ވެމްކޯގެ ކޮންފިޑެންސް ލެވެލާއި ކުޅުންތެރިންގެ ހިތްވަރާއި ޓީމު ރޫހު ފެނުނީ މަތީ ފެންވަރެއްގައި ކަމަށް ވެމްކޯގެ ކޯޗު އައިޝަތު ނާޒިމާ ބުނެފި އެވެ.
އެސޯސިއޭޝަން ކަޕްގެ އަންހެން ބައިގެ ޗެމްޕިއަންކަން ވެމްކޯ އިން ދިފާއުކުރީ ފައިނަލުގައި ޕޮލިސް ކުލަބުގެ މައްޗަށް ފަސޭހަކަމާ އެކު ކުރިހޯދައިގެންނެވެ. މެޗުގެ ސެޓުތައް އެ ޓީމުން ގެންދިޔައީ 25-20، 25-16 އަދި 25-12 އިންނެވެ. މިއީ ފަހުގެ ތާރީހެއްގައި ޕޮލިސް ކުލަބު ގައުމީ ލެވެލްގެ މުބާރާތެއްގެ ފައިނަލެއްގައި މިހާ ތަފާތު ބޮޑުކޮށް ބަލިވި ފަހަރެވެ.
ކުޅުނު ހުރިހާ މެޗަކުން މޮޅުވެގެން ވެމްކޯ އިން ޗެމްޕިއަންކަން ހޯދިއިރު، އެ ޓީމަށް އުނދަގޫ ހާލަތެއް ކުރިމަތިވީ ފުރަތަމަ ސެމީގައި ޕޮލިސް އަތުން 3-2 ސެޓުން މޮޅުވި މެޗުގަ އެވެ.
ފައިނަލް މެޗަށް ފަހު ނާޒިމާ ބުނީ ސެމީ ފައިނަލު މެޗުގައި ޓީމުން ދެއްކި ކުޅުމާ އެކު ފައިނަލުގައި ތަފާތު ދެއްކޭނެ ކަމުގެ ޔަގީންކަން އޮތް ކަމަށެެވެ. އަދި ކުޅުންތެރިންގެ ކޮންފިޑެންސް ލެވެލް ވެސް ހުރީ ވަރަށް ރަނގަޅަށް ކަމަށް ނާޒިމާ ވަނީ ބުނެފަ އެވެ.
"ކޮންފިޑެންސާ އެކު ސީދާ ތިން ސެޓުން މޮޅުވާން ނުކުތީ، އެންމެން ފޯމުގައި ކުޅެ، ކުޅުންތެރިންގެ ހިތްވަރުގެ ނަތީޖާ މި ފެނުނީ،" މުބާރާތުގެ އެންމެ މޮޅު ކޯޗުގެ މަގާމް ހޯދި ނާޒިމާ ބުންޏެވެ.
އަލްހަމްދުލިﷲ ޝުކުރު، ގޯލްޑްއާ އިރާދަކުރެއްވިއްޔާ ރައްޓެހި ހަމަ -- ނާޒިމާ (ވެމްކޯ ކޯޗު)
މުބާރާތުގައި ވެމްކޯ އިން ޖުމްލަ ހަ މެޗު ކުޅުނުއިރު، އެ ޓީމަށް ސެޓު ގެއްލުނީ ހަމައެކަނި ސެމީ ފައިނަލް މެޗުގަ އެވެ. އެ މެޗުގެ ދެ ސެޓު ގެއްލުނު ނަމަވެސް ފައިނަލްގައި ތަފާތު މޮޅުކޮށް ކުޅެ "100 ޕަސެންޓް" ރެކޯޑަކާއިއެކު ވެމްކޯ އިން ތަށި ދިފާއުކުރީ އެވެ.
ނާޒިމާ ބުނީ ސެމީ ފައިނަލްގައި ދެ ސެޓު ގެއްލުނީ ސާވިސްތައް ބޭކާރުކޮށްލެވިގެން ކަމަށެވެ. އަދި އެ މެޗުގެ މިސްޓޭކްތައް ރަނގަޅުކޮށް ޓީމުގެ ހުރިހާ ކުޅުންތެރިން ވެސް ތިބީ ފައިނަލުގައި ހުރިހާ ކަމެއް ރަނގަޅަށް ގެންދަން ފޯކަސް ކޮށްގެން ކަމަށެވެ.
ނާޒިމާ ބުނީ ވެމްކޯގެ އެންމެ ބޮޑު ތަފާތަކީ ޓީމްގެ ރޫހު ކަމަށާއި، ވެމްކޯގައި މަސައްކަތްކުރާ މުވައްޒަފުން އެ ޓީމުގައި ގިނަވުމަކީ އިތުރަށް ޓީމުގެ ކުޅުންތެރިންގެ ގުޅުން ރަނގަޅުވި ސަބަބެއް ކަމަށެވެ.
"ވެމްކޯގެ މުވައްޒަފުން ޓީމްގައި ތިބެފައި. ސަޕޯޓަރުންގެ ސަޕޯޓާއި، ޓީމު ބޮންޑު ވަރުގަދަވާނެ ކޮންމެ ގޮތެއްވިޔަސް. ބޭރުން މަދު ކުޅުންތެރިން ގެނަޔަސް ޓީމް ސްޕިރިޓް ހަމަ ރަނގަޅުކޮށް މި ފެނުނީ." ނާޒިމާ ބުންޏެވެ.
ވެމްކޯގެ ކޯޗު ނާޒިމާ (ވ): އޭނާ ވަނީ މި ކާމިޔާބީގެ ކްރެޑިޓް ވެމްކޯގެ ޓީމަށް ހައްގުވާ ކަމަށް ބުނެފައި،--- ފޮޓޯ: މުހައްމަދު ޝާބިން/ އަދަދު
ނާޒިމާ ބުނީ ވޮލީއާ ދުރުގައި ގިނަ ދުވަސްތަކެއް ވަންދެން ހުރުމަށްފަހު އެނބުރި އައިސް ނުކުމެ "ރަން މެޑަލް" އަކާ އެކު ނިންމާލެވުމަކީ ބޮޑު ހިތްހަމަޖެހުމެއް ކަމަށެވެ. މި ސީޒަންގެ ގައުމީ މުބާރާތަށް ނުކުންނައިރު ވެސް އަޒުމަކީ ތަށި ހޯދުން ކަމަށް ބުނެފައިވެ އެވެ.
"އަލްހަމްދުލިﷲ ޝުކުރު، ގޯލްޑްއާ އިރާދަކުރެއްވިއްޔާ ރައްޓެހި ހަމަ، އަބަދުވެސް ގިވްއަޕް ނުކޮށް މަސައްކަތް ކުރަނީ، އިރާދަކުރެއްވިއްޔާ ނާޒި އަށް އެނގުނު އެއްޗެއްގެ ބޭނުންކޮށް ހަމަކުރިއަށް ދާނަން،" ރާއްޖޭގައި އުފެދުނު އެންމެ މޮޅު އަންހެން ވޮލީބޯޅަ ކުޅުންތެރިންގެ ތެރޭގައި ހިމެނޭ ނާޒިމާ ބުންޏެވެ.
ވެމްކޯ ކުޅުންތެރިންގެ އިތުބާރު ނާޒިމާ އަށް ބޮޑުވުމަކީ މުބާރާތުގައި ކުރިއަށްދާން އެ ޓީމަށް ފަސޭހަވި އެއް ސަބަބެވެ. އަދި ޓީމުގެ ކުޅުންތެރިން ބަހާލައިގެން މުޅި މުބާރާތުގައި ބޭނުންކޮށް، ރަނގަޅު ވަގުތުގައި ކުޅުންތެރިން މެނޭޖްކުރުމުގައި ވެމްކޯ އިން ގިނަ ފަހަރު ރަނގަޅު ގޮތަށް ނިންމާފައިވުމުގެ ނަތީޖާ އަކަށްވުމަކީ މާ ބޮޑު ޕްރެޝަރެއް ނެތި ތަށި ދިފާއުކުރެވުމެވެ.
