ގައުމީ ފިރިހެން ކްރިކެޓް ޓީމުގެ މެނޭޖަރަކަށް އިބްރާހިމް ޝާޒް ހަބީބު ހަމަޖައްސައިފި އެވެ.
ކްރިކެޓްގައި އެކި ގޮތްގޮތުން އަމަލީގޮތުން ހަރަކާތްތެރިވަމުން އަންނަ ޝާޒް، ގައުމީ ކްރިކެޓް ޓީމުގެ މެނޭޖަރަކަށް ހަމަޖައްސާފައިވަނީ އަންނަ މަހު މެލޭޝިއާގައި ކުރިއަށްދާ މުބާރާތަކަށެވެ.
އެއީ އަންނަ މަހު 1-12 އަށް މެލޭޝިއާގައި ބާއްވާ ކުއޮޑް ސީރީސް އަށެވެ. އެެ މުބާރާތުގައި ރާއްޖެ އާއި މެލޭޝިއާގެ އިތުރުން ދެން ވާދަކުރަނީ ބޫޓާން އަދި ތައިލެންޑް އެވެ. މީގެ ކުރިން ވެސް ރާއްޖޭން ވަނީ މި ފަދަ މުބާރާތްތަކުގައި ރަނގަޅު ނަތީޖާތަކެއް ނެރެފަ އެވެ.
މެލޭޝިއާ މުބާރާތަށް ތައްޔާރުވުމުގެ ގޮތުން ގައުމީ ކްރިކެޓް ޓީމުން ސްރީ ލަންކާގައި ޓްރެއިނިން ކޭމްޕެއް ފުރިހަމަ ކުރާ ގޮތަށް ވަނީ ހަމަޖެހިފަ އެވެ. ޓްރެއިނިން ޓުއާ އަށް ދިއުމަށް ހަމަޖެހިފައިވަނީ މި މަހު 21 ވަނަ ދުވަހު އެވެ. މުބާރާތާ ހަމައަށް ލަންކާގައި ކުރިއަށްދާ ޓުއާގައި ބޭނުންވާ ވަރަށް ޓީމު އެކުލަވާލަން ފަސޭހަވެގެންދާނެ އެވެ.
ރާއްޖޭގެ އެންމެ ކާމިޔާބު ފުޓްބޯޯޅަ ކްލަބް، ނިއު ރޭޑިއަންޓް ސްޕޯޓްސް ކްލަބްގެ އެކި މަގާމުތައް މީގެ ކުރިން ފުރުއްވި ޝާޒް އަށް ޒިންމާ ހަވާލުކުރަން ކްރިކެޓް ބޯޑުން ނިންމީ ފުރިހަމަ އިތުބާރާ އެކީ ޓީމުގެ ކަންކަމުގެ ޒިންމާ ފުރިހަމަ އަށް ނެގޭނެ ފަރާތަކާ ކަންކަން ހަވާލުކުރުމުގެ ވިސްނުމުގަ އެވެ. އަދި ކްރިކެޓް ކުޅުންތެރިއެއްގެ ގޮތުގައި ގިނަ ތަޖުރިބާތަކެއް ހާސިލްކޮށްފައިވާ ޝާޒް އަކީ އެޑްމިނިސްޓްރޭޓިވް ކަންކަމުގައި ވެސް ތަޖުރިބާ ހުރި ފަރާތެއް ކަމަށްވާތީ، ކްރިކެޓް ބޯޑުން ނިންމީ ޝާޒް ޓީމުގެ މެނޭޖަރަކަށް ހަމަޖެއްސުމަށެވެ.
އެންމެ ފަހުން ގައުމީ ކްރިކެޓް ޓީމުގެ މެނޭޖަރަކަށް މަސައްކަތް ކޮށްފައިވަނީ މީގެ އަހަރުތަކެއް ކުރިން ވެސް ގައުމީ ކްރިކެޓް ޓީމުގެ މެނޭޖަރުގެ ޒިންމާ އުފުލި އަލި މުހައްމަދު މަނިކު (އަލިބެ) އެވެ.
