ކުރިއަށް އޮތް ދުވަސްތަކުގެ ތެރޭގައި އުތުރު ކޮރެއާ އިން ނިއުކްލިއާ ޓެސްޓެއް ކޮށްފާނެ ކަމުގެ އިންޒާރު އެމެރިކާ އިން ދީފި އެވެ.
މި ހަފުތާގެ އާދިއްތަ ދުވަހު އުތުރު ކޮރެއާ އިން ވަނީ އަށް ބެލިސްޓިކް މިސައިލް ޓެސްޓުކޮށްފަ އެވެ. މިއީ އެއް ދުވަހެއްގެ ތެރޭ އެގައުމުން މިހާ ގިނަ އަދަދަކަށް މިސައިލް ޓެސްޓުކުރި ފުރަތަމަ ފަހަރެވެ.
އެމެރިކާގެ ޑެޕިއުޓީ ސެކްރެޓަރީ އޮފް ސްޓޭޓް ވެންޑީ ޝާމަން ވަނީ އެފަދަ ޓެސްޓެއް ކޮށްފިނަމަ އަވަސް ވަރުގަދަ ރައްދެއް ދޭނެ ކަމުގެ އިންޒާރު އުތުރު ކޮރެއާ އަށް ދީފަ އެވެ.
ފާއިތުވެދިޔަ ފަސް އަހަރު ތެރޭ އުތުރު ކޮރެއާ އިން ނިއުކްލިއާ ޓެސްޓެއް ކޮށްފައެއް ނުވެ އެވެ. މިފަހަރު ޓެސްޓު ވެގެންދާނީ އެގައުމުން ކުރާ ހަތްވަނަ ޓެސްޓަށެވެ.
މިއަހަރުގެ ޖޫން މަހާ ހަމައަށް މިހާތަނަށް 31 މިސައިލެއް އުތުރު ކޮރެއާ އިން ވަނީ ޓެސްޓުކޮށްފަ އެވެ.
މި ހަފުތާގެ ތެރޭގައި ވެސް އުތުރު ކޮރެއާ އިން ނިއުކްލިއާ ޓެސްޓު ކޮށްފާނެ ކަމަށް އެމެރިކާ އިން އެގައުމަށް ކަނޑައަޅާފައި ހުންނަ ހާއްސަ މުޝީރު ސުން ކިމް ވަނީ ވިދާޅުވެފަ އެވެ.
އެމެރިކާ އޮތީ ޑިޕްލޮމެޓިކް ގުޅުންތަކުގެ ތެރެއިން މައްސަލަ ހައްލުކުރަން ތައްޔާރަށް ކަމަށް އެގައުމުން ބުނެ އެވެ.
އުތުރު ކޮރެއާ ގައި ކޮވިޑް-19 ވެސް ފެތުރެމުންދާއިރު އެ ބައްޔާ ދެކޮޅަށް އެހީވުމަށް ވެސް އެމެރިކާ އިން ހުށަހެޅި އެވެ. ނަމަވެސް، 25 މިލިއަން މީހުންގެ އާބާދީއެއް އޮންނަ އުތުރު ކޮރެއާ އިން އަދި އެއްވެސް ޖަވާބެއް ދީފައެއް ނުވެ އެވެ.
