ތާލިބާނުން އަފްގާނިސްތާނުގެ ރިޔާސީ ގަނޑުވަރު ހިފުމުގެ ކުރިން އެތަން ދޫކުރައްވައި އޭރުގެ ރައީސް އަޝްރަފް ގަނީ ވަޑައިގެންނެވިއިރު ފަސް މިލިއަން ޑޮލަރު ގެއްލިފައިވާ ކަމަށް ސްޕެޝަލް އިންސްޕެކްޓަރު ޖެނެރަލް ފޯ އަފްގާނިސްތާނު ރީކޮންސްޓްރަކްޝަން ނެރުއްވި ރިޕޯޓަކުން ހާމަވެއްޖެ އެވެ.
އޭރު ތުހުމަތު ކުރެވުނު ގޮތުގައި ގަނީ ގައުމު ދޫކުރައްވައި ވަޑައިގެންނެވީ އެތައް މިލިއަން ޑޮލަރެއް ހިއްޕަވައިގެންނެވެ. ނަމަވެސް، މި ރިޕޯޓުން އެނގޭ ގޮތުގައި ގަނީ ގެންދިޔައީ އެއަށްވުރެ މަދު އަދަދެކެވެ. ބެލެވޭ ގޮތުގައި އޭނާ ގެންދެވީ ގާތްގަނޑަކަށް ފަސް ލައްކަ ޑޮލަރެވެ.
މި ރިޕޯޓުގައިވާ ގޮތުން ރިޔާސީ ގަނޑުވަރުން ފަސް މިލިއަން ޑޮލަރު ނެގީ ރައީސްގެ ހަށިފާރަވެރިންނެވެ. އެ މީހުން އެ ފައިސާ ނެގީ ގަނީ ހެލިކޮޕްޓަރުގައި ފުރާވަޑައިގެންނެވުމުންނެވެ. އޭރު ތާލިބާނުން އަދި ރިޔާސީ ގަނޑުވަރަށް ނުވަދެ އެވެ.
އޭގެ އިތުރުން އެގައުމުގެ ދައުލަތުގެ ހާޒާނާ އިން ވެސް އެތައް މިލިއަން ޑޮލަރެއް ވަނީ ގެއްލިފަ އެވެ. އެ ފައިސާ ނެގި ބަޔަކު މިހާތަނަށް އެނގިފައެއް ނުވެ އެވެ.
ޔޫއޭއީގައި މިވަގުތު ދިރިއުޅުއްވާ ގަނީ އަށް ތުހުމަތު ކުރެވުނީ އަފްގާނިސްތާނުގެ މާލިއްޔާތުން 169 މިލިއަން ޑޮލަރު ގެންދެވި ކަމަށެވެ.
ގަނީ ވަނީ އެ ތުހުމަތުތައް އޭރު ވެސް ދޮގުކުރައްވާފަ އެވެ.
