ވޮލީބޯލް އެސޯސިއޭޝަން ކަޕްގެ އަންހެން ޑިވިޝަންގެ ސެމީ ފައިނަލުގެ މެޗުތައް މިރޭ ކުރިއަށްދާނެ އެވެ.
ސެމީ ފައިނަލު ފުރަތަމަ މެޗުގައި އެންމެ ފަހުގެ ޗެމްޕިއަން ވެމްކޯ ނުކުންނާނީ ޕޮލިސް ކުލަބާއި ދެކޮޅަށެވެ. ސެމީގެ ދެ ވަނަ މެޗުގައި މިރޭ ކުލަބު ވޮލީބޯލް ނުކުންނާނީ ކުލަބު އީގަލްސް އާއި ދެކޮޅަށެވެ.
ދެ ސެމީ ފައިނަލް ވެސް ފޯރިގަދަ ވާނެކަމަށް ބެލެވޭއިރު، ޕޮލިހާއި ވެމްކޯ ވާދަކުރާ މެޗަކީ މިހާތަނަށް މި މުބާރާތުގެ އެންމެ ވަރުގަދަ މެޗަށް ވާނެ އެވެ. މި ދެ ޓީމުން ވެސް ވަނީ ގްރޫޕް ސްޓޭޖުގައި ކުޅުނު ހުރިހާ މެޗެއް ފަސޭހަކަމާ އެކު ކާމިޔާބުކޮށްފަ އެވެ.
ވެމްކޯ ހިމެނޭ ގްރޫޕް އޭގައި އެ ޓީމު ކުޅުނު ހަތަރު މެޗުގައި އެންމެ ސެޓެއް ވެސް ގެއްލިފަ އެއް ނުވެ އެވެ. އަނެއް ކޮޅުން ވެމްކޯ އިން ގްރޫޕް ސްޓޭޖުގައި 12 ސެޓު ކުޅުނުއިރު، އެ ޓީމާއި ދެކޮޅަށް ސެޓެއްގައި 10 އަށް ވުރެ މަތިން ހޯދުނީ އެންމެ ދެ ފަހަރެވެ. ހިންމަފުށި ވިކްޓޯރިއަސް ކުލަބުން ވެމްކޯއާ ދެކޮޅަށް އެއް ސެޓުގައި 11 ޕޮއިންޓް ހޯދިއިރު، ގްރޫޕުގެ ފަހު މެޗުގެ ފަހު ސެޓުގައި ކުލަބު ވޮލީބޯލްއިން 16 ޕޮއިންޓް ހޯދި އެވެ.
އެހެންކަމުން، ޕޮލިސް ކުލަބު ކަހަލަ ވަރުގަދަ ޓީމަކާ ދެކޮޅަށް މިރޭ ކުޅޭ މެޗަކީ ކޯޗު އައިޝަތު ނާޒިމާ އިރުޝާދު ދެމުން އަންނަ ވެމްކޯގެ އަސްލު ފެންވަރު ވަޒަންކޮށްލަން ލިބޭނެ ރަނގަޅު ފުރުސަތެކެވެ. މިހާތަނަށް އިދިކޮޅަށް ކުޅުނު ޓީމުތަކަށް ވަރުގަދަ ވާދައެއް ނުކުރެވޭތީ ވެމްކޯގައި ތިބި ކުޅުންތެރިންގެ ހަގީގީ ފެންވަރު ނުފެނެ އެވެ. އެ ގޮތުން ސެޓަރު ޖޫޒާން ޒަރީރު، އެޓޭކަރު އައިޝަތު މާޖިދާ އަދި ބިދޭސީ ކުޅުންތެރިޔާ ޕަޗަރަޕޯން ސިތިސާދުގެ ފޯމު ވަޒަން ކޮށްލަން މިރޭގެ މެޗަކީ ރަނގަޅު އިމްތިހާނެކެވެ.
ޕޮލިހަށް ބަލާއިރު އެޓީމުން ގްރޫޕް ސްޓޭޖު ފެށީވެސް ވަރުގަދަކޮށެވެ. އަންހެން ވޮލީގެ ތަޖުރިބާކާރު ގިނަ ކުޅުންތެރިންތަކަކާ އެކު ނުކުތް ކުލަބު އީގަލްސްގެ މައްޗަށް ޕޮލިހުން ސީދާ ތިން ސެޓުން ކުރި ހޯދި އެވެ. އޭގެ ފަހުން ސިފައިންގެ މައްޗަށް ވެސް ތިން ސެޓުން ކުރި ހޯދި އެވެ. ފަހު މެޗުގައި ކުލަބު ޔޫތް ނިއުޖެނެރޭޝަންގެ މައްޗަށް ކުރި ހޯދީވެސް އިތުބާރާ އެކު ކުޅެގެންނެވެ.
ގްރޫޕް ސްޓޭޖުގައި ދެއްކި ކުޅުމަށް ބަލާއިރު، ދިވެހި ދެ އެޓޭކަރުން ކަމަށްވާ ހައްވާ ރާޝިދާ އަދި އައިޝަތު ޝަހާ ޝާމިންގެ ކުޅުން ފާހަގަކުރެވެ އެވެ. އިދިކޮޅަށް ކުޅުނު ޓީމްތަކުގައި ރަނގަޅު ބިދޭސީ ކުޅުންތެރިން ތިބުމުން ކޯޗު މުހައްމަދު ނަދީމް (ނަދީމްބެ) އަށް ޓީމު ރަނގަޅަށް ޓެސްޓް ކޮށްލަން ވެސް ލިބިއްޖެ އެވެ. ބިދޭސީ ކުޅުންތެރިޔާ ނޭޕާލްގެ ކަމަނާ ބިސްތާ ވެސް އަންނަނީ ޓީމުގެ ކުޅުމަށް ހޭނި ރަނގަޅު ކުޅުމެއް ދައްކަމުންނެވެ.
ދެ ވަނަ ސެމީ ފައިނަލުގައި ވާދަކުރާ ދެ ޓީމްގެ ތެރެއިން އީގަލްސް އަކީ މުބާރާތަށް ވަރުގަދަ އަށް ތައްޔާރުވި ޓީމެކެވެ. ލަންކާގެ އެޓޭކަރު ދިނޭޝާ ޕްރަސާދަނީއާ އެކު ގައުމީ ޓީމުގެ ސީނިއާ ގިނަ ކުޅުންތެރިން ހިމަނައިގެން ތައްޔާރުކޮށްފައި އޮތް އީގަލްސް ގްރޫޕް ސްޓޭޖުގައި ބަލިވީ ޕޮލިސް ކުލަބު އަތުންނެވެ. އަނެއްކޮޅުން ވާދަވެރި މެޗުތަކެއް ކުޅެފައި ސެމީ އަށް އެ ޓީމު ނުކުންނާތީ ކޯޗު މުނާ މުނީރު (މުންނަ) ލިބޭނެ ހިތްހަމަޖެހުން ބޮޑުވާނެ އެވެ.
ކުލަބު ވޮލީބޯލް އަކީ މިފަހަރު އެއްވަރެއްގެ ގިނަ ޓީމްތަކެއް ވާދަކުރި ގްރޫޕް އޭގެ ދެ ވަނަ ޓީމެވެ. އެ ޓީމް ބަލިވީ ޗެމްޕިއަން ވެމްކޯ އަތުން އެކަންޏެވެ. އަލްމާ ސްޕޯޓްސް، ހިންމަފުށި އަދި ޔޫތު ނިއުޖެނެރޭޝަން އަތުން އެ ޓީމު މޮޅުވީ ވާދަވެރި މެޗުތަކެއް ކުޅެގެންނެވެ. ސެމީ ފައިނަލުގައި އީގަލްސް އަށް ވަރުގަދަ ވާދައެއް ދޭނެކަމަށް ބެލެވޭ ކުލަބު ވޮލީބޯލް އަށް އިރުޝާދު ދެނީ އަބްދުލްހަސީބް އިބްރާހިމް އެވެ.
