ބަންގްލަދޭޝްގެ ސިޓީއެއް ކަމަށްވާ ޗިޓަގޮންގައި ހުންނަ ކޮންޓެއިނަރު ރައްކާ ކުރާ ތަނެއްގައި ހުރި ކޮންޓެއިނަރުތަކެއްގައި ރޯވެ ހިނގި ހާދިސާއެއްގައި 25 މީހުން މަރުވެ 100 އަށްވުރެ ގިނަ މީހުން ޒަހަމްވެއްޖެ އެވެ.
ރިޕޯޓުތައް ބުނާ ގޮތުގައި މި ކޮންޓެއިނަރުތަކުގައި ހުރީ އަލިފާން ހިފާ ޒާތުގެ ކެމިކަލް އެވެ. އަދި، ކޮންޓެއިނަރުތައް ގޮވުމުން އަލިފާންގަނޑު ބޮޑު ހިސާބަކަށް ފެތުރި އެތައް ބަޔަކަށް އަނިޔާވީ އެވެ.
އެ ކޮންޓެއިނަރުތަކުގައި ރޯވާން މެދުވެރިވި ސަބަބެއް އަދި މިހާތަނަށް ހޯދިފައެއް ނުވެ އެވެ.
އެ ސަރަހައްދުގެ ހޮސްޕިޓަލްތަކަށް އަނިޔާވެފައިވާ އެންމެނަށް ފަރުވާ ނުދެވިދާނެ ކަމަށް ބެލެވޭއިރު ލޭ ހޯދުމަށް އާންމުންގެ އެހީއަށް ވަނީ އެދިފަ އެވެ.
އަނިޔާވެގެން ހޮސްޕިޓަލަށް ގެންދިޔަ މީހުންގެ ތެރޭގައި ގިނައީ ހަށިގަނޑުގެ 60 ޕަސެންޓާއި ޕަސެންޓާ ދޭތެރޭ ފިހިފައިވާ މީހުންނެވެ. ގިނަ މީހުން ތިބީ ސީރިއަސް ހާލަތުގަ އެވެ.
އަނިޔާ ލިބުނު މީހުންގެ ތެރޭގައި އެ ތަނުގައި މަސައްކަތްކުރާ މީހުންނާއި އަލިފާން ރޯވުމުން ނިއްވުމަށް ހަރަކާތްތެރިވި ސިފައިންނާއި ފުލުހުން ހިމެނެ އެވެ.
އެ ގޮވުމަށް އެތައް ގަޑިއިރެއް ވެފައިވާއިރު މިއަދު ހެނދުނު ވެސް އަލިފާން އެއްކޮށް ނިއްވާލެވިފައެއް ނުވެ އެވެ. ގޮވުމުގެ އަސަރު ހަތަރު ކިލޯމީޓަރު ދުރުގައި ހުރި ތަންތަނަށް ވެސް ކުރި ކަމަށް ރިޕޯޓުތައް ބުނެ އެވެ.
އަލިފާން ރޯވެ މީހުން މަރުވުމަކީ ބަންގްލަދޭޝްގައި އާންމުކޮށް ހިނގާ ކަމެކެވެ.
މި ހާދިސާ ހިނގީ 6،500 ކޮންޓެއިނަރުގެ ޖާގަ ހުންނަ ތަނެއްގަ އެވެ. އެތަނުގައި ގާތްގަނޑަކަށް 600 އަށްވުރެ ގިނަ މީހުން މަސައްކަތްކުރެ އެވެ.
