ވޮލީބޯޅަ އެސޯސިއޭޝަން ކަޕްގެ އަންހެން ޑިވިޝަނުގެ ގްރޫޕް ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށް ގްރޫޕް އޭގެ އެއް ވަނަ ކުލަބު ވެމްކޯ އިން ހޯދިއިރު، ގްރޫޕް ބީގެ އެއް ވަނަ ޕޮލިސް ކުލަބުން ހޯދައިފި އެވެ.
މި ދިޔަ މަހުގެ 24 ވަނަ ދުވަހު ފެށި އެސޯސިއޭޝަން ކަޕްގެ ގްރޫޕް ސްޓޭޖުގެ މެޗުތައް ނިމުނުއިރު، ގްރޫޕް އޭ އިން ސެމީ ފައިނަލަށް ދިޔައީ ވެމްކޯ އާއި ކުލަބު ވޮލީބޯލް އެވެ. ގްރޫޕް ބީގެ އެއް ވަނަ ޕޮލިހަށް ލިބުނު އިރު، ދެ ވަނަ އަށް ދިޔައީ ކުލަބު އީގަލްސް އެވެ.
މުބާރާތުގެ ސެމީ ފައިނަލް ފުރަތަމަ މެޗުގައި ވާދަކުރާނީ އެންމެ ފަހުގެ ފައިނަލުގައި ވާދަކުރި ދެ ޓީމް ކަމަށްވާ ވެމްކޯ އާއި ޕޮލިހެވެ. މި މެޗުން މޮޅުވާ ޓީމެއް ސީދާ ފައިނަލަށް ދަތުރުކުރާއިރު، ބަލިވާ ޓީމެއް ތިން ވަނަ ސެމީ ފައިނަލުގައި ނުކުންނާނީ ދެ ވަނަ ސެމީ ފައިނަލުގައި އީގަލްސް އާއި ކުލަބު ވޮލީބޯލް ވާދަކުރާ މެޗުން މޮޅުވާ ޓީމަކާ ދެކޮޅަށެވެ.
މުބާރާތުގެ ގްރޫޕް އޭގެ ފަހު މެޗުގައި ވާދަކުރީ ކުލަބު ވޮލީބޯލް އާއި ވެމްކޯ އެވެ. މި މެޗަށް ނުކުތްއިރު ވެސް ދެ ޓީމަށް ސެމީގެ ޖާގަ ޔަގީންވެފައި އޮތުމުން ދެ ޓީމުން ވެސް ފެނުނީ ގިނަ އެކްސްޕެރިމެންޓްތަކެއް ކުރިތަނެވެ. ބިދޭސީ ކުޅުންތެރިއަކާއި ނުލައި މުބާރާތަށް ނުކުތް ކުލަބު ވޮލީބޯލް އަށް ވެމްކޯގެ ކުރިމަތީގައި މާ ބޮޑު ކަމެއް ނުކުރެވުނެވެ. ވެމްކޯ އިން ސީދާ ތިން ސެޓުން މި މެޗު ކާމިޔާބުކުރީ 25-9، 25-9، އަދި 25-16 އިންނެވެ. މެޗު މޮޅު ކުޅުންތެރިޔާގެ މަގާމް ހޯދީ ވެމްކޯގެ ތައިލެންޑް ކުޅުންތެރިޔާ ޕަޗަރަޕޯން ސިތިސާދް އެވެ.
ރޭގެ މެޗުގެ ތެރެއިން ވެމްކޯގެ ރީމް ބޯޅަ ފޮނުވާލަނީ.-- ފޮޓޯ: އިމޭޖަސް.އެމްވީ/ އިސްމާއިލް ތޯރިގު
ގްރޫޕް ބީގެ ފަހު މެޗުގައި ޕޮލިސް ކުލަބުން ނުކުތީ ވޮލީބޯލް ޔޫތު ނިއުޖެނެރޭޝަންއާ ދެކޮޅަށެވެ. މި މެޗުން މޮޅުވެގެން ވޮލީބޯލް ޔޫތް ނިއުޖެނެރޭޝަން އަށް ސެމީ ފައިނަލުން ޖާގަ ލިބެން އޮތް ނަމަވެސް އެ ޓީމް 3-1 ސެޓުން ބަލިވީ އެވެ. ވޮލީބޯލް ޔޫތް ނިއުޖެނެރޭޝަން މި މެޗުން ބަލިވުމުން ގްރޫޕްގެ ދެ ވަނަ ލިބުނީ ރޭ ކުޅިބަލަން ތިބި އީގަލްސް އަށެވެ.
ޕޮލިހުގެ ކެޕްޓަން، ހައްވާ ރާޝިދާ އާއި އެ ޓީމުގެ ބިދޭސީ ކުޅުންތެރިޔާ، ނޭޕާލް ކަމަނާ ބިސްތާގެ މޮޅު ކުޅުމާ އެކު ޕޮލިހުން ކާމިޔާބުކުރި މެޗުގެ ސެޓުތައް އެ ޓީމުން ގެންދިޔައީ 25-18، 18-25، 25-14 އަދި 25-6 އިންނެވެ. މި މެޗުގެ މޮޅު ކުޅުންތެރިއަކަށް ހޮވުނީ ޕޮލިހުގެ ކެޕްޓަން ހައްވަ އެވެ.
ފުރަތަމަ ސެޓުގައި ޕޮލިހުން ރަނގަޅު ހަމަލާތައް ފޮނުވާލައި، ރަނގަޅު ރޫހެއްގައި ކުޅެގެން މެޗުގެ ކޮންޓްރޯލް ނެގި އެވެ. ޕޮލިހުގެ ސެޓަރު ހައިފާ އިމާދުގެ ރަނގަޅު ބޯޅަތަކާ އެކު ހައްވަ އާއި ޝަހާ ޝާމިން އަދި ކަމަނަގެ އެޓޭކްތައް މި ސެޓުގައި ފެނުނީ ރަނގަޅަށެވެ. އެކަމަކު، ދެ ވަނަ ސެޓުގައި ވޮލީބޯލް ޔޫތު ނިއުޖެނެރޭޝަން އިން ވަރަށް ބޮޑަށް ކުޅުން ރަނގަޅުކުރި އެވެ. އެ ޓީމުގެ ކެޕްޓަން ޝަމްހާ ރިޔާޒް (ޝަމްކޮ) އާއި ނަރީމާ އިދުރީސް (ނަންނި) އަދި ސްރީ ލަންކާ ކުޅުންތެރިޔާ، ތިލިނީ ވަސާނާ ޕެރޭރާގެ ރަނގަޅު ކުޅުމެއް ފެނުނުއިރު، އެ ޓީމުން މި ސެޓު ގެންދިޔަ އެވެ.
ދެ ވަނަ ސެޓުގައި ވޮލީބޯލް ޔޫތު ނިއުޖެނެރޭޝަން އިން ދެއްކި ކުޅުން އަލުން ތަކުރާރުކުރުން ވީ އުނދަގޫ ކަމަަކަށެވެ. ޕޮލިހުގެ ތަޖުރިބާކާރު ކުޅުންތެރިން ތަފާތު ދައްކައި، ތިން ވަނަ ސެޓާއި ހަތަރު ވަނަ ސެޓު ގެންދިޔަ އެވެ. ޕޮލިސް ގޭމްގެ ތެރޭގައި ބޭއްވުމަށް އެ ޓީމުގެ ކޯޗު، މުހައްމަދު ނަދީމް (ނަދީމްބެ) ރަނގަޅު ވަގުތު ޓައިމްއައުޓްތަކެއް ނަގައި، ޓީމު ހަމަޔަކަށް އެޅުވުމުގައި ކާމިޔާބު ހޯދި އެވެ.
މުބާރާތުގެ ސެމީ ފައިނަލު ފުރަތަމަ މެޗުގައި ޕޮލިހާއި ވެމްކޯ ކުޅޭނީ މާދަމާ ހަވީރެވެ. ދެ ވަނަ ސެމީ ފައިނަލް މާދަމާ ރޭ ކްލަބް ވޮލީބޯލް އާއި ކްލަބް އީގަލްސް ކުޅުމަށް ހަމަޖެހިފައިވާއިރު، ފަހު ސެމީ ފައިނަލް މެޗު ކުޅޭނީ އަންގާރަ ދުވަހުރެ އެވެ. ފައިނަލް މެޗު އޮންނާނީ އަންނަ ބުރާސްފަތި ދުވަހުގެ ރޭގަނޑު 20:15ގަ އެވެ.
