ރާއްޖޭގެ ވަޒީފާގެ ބާޒާރުގައި އިތުރު ފުރުސަތުތައް ފަހިކޮށްދީ އެފަދަ ފަރާތްތަކަށް އިނާޔަތް ދެވޭނެ ފަންޑެއް ގާއިމުކުރަން ވާލްޑް ބޭންކުން 24 މިލިއަން ޑޮލަރުގެ އެހީ ދޭން ނިންމައިފި އެވެ.
ވާލްޑް ބޭންކުން ބުނީ ރާއްޖޭގެ އިގުތިސޯދީ ދުވެލި ބާރު ނަމަވެސް، ހާއްސަކޮށް ޒުވާނުންގެ މެދުގައި ވަޒީފާ ނެތް ފަރާތްތައް ގިނަ ކަމަށެވެ. އަދި ވަޒީފާ އަދާކުރާ އަންހެނުންގެ ނިސްބަތް މަދުއިރު، އަތޮޅު ތެރޭގައި ވަޒީފާ ލިބުމުގެ ދަތިކަން އެބައޮތް ކަމަށް ވާލްޑް ބޭންކުން ބުންޏެވެ.
މީގެ ސަބަބުން، ރިސޯޓުތަކަށް ބޭނުންވާ ފަންނީ މަސައްކަތްތެރިން ލިބުމުގައި ދަތިކަމާ ކުރިމަތިވެފައިވާއިރު، މުވައްޒަފުންގެ އާމްދަނީއަށް ކުރާ އަސަރު ކުޑަކުރަން މިހާރު އޮތް ހަމައެކަނި ވަސީލަތަކީ ޕެންޝަން ކަމަށް ވެސް ބުނެފައިވެ އެވެ.
ވާލްޑް ބޭންކުން އިތުރަށް ބުނީ ހާއްސަކޮށް ކޮވިޑާ ގުޅިގެން އާމްދަނީއަށް ކުރި އަސަރު ކުޑަކުރަން ޒުވާނުންގެ މެދުގައި އަމިއްލަ މަސައްކަތެއް ކޮށްގެން ދެމެހެއްޓެނިވި ގޮތެއްގައި އާމްދަނީ ހޯދުމަށް ގިނަ ގޮންޖެހުންތައް ދިމާވެފައިވާ ކަމަށެވެ.
"ކޮވިޑުގެ ސަބަބުން ވަޒީފާ ގެއްލުނު ފަރާތްތައް ގިނަވެފައިވާ ކަމަށް ބެލެވޭއިރު، އެފަދަ ފަރާތްތައް އެނބުރި ވަޒީފާގެ މައިދާނަށް ނުކުތުމަށް އެހީތެރިކަން ބޭނުންވޭ،" ވާލްޑް ބޭންކުން ރާއްޖޭގެ އިތުރުން ނޭޕާލާއި ސްރީލަންކާއަށް ކަނޑައަޅާފައިވާ ކަންޓްރީ ޑިރެކްޓަރު ފާރިސް ހަދާދު ޒާވޮސް ވިދާޅުވި އެވެ.
އޭނާ ވިދާޅުވި ގޮތުގައި ވާލްޑް ބޭންކުގެ މި އެހީގެ އަމާޒަކީ އިގުތިސޯދީ މުހިންމު ދާއިރާތައް ކަމަށްވާ ޓޫރިޒަމާއި އިއާދަކުރަނިވި ހަކަތައިގެ ދާއިރާއިން ވަޒީފާގެ ފުރުސަތުތައް އިތުރުކޮށްދީ އަތޮޅު ތެރޭގައި އިޖުތިމާއީ ހިދުމަތްތައް ފުޅާކުރުން ކަމަށެވެ.
"ސަސްޓެއިނަބަލް އެންޑް އިންޓިގްރޭޓެޑް ލޭބާ ސާވިސަސް" (ސެއިލްސް)ގެ އަމާޒަކީ ވަޒީފާ ނެތް ފަރާތްތަކަށް އިންޝޫރަންސް ސްކީމެއް ގާއިމުކޮށް ދިނުމާއެކު އެފަދަ ފަރާތްތަކަށް އެހީތެރިވެދޭނެ ނިޒާމެއް ގާއިމުކުރުން ކަމަށް ވާލްޑް ބޭންކުން ބުނެ އެވެ.
މިގޮތުން، ޕެންޝަން އޮފީސް މެދުވެރިކޮށް ވަޒީފާ ދޭ ފަރާތްތަކާއި ވަޒީފާ އަދާ ކުރާ ފަރާތްތަކުން ފައިސާ ޖަމާކުރާ ފަންޑެއް ގާއިމުކޮށް، އެ ފަންޑުން ވަޒީފާ ގެއްލޭ ހާލަތްތަކުގައި އިނާޔަތެއް ދެވޭނެ ނިޒާމެއް ގާއިމުކުރެވޭނެ ކަމަށް ވާލްޑް ބޭންކުން އިތުރަށް ބުންޏެވެ.
އަމިއްލަ މަސައްކަތް ކުރާ ފަރާތްތަކުން ވެސް މި ފަންޑަށް ފައިސާ ޖަމާކޮށް، މުސްތަގުބަލުގައި އާމްދަނީއަށް ކޮށްފާނެ ނޭދެވޭ އަސަރުތަކުން އަރައިގަތުމަށް އެ އިނާޔަތް ހޯދޭނެ ކަމަށް ބުނެފައިވެ އެވެ.
މީގެ އިތުރުން، އިކޮނޮމިކް މިނިސްޓްރީން ގާއިމުކޮށްފައިވާ ޖޮބް ސެންޓަރު ރާއްޖޭގެ ފަސް ސަރަހައްދަކަށް ފުޅާކޮށް، އެ ސެންޓަރުތައް މެދުވެރިކޮށް ކައުންސެލިންގެ ހިދުމަތާއި، ވަޒީފާ ހޯދުމާއި، ހާއްސަ ޓްރޭނިންތައް ކުރިއަށް ގެންދެވޭއިރު، އަންހެނުންނަށް ހާއްސަ ޕްރޮގްރާމްތަކެއް ވެސް ހިންގުމަށް ވެސް ވަނީ ހަމަޖެހިފަ އެވެ.
"ކޮވިޑުގެ ބަލިމަޑުކަމުގެ ނޭދެވޭ އަސަރު، އަމިއްލަ މަސައްކަތް ކުރާ ފަރާތްތަކަށް ވަނީ ވަރަށް ބޮޑަށް ކޮށްފައި. އެ ފަރާތްކަކަށް ސަރުކާރުން ދިން އެހީއިން ކޮންމެވެސް މިންވަރެއްގެ ލުޔެއް ލިބުނު ނަމަވެސް، ވަރަށް ގިނަ ފަރާތްތަކުގެ ވަޒީފާ ގެއްލި ނޫނީ ނޯޕޭއަށް ވަނީ ފޮނުވާލާފައި،" ވާލްޑް ބޭންކުގެ ސީނިއާ އިކޮނޮމިސްޓް ތޯމަސް ވޯކާ ވިދާޅުވި އެވެ.
އޭނާ ވިދާޅުވީ މިފަދަ އިޖުތިމާއީ ފަންޑެއް ގާއިމުކުރުމުން، މުސްތަގުބަލުގައި އިގުތިސޯދަށް އަތުވެދާނެ ހީނަރުކަމުން އަރައިގަތުމަށް އާންމު ފަރުދުންގެ އިތުރުން ގައުމަށް ވެސް ބޮޑަށް ފަސޭހަވެގެން ދާނެ ކަމަށެވެ.
