ތަކެތީގެ އަގުތައް އުފުލެމުންދިޔުމާ ގުޅިގެން ޖަރުމަނުގެ ރައްޔިތުންނަށް އެންމެ ނުވަ ޔޫރޯއަށް އެއްގަމު ދަތުރުފަތުރު ކުރެވޭ ގޮތަށް އެގައުމުގެ ސަރުކާރުން ހަމަޖައްސައިފި އެވެ.
ސަރުކާރުގެ އިސް ނެގުމަށް ގެނައި މި ބަދަލުގެ ތެރެއިން ބަހާއި، ރޭލު އަދި މެޓްރޯގައި ކުރާ ދަތުރުތައް ހިމެނެ އެވެ. ނަމަވެސް، އެއް ސިޓީން އަނެއް ސިޓީއަށް ކުރާ ދަތުރުތައް އޭގެ ތެރޭގައި ނުހިމެނެ އެވެ.
މި ނުވަ ޔޫރޯގެ ޓިކެޓު ތައާރަފްކުރަން ނިންމީ އަމިއްލަ ކާރުތައް ދޫކުރުމަށް މީހުންނަށް ބާރު ވެސް އެޅުމުގެ ގޮތުންނެވެ.
ޖަރުމަނުން ވަނީ ތެލުން ނަގާ ޓެކްސް ވެސް 30 ސެންޓުން ކުޑަކޮށްފަ އެވެ. އެއާ އެކު އެ ގައުމުން އެންމެ ދެ ޔޫރޯ އަށް ޕެޓްރޯލް ލީޓަރެއް ލިބެ އެވެ.
މި ހުރިހާ ބަދަލެއް ވެސް ގެނައީ ކުރިއަށް އޮތް ތިން މަސް ދުވަހަށެވެ.
މިހާތަނަށް ނުވަ ޔޫރޯއަށް ވިއްކާ ޓިކެޓުގެ ހަތް މިލިއަން ޓިކެޓު ވިކިފައިވާ ކަމަށް ޖަރުމަނުގެ ޓްރާންސްޕޯޓު މިނިސްޓްރީން ބުނެ އެވެ. އޭގެ ސަބަބުން ރޭލުތަކަށް ބާރުބޮޑުވެ ޑިލޭ ކުރަން ވެސް ވަނީ ޖެހިފަ އެވެ.
ޖަރުމަނުގެ އިންފްލޭޝަން ރޭޓު ވެސް މިދިޔަ މަހުގެ ތެރޭގައި ވަނީ 7.9 ޕަސެންޓަށް އުފުލިފަ އެވެ. އެއީ ދުނިޔޭގެ މަޝްރަހަށް އަންނަމުންދާ ބަދަލުތަކާއި ގުޅިގެންނެވެ. ވަކިން ހާއްސަކޮށް ރަޝިއާ-ޔޫކްރެއިން ހަނގުރާމައާ ވިދިގެންނެވެ.
