މިދިޔަ އަހަރުގެ ފެބްރުއަރީ މަހު މިޔަންމާގައި ހިންގި އަސްކަރީ ބަގާވާތާ ދެކޮޅަށް ތެދުވި އާންމުންނާއި އަސްކަރިއްޔާ އާ ދެމެދު ހިނގަމުންދާ ހަމަނުޖެހުންތަކާއި ގުޅިގެން މިލިއަނެއްހާ މީހުންގެ ގެދޮރު ގެއްލިފައިވާ ކަމަށް އދ. އިން ބުނެފި އެވެ.
އަންގް ސަން ސޫ ކީގެ ވެރިކަން ވައްޓާލުމަށް ފަހު މިހާތަނަށް އައިއިރު 700،000 އަށްވުރެ ގިނަ މީހުން ގެދޮރު ދޫކޮށް ފިލާފައިވާ ކަމަށް އދ. ގެ ހިއުމެނިޓޭރިއަން އެފެއާޒް އޮފީހުން ވަނީ ބުނެފަ އެވެ. އެ އަދަދު މިލިއަނަކާ ގާތް ކުރާނެ ކަމަށް ބެލެވެ އެވެ.
އަސްކަރީ ބަގާވާތާ ދެކޮޅަށް ހަތިޔާރު އެޅި އާންމުންގެ ގްރޫޕްތަކުން ވެސް އަންނަނީ ހަރަކާތްތެރިވަމުންނެވެ. އެފަދަ ގްރޫޕްތަކާ ދެކޮޅަށް ބާރުގައި ތިބި އަސްކަރިއްޔާ އިން ގެންދަނީ އަނިޔާވެރިވެ އެތައް ބަޔަކު މަރަމުންނެވެ.
މިހާތަނަށް އައިއިރު މި ހަމަނުޖެހުންތަކުގެ ތެރެއިން 1،800 އަށްވުރެ ގިނަ މީހުން މަރާލައި 13،000 އަށް ވުރެ ގިނަ މީހުން އަސްކަރިއްޔާގެ ބެލުމުގެ ދަށަށް ވަނީ ގެންގޮސްފަ އެވެ.
ބަގާވާތުގެ ފަހުން މިހާތަނަށް އާންމުންނަށް ނިސްބަތްވާ 12،000 ތަނެއްގައި ހުޅުޖަހައި އަންދާލާފައިވާ ކަމަށް ބެލެވެ އެވެ.
މޯބައިލް ފޯނުގެ ހިދުމަތް ބައެއް ސަރަހައްދުތަކުގައި ކަނޑާލާފައިވުމާ ގުޅިގެން ޒަރޫރީ ބައެއް ބޭނުންތައް ފުއްދަން ވެސް ވަނީ ދަތިވެފަ އެވެ.
މިޔަންމާއަށް ކުރިއަށް އޮތީ ވިއްސާރަ މޫސުން ކަމަށްވުމުން ގެދޮރު ދޫކޮށް ދިޔަ މީހުންނާ މެދު އދ. ގެ ކަންބޮޑުވުން އެބައޮތެވެ.
