އިސްތިއުނާފީ މުއްދަތު ހަމަވި ފަހުން ހައިކޯޓަށް މައްސަލަ ހުށަހެޅުމުން އުމުރުން 14 އަހަރުގެ އިސްމާއިލް ޝައްފާން ޝަރީފަށް ހަމަލާދީ މަރާލި ކަމުގެ ކުށް ސާބިތުވެފައިވާ ހަތަރު މީހުންގެ މައްސަލަ ބަލައިނުގަންނަން ނިންމައިފި އެވެ.
ގްރޭޑް ހަތެއްގައި ކިޔަވަމުންދިޔަ ޝަައްފާން މަރައިލި މައްސަލައިގައި ކުރިމިނަލް ކޯޓުން އުމުރަށް ޖަލަށްލުމަށް ހުކުމްކޮށްފައި ވަނީ ސ. ހިތަދޫ، ޗަމަން، ހުސައިން ނިހާދު އަހްމަދާއި ސ. މަރަދޫ، މޫންލައިޓްގްލޯރީ، ހަސަން ނަބާހް އާއި ސ. ހިތަދޫ، މަލަ، މުހައްމަދު އައިމަން ހަބީބާއި މއ. ޓޮމާޓާ ފްލާވާ، ހުސައިން ޖައިލަމުގެ މައްޗަށެވެ.
މީގެ ތިން އަހަރު ކުރިން އޮކްޓޯބަރު 11، 2018، ގައި ޝައްފާނު މަރާލީ، އޮޓޯ ގަރާޖު ކައިރިން ދަންވަރު ދޭއް ޖަހަން އުޅެނިކޮށެވެ. އޭނާގެ ހަށިގަނޑުގެ އަށް ތަނަކަށް ވަޅިން ހަމަލާދީފައި ހުއްޓެވެ. މި މައްސަލާގައި ހަތަރު މީހުންގެ މައްޗަށް ހުކުމް އިއްވީ މިދިޔަ އަހަރުގެ ނޮވެމްބަރު މަހުގެ 28 ވަނަ ދުވަހު އެވެ.
ނަމަވެސް, ހައިކޯޓަށް އިސްތިއުނާފަށް ހުށަހަޅާފައިވަނީ އޭޕްރީލް 13, 2022ގަ އެވެ. އެއީ, އިސްތިއުނާފު ކުރުމަށް އޮންނަ މުއްދަތަށްވުރެ ފަހުގެ ތާރީހެކެވެ. އިސްތިއުނާފު ހުށަހެޅުން ލަސްވީ ޖަލުގައި ހުރުމުން ދިމާވި ގޮންޖެހުންތަކާއި ވަކީލުން ފަސްޖެހުމާއި އާއިލާއާ މަޝްވަރާކޮށް ކަންކަން ކުރަން ޖެހެމުން ނެގި މުއްދަތުގެ ސަބަބުން ކަމަށް އެމީހުން ވަނީ ބުނެފަ އެވެ.
މިކަމުގައި ގޮތެއް ނިންމަވަމުން ހައިކޯޓުގެ ފަނޑިޔާރު ހަސަން ޝަފީއު ވިދާޅުވީ އިސްތިއުނާފު ކުރުމަށް ބޭނުންވާ ދަށު ކޯޓުގެ ޝަރީއަތް ނިންމި ގޮތުގެ ރިޕޯޓް ހޯދުމަށް ވެސް އެދިފައިވަނީ ޑިސެމްބަރު 16, 2021 ގައި ކަމާއި އެ ރިޕޯޓް ފެބުރުއަރީ 10, 2022 ދޫކޮށްފައިވާ ކަމަށެވެ. އެ ރިޕޯޓަށް އެދުން ލަސްވި ސަބަބެއް ބަޔާންކޮށްފައިނުވާ ކަމާއި ޖަލުގައި އޮތުމާއި ވަކީލަކު ނުވާ ކަމަށް ބުނުމަކީ އިސްތިއުނާފު މުއްދަތުގެ ބޭރުން ހުއްދަ ދޭން ޖެހޭ ސަބަބެއް ނޫން ކަމަށް ފަނޑިޔާރު ވިދާޅުވެފައިވެ އެވެ.
ފަނޑިޔާރު ހުސެއިން ޝަހީދު ވެސް ވިދާޅުވީ އިސްތިއުނާފީ މުއްދަތުގައި އިސްތިއުނާފު ކުރުމުގެ އެއްވެސް ޝައުގެއް ފާޅުކޮށްފައި ނެތް ކަމާއި އިސްތިއުނާފީ މުއްދަތުގައި މައްސަލަ ހުށަނޭޅުނު ސަބަބެއް ބަޔާންކޮށްފައި ނެތް ކަމަށެވެ. ނަމަވެސް, ފަނޑިޔާރު ފާތިމަތު ފަރްހީޒާ ވިދާޅުވި ގޮތުގައި, ޝަރީއަތް ނިމުނު ގޮތުގެ ރިޕޯޓް ދޫކުރި ދުވަހުން, އިސްތިއުނާފީ މުއްދަތު ހަމަވުމުގެ ކުރިން މައްސަލަ ހުށަހަޅާފައިވާތީ, އިސްތިއުނާފަށް ހުއްދަ ދޭން ފެނެ އެވެ.
ދެ ފަނޑިޔާރުންގެ އަގުލަބިއްޔަތު ލިބުނީ އިސްތިއުނާފަށް ހުއްދަ ނުދޭން ކަމުގައިވާތީ, ހައިކޯޓުން ވަނީ ހަތަރު މީހުންގެ މައްސަލަ ވެސް ބޭރުކޮށްލާފަ އެވެ. އެކަމަކު, އެމީހުން ބުނާ ގޮތުގައި ކޯޓުގެ ފުރަތަމަ މަރުހަލާގެ ހުކުމް ބިނާވެގެން ވަނީ ވަރަށް ފާޅުކަން ބޮޑު ގޮތެއްގައި އަދުލު އިންސާފަށް ހުރަސްއެޅޭ ގޮތަށެވެ.
ކްރިމިނަލް ކޯޓުން ހުކުމް ކުރި މީހުން ތެރޭގައި ހިމެނޭ ނިހާދާއި ޖައިލަމްގެ މައްޗަށް ދައުލަތުން އުފުލީ ގަސްދުގައި މީހަކު މެރުމުގެ ދައުވާ އެވެ. ނަބާހް އާއި އައިމަންގެ މައްޗަށް އުފުލީ ގަސްދުގައި މީހަކު މަރާލުމަށް އެހީވުމުގެ ކުށުގެ ދައުވާ އެވެ.
ހާދިސާ ހިނގި ދުވަހުން ފެށިގެން ޖަލު ބަންދުގައި ތިބި ދައުވާ ލިބުނު ހަތަރު މީހުންގެ މައްޗަށް ކްރިމަނަލް ކޯޓުން އުމުރު ދުވަހަށް ޖަލަށްލާން އަންގައި, އެމީހުން މެރުމަށް ހުކުމް ނުކުރީ ދައުލަތުން ހުށަހެޅި ސިއްރު ހެކިވެރިޔަކު އޭނާގެ ހެކިބަސް އަނބުރާ ގެންދިއުމަށް އެދި ކޯޓަށް ސިޓީ ހުށަހަޅުއްވާފައިވާތީ ކަމަށް އެ މައްސަލަ ބެއްލެވި ގާޒީ ހަސަން ސައީދު ވިދާޅުވެފައިވެ އެވެ.
