ވޮލީބޯޅަ އެސޯސިއޭޝަން ކަޕްގެ އަންހެން ޑިވިޝަންގެ ސެމީ ފައިނަލުން އެންމެ ފަހުގެ ޗެމްޕިއަން، ކުލަބު ވެމްކޯ އާއި އެންމެ ފަހުގެ ރަނަރަޕް ޕޮލިސް ކުލަބު ޖާގަ ހޯދައިފި އެވެ.
ވޮލީބޯޅަ ސީޒަންގެ ފުރަތަމަ އަންހެން މުބާރާތުގެ ސެމީ ފައިނަލުން ޗެމްޕިއަން ވެމްކޯ ޖާގަ ހޯދީ ގްރޫޕް ސްޓޭޖުގައި މިހާތަނަށް ކުޅުނު ތިން މެޗުވެސް ކާމިޔާބު ކޮށްގެންނެވެ. މި ގްރޫޕުން ދެން ސެމީގެ ޖާގައެއް ހޯދީ ކުލަބު ވޮލީބޯލް އެވެ.
ގްރޫޕް ބީ އިން ސެމީ ފައިނަލްގެ ޖާގަ އެއް ޔަގީންކޮށްފައިވާ ޕޮލިހުން ވެސް ވަނީ މިހާތަނަށް ކުޅުނު ތިން މެޗު ކާމިޔާބުކޮށްފަ އެވެ.
މުބާރާތުގެ އެންމެ ފަހުގެ ޗެމްޕިއަން ވެމްކޯ އެންމެ ފަހުން ކުޅުނު މެޗު ކާމިޔާބުކުރީ ހިންމަފުށި ވިކްޓޯރިއަސް ސްޕޯޓްސް ކުލަބާ ވާދަކޮށް ސީދާ ތިން ސެޓުންނެވެ. މި މެޗުގެ ސެޓުތައް ވެމްކޯ އިން ގެންދިޔައީ 25-7، 25-11 އަދި 25-4 އިންނެވެ. މެޗުގެ މޮޅު ކުޅުންތެރިޔާގެ މަގާމަށް ހޮވުނީ ވެމްކޯގެ އައިޝަތު މާޖިދާ އެވެ.
ވެމްކޯ އަތުން ހިންމަފުށި ބަލިވުމުން ބާކީ އެއް މެޗު އޮއްވާ ކުލަބު ވޮލީބޯލް އަށް ވަނީ ސެމީގެ ޖާގަ ޔަގީންވެފަ އެވެ. ކުލަބު ވޮލީބޯލް އަށް ބާކީ އޮތީ ވެމްކޯއާ ދެކޮޅަށް ކުޅޭ ގްރޫޕުގެ ފަހު މެޗެވެ. މި މެޗުން މޮޅުވާ ޓީމަކަށް ގްރޫޕުގެ އެއް ވަނަ ލިބޭނެ އެވެ.
ގްރޫޕް ބީގައި ޕޮލިހުގެ ވަރުގަދަ ފެށުން އެ ޓީމުން ދެމެހެއްޓީ ތިން ވަނަ މެޗުގައި ހާފް ލައިން ލިންކޭޖް ސީދާ ތިން ސެޓު އެއް ސެޓުން ބަލިކޮށްގެންނެވެ.
ރޭގެ މެޗުގެ ފުރަތަމަ ދެ ސެޓުން ޕޮލިހުން ފަސޭހަކަމާއެކު 25-8، 25-3 އިން ކާމިޔާބުކުރި އެވެ. ތިން ވަނަ ސެޓުގައި މުހިންމު ގިނަ ކުޅުންތެރިން ބެންޗަށް ލުމަށް ފަހު އާ ގިނަ ކުޅުންތެރިންނަށް ޕޮލިހުން ފުރުސަތު ދިނެވެ. އޭގެ ފައިދާ ނަގައި ހާފްލައިންލިންކޭޖުން ނަގައި، މި ސެޓު 23-25 އިން ކާމިޔާބުކުރި އެވެ.
އެކަމަކު، ހަތަރު ވަނަ ސެޓުގައި އަނެއްކާ ވެސް ޕޮލިހުން ކުޅުން ވަރުގަދަކޮށް 25-5 އިން ސެޓު ގެންގޮސް، މެޗު ކާމިޔާބުކުރި އެވެ. މެޗުގެ މޮޅު ކުޅުންތެރިޔާގެ މަގާމް ހޯދީ ޕޮލިސް ކުލަބުގެ ނޭޕާލް އެޓޭކަރު ކަމަނާ ބިސްތާ އެވެ.
މުބާރާތުގެ މެޗެއް ދެން އޮންނާނީ އަންނަ ހުކުރު ދުވަހުގެ ރޭ އެވެ. ގްރޫޕް ސްޓޭޖުގެ ފަހު މެޗުތައް ކުރިއަށް ހުރިއިރު، ހުކުރު ދުވަހުގެ ރޭ ކުޅޭ ފުރަތަމަ މެޗުގައި ވާދަކުރާނީ އަލްމާ ސްޕޯޓްސް ކުލަބާއި ޔޫތު ނިއު ޖެނެރޭޝަނެވެ. އެރޭ ކުޅޭ ފަހު މެޗުގައި ކުލަބު އީގަލްސް ނުކުންނާނީ ދިވެހި ސިފައިންގެ ކުލަބާއި ދެކޮޅަށެވެ.
