ރަޝިއާ އިން އުފައްދާ ތެޔޮ ގަތުން ހުއްޓާލުމަށް ޔޫރަޕިއަން ޔޫނިއަންގެ ގައުމުތަކުން އެއްބަސްވުމާ ގުޅިގެން ދުނިޔޭގެ ބާޒާރުގައި ތެލުގެ އަގު މިދިޔަ ދެ މަސްދުވަހުގެ ތެރޭގައި ނުއުފުލޭ މިންވަރަށް އުފުލިއްޖެ އެވެ.
އަންގާރަ ދުވަހު ސާފުނުކުރާ ތެޔޮ ފީފާއެއްގެ އަގު ހުރީ 123 ޑޮލަރުގަ އެވެ. މިއީ މިދިޔަ ދެ މަސް ދުވަހުގެ ތެރޭގައި ސާފު ނުކުރާ ތެޔޮ ފީފާއެއްގެ އަގު މިހާ މައްޗަށް އުފުލުނު ފުރަތަމަ ފަހަރެވެ.
އީޔޫގެ 27 މެމްބަރު ގައުމުން ވަނީ ރަޝިއާ އިން އުފައްދާ ތެލުގެ ތެރެއިން ކަނޑުމަގުން އެގައުމުތަކަށް އެތެރެކުރާ ތެޔޮ ގަތުން ހުއްޓާލުމަށް އެއްބަސްވެފަ އެވެ. އޭގެ އިތުރުން، އެއްގަމު މަގުން ގެންނަ ތެޔޮ ނުގަންނަން ޖަރުމަނާއި ޕޮލެންޑުން ވަނީ ނިންމާފަ އެވެ.
މިއާ އެކު ރަޝިއާއިން ބޭރުކުރާ ތެލުގެ 90 ޕަސެންޓު ވަނީ ބްލޮކްވެފަ އެވެ.
ދުނިޔޭގެ ބާޒާރުގައި ތެލުގެ އަގު އުފުލުމުން ދިޔުމާ ގުޅިގެން އެހެނިހެން އެއްޗެހީގެ އަގުތައް ވެސް ވަނީ އުފުލެން ފަށައިފަ އެވެ. ރަޝިއާ އިން ޔޫކްރެއިނަށް އަރައި ހަމަލާދޭން ފެށިފަހުން ދުނިޔޭގެ ބާޒާރުގައި ތަކެތީގެ އަގުތައް ދަނީ ބޮޑުތަނުން އުފުލެމުންނެވެ.
އީޔޫގެ ގައުމުތަކުން ބޭނުންކުރާ ތެލުގެ ތެރެއިން އަހަރެއްގެ މައްޗަށް 27 ޕަސެންޓު ފޯރުކޮށްދެނީ ރަޝިއާ އިންނެވެ. އޭގެ ބަދަލުގައި އަހަރެއްގެ މައްޗަށް 400 ބިލިއަން ޔޫރޯ އީޔޫން ރަޝިއާއަށް ދައްކަ އެވެ.
މިދިޔަ އަހަރުގެ ތެރޭގައި ސާފުނުކުރާ ތެޔޮ ފީފާގެ އަގު ވަނީ 70 ޕަސެންޓު އުފުލިފަ އެވެ.
