ޓައިވާނުގެ އެއާ ޑިފެންސް ޒޯނުގެ ތެރެއަށް ޗައިނާގެ 30 ޖެޓު ވަދެއްޖެ އެވެ. މިއީ ޖެނުއަރީގެ ފަހުން މިހާ ގިނަ އަދަދެއްގެ ހަނގުރާމަ މަތީ މަތިންދާބޯޓުތަކެއް ޓައިވާނުގެ އެއާ ޑިފެންސް ސަރަހައްދަށް ވަން ފުރަތަމަ ފަހަރެވެ.
މިގޮތަށް ޗައިނާއިން އަމަލުކޮށްފައި މިވަނީ ޓައިވާނަށް އަރައިގެން ނުވާނެ ކަމަށް ބުނެ އެމެރިކާގެ ރައީސް ޖޯ ބައިޑެން އެ ގައުމަށް އިންޒާރު ދެއްވިތާ މަދު ދުވަސްކޮޅެއްގެ ތެރޭގަ އެވެ. އަދި، އެމެރިކާގެ އިސް އޮފިޝަލުންތަކެއް ވެސް ގެންދަނީ އެ ގައުމަށް ދަތުރެއް ކުރަމުންނެވެ.
ތަމްރީނުތަކެއް ކަމަށް ބުނެ ޗައިނާ އިން ވަނީ ވައިގެ މަގުން ހިންގާ އޮޕަރޭޝަންތަކުގެ އަދަދު މިދިޔަ ދުވަސްތަކުގެ ތެރޭގައި ވަރަށް ބޮޑަށް އިތުރުކޮށްފަ އެވެ. އެކަމާ ގުޅިގެން ޓައިވާނުގެ ނުުރުހުން ޗައިނާއަށް އަމާޒުވެ ދެގައުމުގެ މެދުގައި ނުތަނަވަސްކަން ވަނީ އުފެދިފަ އެވެ.
ޗައިނާއިން ދެކޭ ގޮތުގައި ޓައިވާނަކީ އެ ގައުމުގެ ޕްރޮވިންސެކެވެ. އަދި، ބޭނުންވެއްޖެ ހާލަތެއްގައި ބާރުގެ ބޭނުންކޮށްގެން ޗައިނާގެ ބާރުގެ ދަށަށް ޓައިވާން ގެނެވޭނެ ކަމަށް އެގައުމުން ގަބޫލުކުރެ އެވެ.
ޓައިވާނުގެ އެއާ ޑިފެންސް ޒޯނަށް ވަން ނަމަވެސް, ޗައިނާގެ ޖެޓުތައް ޓައިވާނުގެ ވައިގެ ސަރަހައްދަށް ވަދެފައެއް ނުވެ އެވެ. ޓައިވާނުގެ ވައިގެ ސަރަހައްދަށް ވަން ނަމަ ބަލާނީ ހަނގުރާމައިގެ އަމަލެއްގެ ގޮތުގަ އެވެ.
އެއާ ޑިފެންސް ޒޯނުތަކަކީ ކޮންމެ ގައުމެއްގެ ވެސް ސަރަހައްދުގެ ބޭރުން އެހެން ގައުމުތަކުގެ ވައިގެ އުޅަނދުތައް މޮނީޓާކޮށް ކޮންޓްރޯލްކުރާ ސަރަހައްދެކެވެ. އެއީ ކޮންމެ ގައުމަކުން ވެސް އަމިއްލައަށް ކަނޑައަޅާ ސަރަހައްދެކެވެ. ގައުމީ ސަލާމަތަށް ނުރައްކަލެއް ކުރިމަތިވެދާނެތީ މޮނީޓާކުރި ނަމަވެސް އެއީ ބައިނަލްއަގްވާމީ ވައިގެ ސަރަހައްދުތަކެކެވެ.
