މިދިޔަ އަހަރުގެ އޮކްޓޯބަރުގެ މަހުގެ 25 ވަނަ ދުވަހު ސޫދާންގައި ހިންގި ބަގާވާތާ ގުޅިގެން އެ ގައުމުގައި ހިންގަމުން އައި ކުއްލި ނުރައްކަލުގެ ހާލަތު އުވާލައިފި އެވެ.
އެ ގައުމުގެ ވެރިކަން ކުރަމުން އަންނަ ކައުންސިލުން ވަނީ ސިފައިންގެ ވެރިޔެއްގެ ގޮތުގައި ހުންނެވި ޖެނެރަލް އަބްދުލް ފައްތާހު ކުއްލި ނުރައްކަލުގެ ހާލަތު އުވާލަން ހާއްސަ ގަރާރެއް ނެރެއްވި ކަމަށް އިއްޔެ ހާމަކޮށްފަ އެވެ.
މިއީ ވެރިކަމުގެ ބާރުތައް ދެފުށް ފެންނަ ގޮތަކަށް ބަދަލުކުރުމުގެ ފުރުސަތު ދިނުމުގެ ގޮތުން ނިންމި ނިންމުމެއް ކަމަށް އެ ކައުންސިލުން ބުނެފައިވެ އެވެ.
މި ނިންމުން ނިންމާފައި ވަނީ އެ ކައުންސިލުން އިއްޔެ އަސްކަރިއްޔާގެ އިސްވެރިންނާ އެކު ބޭއްވި ބައްދަލުވުމަށް ފަހު އެވެ. މި ބައްދަލުވުމުގައި ވަނީ ކުއްލި ނުރައްކަލުގެ ހާލަތުގެ ދަށުން ހައްޔަރު ކުރި މީހުން ވެސް ދޫކޮށްލުމަށް މަޝްވަރާ ކޮށްފަ އެވެ.
މިދިޔަ ބުރާސްފަތި ދުވަހު ވެސް ބަގާވާތާ ދެކޮޅަށް އެ ގައުމުގައި ކުރި މުޒާހަރާއެއްގައި ވަނީ ދެ މީހުން މަރުވެފަ އެވެ. އެކަމާ ގުޅިގެން އދ. ގެ ސްޕެޝަލް ރެޕެޓުއާ ވެސް ވަނީ ކަންބޮޑުވުން ފާޅުކުރައްވާފަ އެވެ.
ބަގާވާތާ ދެކޮޅަށް ވަރުގަދަ މުޒާހަރާތަކެއް އެ ގައުމުގައި ވަނީ ކޮށްފަ އެވެ. އެ މުޒާހަރާތަކުގައި 100 އަށް ވުރެ ގިނަ މީހުން މަރުވެ އެތައް ސަތޭކަ ބަޔަކު ޒަހަމް ވެފައިވާ ކަމަށް ބެލެވެ އެވެ.
އެ ހާލަތު އުވާލާފައި ވަނީ ޓްރާންސިޝަނަލް ކެބިނެޓު އުވާލުމަށް ފަހު އެވެ. ސޫދާން މިވަގުތު އޮތީ އިގްތިސާދީ ގޮތުން ވެސް ވަރަށް ދަތި ހާލަތެއްގަ އެވެ. ގިނަ އަދަދެއްގެ ގައުމުތަކުން ވަނީ އެ ގައުމާ ދެކޮޅަށް ދަތިކުރުމުގެ ފިޔަވަޅުތަކެއް ވެސް އަޅާފަ އެވެ.
އެހެންކަމުން، މި ނިންމުމާ އެކު އެ ގައުމަށް މި ދަތި ހާލަތުން އަރައި ގަތުމަށް އިތުރު އެހީއަކަށް ވެގެންދާނެ ކަމަށް ބެލެވެ އެވެ.
