މިހާރު ކުރިއަށްދާ ވޮލީބޯލް އެސޯސިއޭޝަން ކަޕްގެ އަންހެން ޑިވިޝަނުގައި ކުޅުނު ދެ ވަނަ މެޗުން ޕޮލިސް ކްލަބާއި ކްލަބް ވެމްކޯ ފަސޭހަކަމާ އެކު މޮޅުވެއްޖެ އެވެ.
އެންމެ ފަހުން 2019 ވަނަ އަހަރުގެ އެސޯސިއޭޝަން ކަޕްގެ ފައިނަލުގައި ވާދަކުރި ޕޮލިހާއި ވެމްކޯ އިން މި ފަހަރުގެ މުބާރާތް ފަށާފައިމި ވަނީ ވަރުގަދަ ފޯމެއްގަ އެވެ. މި ދެ ޓީމުން ކުޅުނު ފުރަތަމަ ދެ މެޗުން ވެސް މޮޅުވީ ސީދާ ތިން ސެޓުންނެވެ. ވެމްކޯ އިން ފުރަތަމަ މެޗުގައި އަލްމާ ސްޕޯޓްސް ކްލަބް ތިން ސެޓުން ބަލިކުރިއިރު، ރޭ ޔޫތު ނިއު ޖެނެރޭޝަން އަތުން މޮޅުވީ ވެސް ތިން ސެޓުންނެވެ. ޕޮލިހުން ފުރަތަމަ މެޗުގައި ވަރުގަދަ ޓީމެއް އެކުލަވާލާފައި އޮތް ކްލަބް އީގަލްސް ބަލިކުރީ ތިން ސެޓުންނެވެ. އަދި ރޭ ވަނީ ދިވެހި ސިފައިންގެ ކްލަބް އަތުން ވެސް ސީދާ ތިން ސެޓުން މޮޅުވެފަ އެވެ.
ޒުވާނުންގެ މަރުކަޒު އެތެރެ ކޯޓުގައި ރޭ ކުޅުނު ފުރަތަމަ މެޗުގައި ޔޫތު ނިއު ޖެނެރޭޝަން ކައިރީގައި ވެމްކޯ އިން ވަނީ އެ ޓީމުގެ މޮޅު ކުޅުން ތަކުރާރުކޮށްފަ އެވެ. އެއްވެސް ސެޓެއްގައި ޔޫތު ނިއު ޖެނެރޭޝަނަށް ރަނގަޅު ފައިޓެއް ނުދެވުނުއިރު، ވެމްކޯގެ ހަމަލާތައް ހުއްޓުވޭނެ ހައްލެއް ވެސް ނުހޯދެ އެވެ. ވެމްކޯ އިން ސެޓޫތައް ގެންދިޔައީ 25-07، 25-07 އަދި 25-08 އިންނެވެ. މެޗުގެ މޮޅު ކުޅުންތެރިއަކީ ވެމްކޯގެ ސެޓަރު ފާތިމަތު ޖޫޒާން ޒަރީރު އެވެ.
ސިފައިންގެ ޓީމުން ފުރަތަމަ މެޗުގައި ވަނީ ހާފްލައިންލިންކްއޭޖް ބަލިކޮށްފަ އެވެ. އެކަމަކު، ރޭ ސިފައިންނާ އިދިކޮޅަށް ނުކުމެ އޮތް ޕޮލިހުގައި ތިބީ ހުނަރުވެރި މޮޅު ކުޅުންތެރިންނެވެ. ގައުމީ ޓީމުގެ ކެޕްޓަން، ހައްވާ ރާޝިދާ (ހައްވަ) އާއި ޝަހާ ޝާމިންގެ މޮޅު ކުޅުމާ އެކު ޕޮލިހުން ވަނީ ފުރަތަމަ ސެޓު، 25-15 އިން ގެންގޮސްފަ އެވެ. ފުރަތަމަ ސެޓު ގެއްލުމުން ސިފައިން ދެ ވަނަ ސެޓުގައި ރަނގަޅު ހިތްވަރެއް ކުރި އެވެ. އެކަމަކު، ފަހު ވަގުތު ޕޮލިހުން ތަފާތު ދައްކައި، ސެޓު ނިންމުމުގެ ތަޖުރިބާގެ ބޭނުން ހިފި އެވެ. ސިފައިންގެ މައްޗަށް ދެ ވަނަ ސެޓުގައި ޕޮލިހުން ކުރިހޯދީ 31-29 އިންނެވެ.
ދެ ވަނަ ސެޓު އެހާ ވާދަވެރިކޮށް ގޮސް، ސިފައިންގެ ޓީމަށް ގެއްލުމުން ތިން ވަނަ ސެޓުގައި އެ ޓީމުގެ ކިބައިން ކޮންމެވެސް ވަރަކަށް ވަރުބަލިކަން ފެނި، އޭގެ ފައިދާ ޕޮލިހުން ނެގި އެވެ. ޕޮލިހުން ތިން ވަނަ ސެޓު ގެންދިޔައީ 25-19 އިންނެވެ. މެޗުގެ މޮޅު ކުޅުންތެރިއަކީ ޕޮލިހުގެ ކެޕްޓަން، ހައްވަ އެވެ.
މުބާރާތުގައި މިރޭ ވެސް ދެ މެޗެއް ކުޅޭނެ އެވެ. ފުރަތަމަ މެޗުގައި އަލްމާ ސްޕޯޓްސް ކްލަބް ނުކުންނާނީ ހިންމަފުށި ވިކްޓޯރިއަސް ސްޕޯޓްސް ކުލަބްއާ ދެކޮޅަށެވެ. އެ މެޗު އޮތީ 20:15 ގަ އެވެ. ދެ ވަނަ މެޗު 21:45 ގައި ފަށާއިރު، ކްލަބް އީގަލްސް ނުކުންނާނީ ހާފްލައިންލިންްކްއޭޖާ ދެކޮޅަށެވެ.
