ދުނިޔޭގެ އިގުތިސޯދީ ހާލަތު ނާޒުކު ފައްތަރެއްގައި އޮތް އިރު، އެކަމުގެ ދަތިތައް ރާއްޖެއަށް ވެސް ކުރިމަތިވެދާނޭ ކަމުގެ އިންޒާރު ދެއްވައި، އެކަމަށް ދުރާލައި ތައްޔާރުވާންޖެހޭ ކަމަށް ބޭންކް އޮފް މޯލްޑިވްސް (ބީއެމްއެލް) ގެ ސީއީއޯ ޓިމް ސޯޔާ މިރޭ ވިދާޅުވެއްޖެ އެވެ.
މިހާރު ކުރިއަށްދާ ބީއެމްއެލްގެ މިދިޔަ އަހަރުގެ އަހަރީ އާންމު ޖަލްސާގައި ވާހަކަ ދައްކަވަމުން ސޯޔާ ވިދާޅުވީ ދުނިޔޭގެ އިގުތިސޯދީ ހާލަތު ވަރަށް ނާޒުކު ފައްތަރެއްގައި އޮތް އިރު، އެކަމުގެ ނޭދެވޭ އަސަރު ރާއްޖެއަށް ވެސް ކުރިމަތިވުމުގެ ފުރުސަތު ބޮޑު ކަމަށެވެ.
"އަޅުގަނޑުމެންގެ ކުރިމަތީގައި މިއޮތީ ވަރަށް ސީރިއަސް ރިސެޝަނެއް. ކާބޯތަކެއްޗާއި ތެލުގެ އަގު އިންތިހާއަށް މައްޗަށް ދިޔުމުގެ އަސަރު ރާއްޖެއަށް ކުރާނެ. އެފަދަ ހާލަތެއްގެ ނަތީޖާ އަވައްޓެރި ސްރީ ލަންކާއިން ވެސް އެ ދަނީ ފެންނަމުން،" ސޯޔާ ވިދާޅުވި އެވެ.
މީގެ އިތުރުން ވެސް ރާއްޖެއަށް ހުރި ނުރައްކާތަކަށް އަލިއަޅުވާލައްވައި ސޯޔާ ވިދާޅުވީ އާ ވާދަވެރިން އުފެދުމާއި ރާއްޖޭގެ ޑޮލަރުގެ ހާލަތު ދެމެހެއްޓެނެވި ގޮތެއްގައި ކުރިއަށް ނުގެންދެވޭނެ ކަމަށެވެ. ސޯޔާގެ ވާހަކައިގައި ރާއްޖެއަށް ކުރިމަތިވެދާނެ އެހެން ނުރައްކަލަކަށް ވެސް އިޝާރާތް ކުރެއްވި އެވެ.
އޭނާ ވިދާޅުވި ގޮތުގައި މަނީ ލޯންޑަރިންއާ ދެކޮޅަށް ބައިނަލްއަގުވާމީ މިންގަނޑުކަމަށްވާ ފައިނޭންޝަލް އެކްޝަން ޓާސްކްފޯސް (އެފްއޭޓީއެފް) އަންނަނީ މުރާޖައާ ކުރަމުންނެވެ. އެފްއޭޓީއެފް މުރާޖައުކޮށް ނިމޭއިރު، ރާއްޖެއަށް "ރަނގަޅުނުވެދާނެ" ކަމަށް ވެސް ސޯޔާ ވިދާޅުވި އެވެ.
އެފްއޭޓީއެފަކީ މަނީ ލޯންޑަރިންނާއި ޓެރަރިޒަމް ފައިނޭންސިން ހުއްޓުވަން ގައުމުތަކުން އަމަލުކުރަންޖެހޭ ބައިނަލްއަގުވާމީ މިންގަނޑެކެވެ. ރާއްޖެއަށް ކުރިމަތިވެފައިވާ އެފަދަ ނުރައްކާތައް ސިފަކޮށްދެއްވަން ސޯޔާ ވަނީ މަޝްހޫރު ޓީވީ ސީރީޒް "ގޭމް އޮފް ތްރޯންސް" ބުނާ "ވިންޓާ އިޒް ކަމިންގް" އިންޒާރު ބޭނުންކުރައްވައިފަ އެވެ.
"ފިނި މޫސުމް ރާއްޖެއަށް ވެސް އައިސްދާނެ. އެކަމަށް ބީއެމްއެލްއިން މިދަނީ ތައްޔާރުވަމުން. އެކަމަކު މިހާރު އޮތް ސުވާލަކީ އެކަމަށް ތައްޔާރުވާން އެހެން ފަރާތްތަކުން ކުރަނީ ކޮން ކަމެއްތޯ؟،" އޭނާ ސުވާލު ކުރެއްވި އެވެ.
ސަރުކާރަށް 674 މިލިއަން ރުފިޔާ
ސޯޔާގެ ވާހަކައިގައި ވަނީ ފާއިތުވި އަހަރު ބީއެމްއެލްއިން ހޯދި ކުރިއެރުންތަކާއި ކާމިޔާބީތައް ވެސް ފާހަގަކުރައްވައިފަ އެވެ. އެގޮތުން، ބޭންކުގެ ފައިދާ 470 ޕަސަންޓް އިތުރުވެ، 1.9 ބިލިއަން ރުފިޔާއަށް މިދިޔަ އަހަރު އަރާފައިވާ ކަމަށް އޭނާ ވިދާޅުވި އެވެ.
އެއާއެކު، ޓެކްސްގެ ގޮތުގައި ދައުލަތަށް ބީއެމްއެލްއިން 543 މިލިއަން ރުފިޔާއިން ދައްކާފައިވާއިރު، ހިއްސާގެ ފައިދާގެ ގޮތުގައި އިތުރު 131 މިލިއަން ރުފިޔާ ލިބިފައިވާ ކަން ސޯޔާ ފާހަގަކުރެއްވި އެވެ.
"އަޅުގަނޑުމެނާ [ބީއެމްއެލް] ނުލައި ދައުލަތުގެ ހަރަދުތައް ކުރަން އިތުރަށް ދަތިވާނެ،" އޭނާ ވިދާޅުވި އެވެ.
މީގެ އިތުރުން ކޮވިޑުގެ ބަލިމަޑުކަމުގައި ތެރޭގައި ބޭންކުން އަދާކުރި މުހިންމު ދައުރާއި، ބޭންކުން ދޭ ހިދުމަތްތަކުގެ ފެންވަރު ރަނގަޅު ކުރުމަށް ކުރެވޭ މަސައްކަތްތަކުގެ އިތުރުން މުސްތަގުބަލުގައި ބޭންކު ހިންގޭނެ ގާބިލު ދިވެހިން ތިބިކަން ސޯޔާގެ ވާހަކައިގައި ފާހަގަކުރެއްވި އެވެ.
ރެކޯޑް ޑިވިޑެންޑް
މިރޭގެ ޖަލްސާގައި ބީއެމްއެލްގެ ހިއްސާދާރުން ވަނީ ބޭންކުގެ ތާރީހުގައި ވެސް އެންމެ ބޮޑު އަދަދެއްގެ ފައިދާއެއް ބަހަން ފާސްކޮށްފަ އެވެ.
ބޭންކުގެ ބޯޑުން ހިއްސާދާރުންނަށް ހުށަހެޅީ އިންޓެރިމް ޑިވިޑެންޑުގެ ގޮތުގައި 13ރ. ގެ މަގުން 69.9 މިލިއަން ރުފިޔާ އާއި ފައިނަލް ޑިވިޑެންޑުގެ ގޮތުގައި 35ރ. މަގުން އިތުރު 188.3 މިލިއަން ރުފިޔާ ހިއްސާގެ ފައިދާ ބަހާށެވެ.
މި ހުށެހެޅުން ފާސްވުމާއެކު، މި އަހަރު ބީއެމްއެލްގެ ހިއްސާދާރުންނަށް ހިއްސާއަކަށް 48ރ. ލިބޭނެ އެވެ.
މިއީ މޫނުމަތީ އަގު 50ރ. ގައި ހުރި ބީއެމްއެލްގެ ހިއްސާއަކަށް މިހާ ބޮޑު ފައިދާއެއް ލިބުނު ފުރަތަމަ ފަހަރެވެ.
