މޮސްކޯ، ރަޝިއާ (މޭ 28) - ރަޝިއާއިން އަޑަށް ވުރެ ބާރަށް ދަތުރު ކުރާ "ޒާކޯން" ހައިޕާސޮނިކް މިސައިލެއް ކާމިޔާބުކަމާ އެކު ޓެސްޓުކޮށްފި އެވެ.
ރަޝިއާ ޑިފެންސް މިނިސްޓްރީން ބުނީ މިސައިލް ލޯންޗު ކުރީ ބެރެންޓްސް ކަނޑުގައި ސްޓޭޝަންކޮށްފައި އޮތް އެޑްމިރަލް ގޯރްޝްކޯވް މަނަވަރުން ކަމަށެވެ.
އެ މަނަވަރުން ލޯންޗު ކުރި މިސައިލް ވަނީ ކާމިޔާބުކަމާ އެކު 1000 ކިލޯމީޓަރު ދުރަށް ދަތުރުކޮށް، އާކްޓިކް ސަރަހައްދުގައި އޮންނަ ވައިޓް ކަނޑުގެ ޓާގެޓަށް ފޯރާފަ އެވެ.
މިނިސްޓްރީން ބުނީ ހައިޕާސޮނިކް މިސައިލް ޓެސްޓު ކުރީ އާ ހަތިޔާރުތަކެއް ޓެސްޓު ކުރުމަށް މިހާރު ހިންގާ އޮޕަރޭޝަނުގެ ތެރެއިން ކަމަށެވެ.
"ޒާކޯން" މިސައިލެއް އެންމެ ފުރަތަމަ ޓެސްޓު ކުރީ އޮކްޓޯބަރު 2020 ގަ އެވެ. އެއީ ބޮޑު ކާމިޔާބެއްގެ ގޮތުގައި ރައީސް ލެޑިމިއަ ޕުޓިން ސިފަކުރެއްވި އެވެ.
އެ ވައްތަރުގެ މިސައިލެއް އަނެއްކާވެސް ޓެސްޓުކޮށްފައިވާ އިރު، ޔޫކްރެއިންގައި ކުރާ ހަނގުރާމަ އިތުރަށް ވަރުގަދަ ކުރުމުގެ މަސައްކަތް ރަޝިއާއިން ދަނީ ކުރަމުންނެވެ.
އަލަށް ޓެސްޓު ކުރި "ޒާކޯން" މިސައިލަކީ އަޑަށް ވުރެ 5-10 ގުނަ އަވަހަށް 1000 ކިލޯމީޓަރުގެ ސަރަހައްދެއް ކަޑައްތު ކުރުމުގެ ގާބިލްކަން ލިބިފައިވާ ހަތިޔާރެކެވެ.
